「公關界女強人」周美鳳（Lelia）港姐出身、從事公關行業多年，公認為有拼勁及魄力的事業型女性，深得城中名人明星及各大品牌愛戴信任；近年更致力推動慈善工作，回饋社會。敢言而有義氣的她、相識滿天下，主持欄目【鳳旨要講】，奉旨講盡娛圈名流趣聞軼事。
本周嘉賓是緋聞是非多多的「宅男女神」苟芸慧（Christine），Christine近日先後與郭富城及已婚潛水店店東鬧緋聞，她直言覺得委屈，說到激動處，更不禁淚灑當場。
(第802期《東方新地》)
周：周美鳳 苟：苟芸慧
周：先講你同郭富城搭上單新聞，究竟真定假？
苟：我覺得緋聞係呢行的part of packing，正面啲睇，都明白喺呢行有記者寫，係因為有價值。如果真係計，我覺得我同小美熟啲。
周：你句「爛桃花」令人覺得好似挑戰熊黛林、好有火藥味，其實你知唔知「爛桃花」點解？
苟：當日記者問我覺唔覺呢排好多桃花，我答都係「爛桃花啫！」始終中文唔係我嘅母語，好多時用詞未必啱，容易令人誤會，經過今次都學識要改進，搵番啲啱嘅字眼。
周：覺得城城為人點？
苟：覺得佢好開朗、有啲似我自己嘅性格，相處好舒服，但未熟到可以評論佢個人係點。佢係一個好好嘅前輩、好尊敬的前輩。
周：私下有無交換電話、約見面？
苟：我都係同小美比較熟啲，好多嘢係佢公司同我公司去傾。周：點形容同城城的關係？
苟：工作上的partner、合作過。
周：點解傳緋聞，仲去睇佢演唱會？
苟：我覺得既然身冇屎、清者自清，我反而覺得避忌唔去更加心有鬼。
周：知唔知城城同熊黛林拍拖？
苟：我雖然做呢行，但好少留意娛樂新聞，係識咗佢後，睇新聞先知道。
周：點睇Lynn帶打苟棒對付你？
苟：我覺得記者咁寫幾有創意、幾好笑，既然做呢行工作係娛樂大眾，就當係娛樂吓大家。
周：日後若同城城或Lynn同場，會否尷尬？苟：我個人唔會，因為冇嘢就真係唔使驚。
三年無放假
周：相比起上次同謝天華的緋聞激動到喊，你今次好似放鬆咗？
苟：當時接住拍《飛虎》同《怒火街頭2 》，而且一個月做5單封面，又緋聞又不和，一有新聞，就要見記者回應，完全冇時間俾自己休息、思考，覺得好無辜、好無助，唔知點處理，因為真係拍劇同車而被寫到咁，對一個女仔的名聲好影響，覺得好過分！
周：有無嬲到想返加拿大算？
苟：我覺得走就輸俾佢哋，寧願用時間證明。
周：幾耐無放假？
苟：三年幾！第一年，有放過4日假飛返加拿大，之後一直都冇。
周： 拍劇最長幾耐冇瞓覺？
苟：三十幾個鐘，諗番都好笑，係攰到有人同我講嘢，我都聽唔到，個靈魂唔知去咗邊，得個殼喺度。
周：最近你同一位已婚潛水店東主傳緋聞。
苟：佢係我潛水教練，好多圈中人，例如謝天華都跟佢學潛水。我覺得自己太靜，所以去學騎馬、潛水，希望可以對工作有幫助；其實嬲㗎，始終佢唔係
呢行嘅人。
周：咁多緋聞，屋企人信任、支持你？苟： 我先解釋番點解爹哋、媽咪之前對我的緋聞會咁大反應，因為佢哋係夜晚9點鐘瞓、朝早6點起身嗰啲人，有時我拍劇拍到朝早，媽咪會問「點解你仲唔瞓？」所以呢啲新聞對佢嚟講係好敏感，但經過咁多次，佢都開始明白係呢行嘅遊戲規則，亦對我好信任。
唔知俾人窒
周：入行係因為媽咪幫你報名參加華姐選美，但你自己有冇諗過入娛樂圈？
苟：我係一個好男仔頭嘅女仔，返香港前，廿五年 來從無化過妝，工作打扮都係好隨便、好隨意，因為加拿大係好relax嘅地方，根本冇需要、我亦冇好大興趣鑽研打扮。
周：返香港4年，有冇試過俾人出賣？
苟：有，我視為成長的一部分。加拿大冇乜競爭，返到香港先學識睇人，初初有人窒我我都唔知，仲同佢一齊笑。有啲人真係對我好、有啲人其實係假意或者專登打擊我，要識得分；好似我曾經呻過有狗仔隊跟好煩，點知原來聽者有意，誤會我晒命，所以依家更加學識講說話要小心、盡量唔好傷害到人。
抗拒拍拖
周：係咪由細到大都咁靚女、咁多人追？ 苟：我有好長時間箍牙、戴大眼鏡，我有750度近視，戴眼鏡戴到17歲先轉戴隱形眼鏡。同埋我性格好慢熱、好收埋自己，只要我一feel到有人對我有意思，我就會避。
周：咁誇張？
苟：爹哋媽咪好傳統，對我影響好大，嗰時嘅我真係幾乖，爹哋媽咪叫我唔好拍拖，我真係唔拍。而且我一定要相處好耐，由朋友開始發展，冇試過一見鍾情。
周：拍拖理想對象係圈內定圈外人？
苟：我覺得圈外人適合啲，做呢行，有時真真假假分唔到，拍拖當然希望一生一世，我覺得數據上睇，同行外人長遠發展機會係大過同行內人。
周：呢刻有冇人追？
苟：有人表白，但我想以工作行先；時機唔係咁啱，呢刻我真係唔想，同埋我覺得女仔應該矜持啲，唔係一有男仔追就同人拍拖。我覺得結婚幾時都可以，依家應該把握機會拓展自己眼界。
周：追你的係行內定行外人？
苟：行內、行外都有。
周：有冇繼續見面？
苟：一大班人一齊出嚟就有，因為朋友可以幫吓眼。我星座係巨蟹座，都好想組織家庭，只要對方唔俾壓力我，我都唔抗拒見面 食飯，因為做朋友都係要時間相處、了解，但唔可以影響到我依家工作重心。
