陳智燊五呎十吋高，斯文靚仔，能操純正英語，比圈中低學歷小生吃香，猶如女人湯丸，自助散餐任食唔嬲；出名溫柔的他，多年來瞞住正印宋熙年左右逢源大小通吃，冧盡身邊女拍檔；外表乖乖女的馬賽其實有鋪集郵癮。去年尾，兩人合作拍新劇《傳愛事務所》一個月已極速行埋，人前人後無避忌，卿卿我我，更被拍得一支水兩份飲，及同在狹小廠車內換衫。

返閨趕開餐

日前，《傳》劇在尖沙嘴舉行煞科宴，兩人刻意前後腳，有份扲荷包請客的馬賽先到，場內黐實高層珍姐及老戲骨馬海倫擦鞋扮乖，陳智燊則姍姍來遲，連大合照都冇影，只趕及入席。甫散席，兩人貫徹食得唔好嘥愛情觀，打包剩菜外賣，雞咁腳飛的回馬賽位於清水灣半島寓所，打算宵夜直落。途經陳所居君傲灣住所，他卻過門不入，加快直駛馬賽清水灣半島香閨，由於兩人俱正上位中，食還食，為前途着想，高度戒備，抵達後故意不下車，靜候視察，之後疑察覺到本刊採訪車，馬賽焗住上樓，陳則冇癮鬆人、返家食自己！

(第802期《東方新地》)

兩人不避忌於人來人往的尖沙嘴截的士，但當遇途人認出眼望望，仍難免尷尬。

媾女王禮數、風度自然做得足，而且女方明知有正印女友，都大方招待，更加要有風度開車門，讓馬賽先上車。

馬賽未坐穩，陳已急急腳跟住上，好趕啫！

發現記者，陳智燊急撇，馬賽步入大堂時無奈講住電話，背影落寞。

明冧陳智燊 馬賽：唔排除發展！

日前(4月5日)，本刊趁馬賽到電視城開工，追問她與陳智燊的關係，雖然死口唔認拍拖，但就冧爆兼鋪定後路話：「唔排除發展」跟陳早前表示的「將來嘅事大家唔知」口徑一致。

記：記者 馬：馬賽

記：係咪同陳智燊拍拖？
馬： 唔係，合作過一、兩次啫！記：影到你同佢同車返你屋企。馬：佢順路兜我啫！
記： 但經過佢屋企佢無落車， 反而直駛去你屋企喎！
馬（尷尬）： ……佢真係幾gentleman，送我返屋企先。
記：覺得佢份人點？
馬（冧爆甜笑）： 幾 gentleman！記：係咪你心儀對象？
馬： 唔排除日後發展，但依家純粹工作上拍檔。