兩年前陳山聰為追求何家千金何超雲不惜拋妻棄友罷工，超雲更認定對方一片真心不計金錢物質而對他照顧有加，山聰從此過着豪門生活，惜人心冇厭足，山聰密謀有嘢揸手，搲舖搲車搲物業，令超雲覺得純真愛情開始變質，遂主動提出分手，有人因孭住大筆卡數而乘機索取千萬掟煲費，反被逐出同居大宅。(第800期《東方新地》)

東方新地：兩年情玩完 何超雲狠撇 陳山聰索千萬掟煲費

陳山聰同超雲嘅兩年幾感情玩完，有傳係因為錢銀瓜葛，超雲覺得愛情開始變質，主動提出分手，喺Instagram上載「Love=money」及微博暗喻有人令佢上咗一課。之後超雲就飛去倫敦散心，山聰就繼續潛水，當年佢為高攀富貴，拋妻棄友，係就係過咗兩年富豪生活，歐遊、坐頭等、過著上流社會嘅生活。而超雲一直都認為山聰係講心唔講金，不過隨住佢嘅合資搞生意開始，問題亦慢慢蘊釀出嚟。

據知，山聰所謂合資做時裝生意，其實全數都係超雲負責，有指山聰卡咭愈積愈多，不停求女友出手相助，超雲勸極佢唔好咁大使都唔聽，慢慢超雲亦開始生厭，所以索性提出分手，不過山聰開口話分手至少都幫佢搞埋條數先，被索千萬掟煲費嘅超雲即時辣著咗踢山聰出大門。

山聰被人逐出大宅，有傳佢搬返昔日同前妻Ponny同住嘅九龍灣麗晶花園，亦有可能係去佢唯一嘅朋友郭政鴻位於鑽石山嘅龍蟠苑暫住。據知o依家山聰仍盡力向超雲出冧招，求博返身機會。

今日凌晨，身在英國嘅超雲又喺微博玩文字遊戲喇，佢話：「Nothing is impossible, the word itself says ‘I’m possible’!”」唔知超雲今次係咪想講，人哋以為佢冇可能同山聰，其實係有可能呢？