3年高飛朱璇拒絕再Hea

曾與湯臣集團副主席湯珈鋮傳緋聞的08年「華姐」冠軍朱璇,感情生活交白卷,對事業卻雄心萬丈,立志三年內要在娛圈打出名堂,並揚言不成功便消失。

感情篇
外表有點似廖碧兒的朱璇,自08年勇奪國際中華小姐后冠後,一直默默耕耘。至早前與前「俠女」徐楓兒子湯珈鋮看演唱會而傳出緋聞,人氣即時急升!據知二人是經徐楓認識,問到是否想行奶奶政策?朱璇笑說:「我哋都唔係拍拖!佢平時嗌我做阿妹o架!徐楓姐知道我喺香港一個人住,佢覺得湯珈鋮平時唔會主動識朋友,做媽咪當然擔心,所以介紹我哋認識!(徐楓姐好鍾意你?)佢鍾意好多乖女仔,我當然都係啦!」

「鍾意夠高夠黑」
朱璇直言湯珈鋮並非「那杯茶」,但提起緋聞仍笑不攏嘴:「我哋講咗呢排唔會喺公開場合見面,費事又畀人寫啦!佢好介意啲相影得佢唔靚仔!其實我鍾意男仔高高大大、皮膚黑黑,珈鋮太溫柔同斯文,加上佢做地產、投資生意,我又做娛樂圈,大家冇乜共同話題!我都有介紹女仔畀佢識,好似陳爽,可惜雙方都好怕醜,見面冇乜嘢講,可能阿爽太多人追,反而我較少,呢單緋聞之後更加擔心冇人追!」朱璇性格率直爽朗,經常笑不停,她透露來港後一直單身,還自爆曾經暗戀老師:「喺法國讀戲劇時,有一位40幾歲嘅四國混血阿Sir成熟穩重,完全係我鍾意嘅類型,可惜唔敢坦白示愛!」

事業篇
大部分中華小姐都是隻身來港發展,身邊沒有家人及朋友,一切由零開始,朱璇坦言早為自己定下3年計劃,如果屆時未能達標,可能會突然在娛樂圈消失:「我諗住畀3年時間,但好多前輩話得幾年,可能唔知做過乜!不過我想下定決心,雖然明知好多事控制唔到,但我年紀都唔細,唔可以成日咁Hea,所以一定要逼自己絕啲,如果半年後突然唔見我,唔好覺得出奇!」

「心願行紅地氈」
朱璇擔心自己半紅不黑,幸華姐中仍有少數成功例子,如廖碧兒及陳法拉均能登上一線花旦之位,朱璇表示不會眼紅別人:「每個人條路唔同!我只會檢討自己有乜做得唔夠好?上天好公平,人紅咗太出名,雖然會賺到錢,但相對要犧牲好多私人空間,可能佢哋會羨慕我有假放!」她在公仔箱的成績可能仍未達標,但出道不久便被楊凡導演睇中拍《淚王子》,電影更揚威海外:「我最大心願係要行紅地氈,雖然未試過去康城,但行過威尼斯紅地氈,又做到自己鍾意嘅角色,真係好開心!」

家人篇
朱璇慶幸沒有家庭負擔,18歲已離開家鄉北京,隻身到巴黎讀書,一直以來無論做甚麼都得到家人支持:「可能因為我係獨女,屋企人好錫我!之前有同父母傾過去留問題,但佢哋都係嗰句:『你鍾意啦!』都係唔想畀太大壓力我!(喺香港置業安居?)如果要買樓,一定要屋企人畀首期,不過我亦希望獨立!(仲有冇問父母攞零用錢?)哈哈!好少……總之想獨立,唔想令佢哋擔心!」

「唔想家人擔心」
朱璇曾在法國修讀戲劇,一直對演戲天分甚具信心,但加入娛樂圈後卻遇上重重打擊,令她反思自己是否適合演戲:「我都未諗過唔做呢行可以做乜?以前有想過做戲劇老師,不過做過演員之後,反而冇乜信心!有啲角色好似好難掌握,可能自己廣東話唔係太好,雖然有搵老師教讀劇本,放好多心思去練習,可惜一埋位拍又會唔記得!加上身邊好朋友、同屆中華小姐季軍徐萌都已離開咗娛樂圈,所以會有失落感!」

後記:笑女廖碧兒
朱璇帶點廖碧兒初出道的影子,雖然沒有對方的逼爆身材,但穿低胸裝依然自信十足,笑容燦爛更有過之而無不及:「外國咁着好普通!我唔覺得身材勁喺娛樂圈發展有着數,唔係人人都行呢條路!除咗有人話我似廖碧兒,仲有人話我似徐子珊,佢哋都係靚女,所以好開心!」

朱璇為自己定下發展大計,成功與否,大家拭目以待。

朱璇為自己定下發展大計,成功與否,大家拭目以待。

性格爽朗的朱璇,經常笑容滿面,不知不覺俘虜你。

性格爽朗的朱璇,經常笑容滿面,不知不覺俘虜你。

朱璇輕咬手指,加上酥胸半露,流露性感一面。

朱璇輕咬手指,加上酥胸半露,流露性感一面。

朱璇甫士多多,狀態保持Good Fit。

朱璇甫士多多,狀態保持Good Fit。

朱璇雖沒奇峰突出的身材,但勝在夠均勻,令人看得舒服。

華姐奇招突圍

每年的「國際中華小姐」都為娛樂圈帶來不少索女新面孔,但要成功彈起,可能要使出奇招出位!

張慧雯
應屆中華小姐季軍張慧雯早前在遊戲節目中,誤將蘇永康誤認是梁漢文,幾乎淚灑當場,但同時令知名度大增!

苟芸慧
09年華姐冠軍苟芸慧甫出道便被指貌似林熙蕾,一向惜肉如金的她,去年突然谷胸現身酒會,即被封「氣質咪神」!

陳爽
07年華姐季軍陳爽,以半鹹淡廣東話主持《掌故王》,雖然被評發音不正,但獲網民起底兼讚「有美麗的長腿」。