陳豪儲錢娶陳茵媺

「公關界女強人」周美鳳(Lelia)港姐出身、從事公關行業多年,公認為有拼勁及魄力的事業型女性,深得城中名人明星及各大品牌愛戴信任;近年更致力推動慈善工作,回饋社會。敢言而有義氣的她、相識滿天下,主持欄目【鳳旨要講】,奉旨講盡娛圈名流趣聞軼事。

本周嘉賓是公認筍盤的陳豪(Moses),Moses細述跟女友陳茵媺(Aimee)相戀點滴,言談間大爆拍拖以來從未嗌交,以及有意開設聯名戶口儲錢結婚。

陳豪儲錢娶陳茵媺
不時被拍得與女友陳茵媺往黃金海岸拍拖及到高級食府撐枱腳,「我覺得浪漫氣氛係需要營造,所以耐不耐會送花、出外食飯,盡量去拍吓拖,做番啲應該要做嘅嘢。」

陳豪儲錢娶陳茵媺
初拍電影即擔正男主角,坦言曾利慾薰心,「我寸過、高傲過、自以為是過,所有人接觸名利都會有咁嘅心態,覺得自己全世界最勁、睇低人,好彩早發生,唔係到老先經歷就大件事。」

周:周美鳳 陳:陳豪

周:平均一日飲幾多杯咖啡?
陳:3、4杯,試過最多7、8杯,一得閒就沖,飲咖啡對我嚟講,唔止係享受,係試自己整出嚟嘅成果,由生豆到炒豆再到沖法全部自己搞,整得唔好就真係自食其果。我屋企最多係咖啡生豆,我會逐粒揀差唔多大細嘅豆放埋一齊烘焙,確保粒粒受熱平均,出嚟杯咖啡就會甜啲!
周:咁講究,我飲即沖3合1多!
陳: 我媽咪都係!我媽咪因為錫我,唔想我辛苦,寧願自己求祈就算,有時我話駕車載佢,佢都話唔使。

有乜做乜

周:最近忙咩?
陳:都係拍劇,嚟緊會返國內拍一套內地製作的劇。
周:TVB俾你出外拍劇?
陳:其實一向都可以,只不過之前啲時間俾TVB occupied咗,期間都有人搵,但劇接劇,真係無時間,咁啱依家有空檔,咪試吓。
周:你會唔會全力去國內發展?
陳:有乜做乜,香港有發展機會就做,國內有發展機會就去,我唔會限死香港定國內,去到邊做到邊。娛樂圈運作唔係我可以控制,所以我可以做就係有工作就做,盡量延長演藝生命。

周:近幾年視帝變咗係黎耀祥同林峯之爭,你退下火線?
陳:做呢行,做得愈耐愈明白,一個好的劇本係好難求,做演員當然希望可以遇到好劇本、好班底、好角色,但通常攞獎的角色,係好多機緣巧合,作為演員,盡量做好自己嗰part同等待自己的機會。
周:鍾唔鍾意演戲?
陳:我成日覺得做戲係攞正牌去玩、去試唔同嘅嘢。當然,我enjoy我的工作。
周:你咁諗就輕鬆啲!你被封「筍盤」,幾乎係女人都鍾意,有無諗過會咁受歡迎?
陳:從無諗大紅大紫、從來都唔係我計算之內。我嘅出身係一個普通人,唔算靚仔、根本無人留意,直至當個個(藝人)走晒, (高層)發現我好似OK、俾我試吓,我係咁訓練出嚟,所以依家所有嘢,對我嚟講全部係bonus。我睇得好灰,任何人上到一個高啲嘅位置,唔知幾時會跌番落嚟,視乎last幾耐,盡量去enjoy、好好去維持依家有嘅嘢,可以的話去建立一啲嘢,等落番嚟嘅時候唔使咁慘。

周美鳳 陳豪

蒲到唔使瞓

周:據聞你未入電視圈之前,做model年代經常夜蒲,情形係咪好似你拍嗰套《晚9朝5》咁?
陳:我鍾意出去蒲,但男女關係無套戲咁亂。我覺得幾好彩我喺比較後生嗰陣就蒲得幾飽,嗰時我由Canton、Tropical、97(酒吧)蒲到rave party年代,蒲到唔使瞓,直至有一次,好似有盞燈照住、個人醒一醒,同自己講:「我好似唔屬於呢度」就無再蒲。
周:蒲到咁,唔使開工?
陳:諗番都好笑,機會嚟嗰陣我無心拍;到無機會,就開始想拍,我由主角做到二線、客串、反派、古惑仔,有段時間做到每日都想離開呢行,試過半年無工開,轉做傳銷、櫥窗設計、賣濾水器,為咗生存,變得現實、無咗自己,好彩有朋友提醒我,叫我唔好變咗第二個人。
周:你食唔食煙?
陳:我十幾歲就食煙,仲係intensive heavy smoker,我食駱駝牌,煙接煙咁食,但食咗一、兩年就戒咗,起碼試過。
周:飲唔飲酒?
陳:少,我鍾意追求味道,品酒多啲。

陳豪儲錢娶陳茵媺
經常被拍得在女友深井住所出入、打網球,「唔好誤會我哋同居,我去探佢啫,有時我煮吓嘢、有時佢煮吓嘢,撐吓枱腳;都係牛扒、意粉,西餐居多,我之前都學過煮中菜,但太多準備工夫、好難搞。」談到可有為女友執屋做家務時笑到標眼水:「我自己屋企都好亂!」

天生性格夾

周:愛情生活呢?可唔可以分享吓?
陳:好好、very good!
周:係咪因為同女友都係外國長大,鬼鬼哋、啱feel啲?
陳:唔關事,其實係大家性格、話題、溝通方面都幾夾。
周:拍同一套劇,會否尷尬?
陳:會,上次一齊拍《天梯》,好彩監製都知,將我哋分開兩條劇情線,因為真係會分心,所以我哋有共識,盡量都唔好一齊拍。
周:有無同Aimee研究演技?
陳:唔好話研究、傾吓就有。每個演員都有自己的睇法,尤其是Aimee,佢可塑性好高,同埋愈做愈好;依家就係最好的時間證明俾人睇佢自己的做法同風格,而唔係我哋去灌輸俾佢、somehow令佢變成我哋。
周:有無試過鬧交?
陳:無喎,唔知係咪天生性格比較夾。
周:佢無嫌你成日掛住整咖啡咩?
陳:佢又無、佢都幾欣賞,我整咖啡時,佢咪等我沖好俾佢飲。
周:你哋嘅溝通方法除咗WhatsApp,有無得閒寫張心意卡?
陳:呢個年代唔會嘞,有時短訊打幾句有意思的說話,已經好夠。
周:當初你點追佢?定係佢追你?
陳:其實係慢慢建立關係。
周:有無特定鍾意咩類型、條件的女仔?
陳:鍾唔鍾意一個人唔係你揀,有時兩個人決定一齊嗰種感覺,已經係嗰樣嘢,唔係你話退、就退到出嚟。
周:總有啲基本要求啩?
陳:有啲人可能因為外表,但我比較着重溝通,經過慢慢相處,類似地心吸力之類嘅嘢。
周:有無計劃儲錢結婚?
陳:一定要,所以更加要搞好自己事業。
周:有無聯名戶口?
陳:未有,發展落去,都唔會排除。兩個人健康發展,人生大事點會唔諗。

陳豪儲錢娶陳茵媺

(第803期《東方新地》)