被忽視太難受　升呢吐氣揚眉
金剛：做大哥好舒服

07年由台灣來港發展的金剛，又做主持又拍劇，以「聽多兩次先會明」的廣東話成為獨有標誌。今次在《巾幗梟雄之義海豪情》升呢做大哥，飾演大反派日軍大佐向山鐵也，這個反派男主角竟令觀眾受落，金剛坦言：「原來做大哥真係好舒服。」撰文：何慧斯

金剛談到在《巾幗梟雄之義海豪情》中飾演大反派日軍大佐向山鐵也，與九姑娘鄧萃雯的關係，他說：「我啱啱睇劇本都以為係我鍾意佢，但係事實上我嗰種鍾意唔係想同佢一齊嗰種，係鍾意佢幫我賺錢，所以咪保護佢囉。」

由台灣來港發展的金剛，在台慶劇《義海豪情》升呢做大反派，他謂估不到觀眾會受落。攝影：葉君海

靠半鹹淡廣東話殺出血路，金剛笑言若講得純正便要退休。

金剛希望拍愛情劇，因為諧星也有談戀愛的權利。

「講嘢可以好寸」

對於今次有份演出，金剛坦言覺得意外，他說：「真係好多謝添哥（李添勝），完全冇諗過，我係 nobody嚟喎，而且又覺得自己未去到做呢個角色嘅階段，估唔到出咗街之後，竟然好多人話好鍾意我，可能佢哋覺得我應該係搞笑，冇諗過我會做啲咁認真嘅嘢。」最令金剛覺得驚奇的，相信莫過於他由下把位突然「升呢」做大哥，劇中人人見到他都要彎腰 90度鞠躬，金剛笑說：「我初初都有啲唔習慣，以前通常都係企喺大哥嘅身邊，但原來做大哥真係好舒服，仲好有氣勢，講嘢可以好寸，出入有人鞠躬，落雨又有人擔遮，呢個角色係反派嘅男主角，我相信啲人會覺得我同平時唔同，我唔係淨係識得搞笑。」
難得有人賞識，金剛會否覺得飄飄然？他懶認真地說：「唔使飄，其實我冇乜睇觀眾啲意見，一直以嚟我都認為表現好同唔好，點都會有人講，所以無論你睇完鍾唔鍾意我，畀乜嘢意見都好，我都會好多謝你。下次最好可以拍埋愛情戲，諧星都有談戀愛嘅權利，美女都可以配野獸，唔一定配帥哥。」
07年由台灣來港發展，由零開始到今日有人賞識，當中不乏新挑戰，金剛收起笑臉，有感而發地說：「其實《獎門人》真係幫我咗好多，因為呢個節目多咗好多機會，大家知道我係邊個，做起嘢上嚟一定會開心舒服好多，我都係人嚟嘛，嗰種俾人忽視嘅感覺好難受。」

金剛在《義》劇內與鄧萃雯（左）關係曖昧，處處維護雯女。劇照

金剛在《獎門人》的搞笑形象，贏到不少觀眾緣。資料圖片

慶幸廣東話唔好

金剛續說：「初初以為唔識講廣東話咪死梗，又點會諗過觀眾會接受啲聽唔明嘅廣東話，呢個都係我諗唔到嘅效果，所以我有時都唔想講太多廣東話，如果講得好我咪要退休囉？」
對於將來的期望，金剛說：「做人有夢想係好，但係好多嘢係控制唔到，所以我唔會希望自己要做啲乜嘢，我覺得最緊要係做好眼前嘅嘢，如果期望太多，將來實現唔到咪會好傷心囉！有機會咪做，冇機會先再諗！」