曾志偉60大壽連日大肆慶祝，由會所、會展、酒店玩到迪士尼，所到之處留下不少腳毛，本刊直擊志偉生日P第5炮，由無綫第二把交椅行政主席梁乃鵬博士請客，在尖沙嘴帝苑酒店筵開一席，請來多位回巢坐鎮的福將如方中信、吳啟華、苗僑偉和張兆輝等，唔少得同志偉老友鬼鬼的佘詩曼，據知飯局美其名為志偉賀壽，實則氹阿佘回歸娘家幫拖。

(第802期《東方新地》)

佘黃告吹

37歲的佘詩曼，效力無綫14年，是鎮台之寶兼收視保證，阿佘前年拍罷戚其義監製劇集《4 in Love》後，正式約滿無綫，無約一身輕先後有指被香港電視、Now TV、英皇娛樂等羅致，不過她最後轉投創藝娛樂，力攻內地市場搵真銀，兩年約上月期滿，再次回復自由身的阿佘，被由無綫轉投Now的恩師梅小青力斟她簽約，阿佘直認雙方有傾過，無綫一心打算高價招佘回巢，為免被截糊，出盡法寶留人，知情人謂：「阿佘仲欠TVB一套劇，其實一直都有傾緊，本來預咗拍黃子華開《絕代商驕2》，4月開拍但阿佘檔期就唔到，再延遲子華又有嘢搞有排拖，所以依家轉咗徐子珊配子華。」

熟男任揀

「佘黃」唔成事，無綫誇口任阿佘挑對手，利誘她回歸，不過阿佘一味採取拖字訣謂：「依家揀緊劇本，同TVB仲傾緊拍邊類型故事，最快都要年尾至開。」拖住Now TV同無綫變兩頭佘，終於要志偉出馬，「志偉話晒睇住佢大，大家亦師亦友，佢都希望阿佘返TVB幫手，前排無綫錄影志偉60大壽個節目，阿佘都唔肯去，惟有再約傾掂佢。」知情人謂。上周二（16日），由梁乃鵬博士在帝苑酒店米芝蓮級食府東來順請客，親挽阿佘，當晚獲邀的除了阿佘仲有回巢四寶苗僑偉、方中信、吳啟華和張兆輝、無綫戲劇製作總監梁家樹、樂易玲、苟芸慧、叻哥夫婦等，席間個個輪流做說客，而去年在志偉生日P，成功被樂易玲斟回巢拍劇的吳啟華，更笑指如果阿佘回巢，一定俾期配合，一行十五人把酒談足五句鐘才散場，難得志偉唔使打橫出，他着眾人留步，讓記者影大合照。