今年一月，蒙嘉慧終於成功收復冇腳雀仔鄭伊健， 二人於日本東京低調完婚。雖然肯結婚，但一直以來，鄭伊健都表示唔會生B，除了因為自己都是大細路，更覺得現今社會環境不適合下一代成長，當然蒙嘉慧亦都好識做，人前人後都話同老公有晒共識唔生，不過其實蒙嘉慧恨B恨到發燒。最近，她成功掂伊健批准留種，為保持最佳狀態去陀B，近日她頻頻搵中醫通穴谷胎，實行養好副偈去生仔。

(第802期《東方新地》)

扮唔生

無論在任何形式的訪問，鄭伊健都表示拒絕生仔，態度堅決，一來自己貪玩，二來覺得養育小朋友責任重大，「我哋都覺得唔應該有下一代，對依家個社會冇信心，阿妹同妹夫都唔生小朋友，阿哥有小朋友，所以我哋冇壓力。」夫唱婦隨，蒙嘉慧都話有咗係噩夢，仲話懷胎十月似坐監，「加埋前四後六喎，好似坐咗成年監！我同伊健有共識，暫時唔考慮生小朋友。」不過其實蒙嘉慧恨生仔恨到流口水，加上自己年紀唔細，再唔生就冇得生，結婚後經常同朋友呻：「佢話自己都三十九歲，已經係高齡產婦，再遲多一、兩年就真係唔使諗。同埋佢諗住不嬲唔打算結婚嘅伊健都同佢結婚，生仔都應該好易氹。」

養好副偈

蒙嘉慧熟知鄭伊健脾性，受軟唔受硬，所以結婚多月以來，都未有提及生B的事，知情者說：「伊健個人就好似細路仔，你愈叫佢做，佢就愈唔做，你冇諗過佢會做，佢反而會做咗出嚟。」為免自己辣着老公，於是她搵朋友做說客，一次朋友聚會，蒙嘉慧搵番上次氹掂鄭伊健結婚的朋友探口風，「話乜嘢老咗有人照顧，有個仔陪玩、一齊打機、打波仲開心呀，見佢又冇乜反感，於是YoYo借啲意問吓伊健，點知佢話可以試吓，真係估佢唔到！」得到伊健御准留種，蒙嘉慧急不及待周圍問人點樣調理身子，經友人介紹，早前蒙嘉慧便到位於尖沙嘴山林道的「中醫館」通穴谷胎，主理的中醫更曾於無綫的中西醫節目擔任主講嘉賓，人逢喜事精神爽，臨走前，她仲醒咗一百蚊貼士俾泊車職員，好風騷囉。