又喊又暈 整蠱觀眾 嘉欣BB獲封「視后」

由李思捷擔任主持嘅《玩嘢王》播出以來，收視相當唔錯，更掀起話題，好似早排新城DJ林盛斌（Bob）擔任婚宴司儀，慘遭大整蠱，不過Bob總算臨危不亂，處變不驚，專業司儀形象備受讚賞。

到今晚播出一集嘅《玩嘢王》，請到鍾嘉欣做嘉賓，李思捷叫嘉欣BB同魔術師Louis Yan（甄澤權）一齊表演魔術，點知接二連三「發生意外」，嘉欣BB受驚玩到眼濕濕，一副楚楚可憐模樣。而最可怕一幕係表演「斷頭台」魔術時，李思捷將個頭放上「斷頭台」度 ，之前已被魔術師做手腳，但當嘉欣BB拉掣時，塊所謂「刀片」直插在李思捷頸部，搞到對方忽然「吐血」。哇﹗不知情嘅嘉欣BB嚇到失控，爆喊狂標淚，期間佢仲突然大叫：「佢係我男朋友嚟o架﹗」之後發狂大鬧魔術師，最後更激動「暈倒」，此時「吐血受傷」嘅李思捷亦一直在旁安慰嘉欣BB，呢個情景真係嚇壞唔少電視機前嘅觀眾。

睇到呢度，相信唔少嘉欣BB粉絲或者視迷，心裡面都可能鬧爆李思捷同魔術師，點解要咁樣整蠱/糟躓佢哋嘅女神。。。。不過好戲在後頭，謎底揭盅：原來李思捷係同嘉欣BB上演一幕好戲，夾手夾腳整蠱魔術師，認真反高潮，至於被整嘅魔術師亦表現愕然，點解被整蠱嘅竟然係佢自己呢？

其實除咗魔術師被大整蠱外，一班視迷都係被整蠱一群呢﹗不過嘉欣BB嘅精湛演出，尤其係嘅喊戲同埋暈倒一幕，廣受好評，唔少圈中藝人包括陳敏之同王君馨等都讚佢好戲，唔少網民仲洗版式都話畀佢呃倒，仲大讚嘉欣BB演技一流，呢場喊戲足以問鼎視后添﹗

至於嘉欣BB今晚九點幾，就喺微博寫道：「Sorry, 我騙了你們！」

嘉欣BB，你真係好好好好戲呀﹗

最佳女主角演技重溫視頻

鍾嘉欣玩殘甄澤權

事後記者致電Louis，他笑言當時完全不察覺被整蠱：「嘉欣真係太好演技啦，佢真係表現到好驚！（嬲思捷？）又唔會，只係覺得出錢出力去設計個魔術，點知係玩自己！但如果真係整蠱到嘉欣喊，我驚會畀佢啲粉絲鬧爆！」