上月中，陳山聰籌旗買機票搭夜機飛英國倫敦，希望留住何超雲這個金礦，正當大家以為二人復合，但超雲思前想後決定陳山聰冇得留低，見箍煲冇望，陳山聰亦唔要面死舌累超雲支持佢做生意當掟煲費，講嚟講去都係為咗錢，超雲睬佢都有味，立即將facebook的感情狀況由「in a relationship with Joel Chan（陳山聰）」改為「single（單身）」，正式宣布分手。

上周六，箍煲之旅失敗的陳山聰回港，雖然繼續一身名牌，但卻無處容身要返回親戚家九龍灣麗晶花園落腳，呢啲咪叫做貪字得個貧囉！

(第804期《東方新地》：超雲拒俾掟煲費 窮山聰屋邨踎躉)

箍煲失敗

趁何超雲病，陳山聰人肉速遞去倫敦服侍，落機當日，何超雲亦派司機去接陳山聰，正當陳山聰以為有得掹的時候，其實病到七彩的超雲並無復合打算，超雲好友透露：「係人有病嘅時候都想有人照顧㗎啦，話晒同陳山聰一齊咗兩年，超雲有乜喜好陳山聰都一清二楚，佢又服侍周到，咪俾佢留喺身邊囉，但其實自從上次找卡數同掟煲費單嘢之後，超雲自己都心裏有數，完全冇諗過復合。」

病好後，超雲已經表明態度話唔會復合，陳山聰隨即發難，知情人士說：「陳山聰話服侍咗佢廿幾日，冇功都有勞，又超雲支持佢做生意，其實喺倫敦咁多日，陳山聰啲使費都係超雲包，都算係咁啦。」另外，超雲除了在facebook表明自己回復「single」外，更在微博以「陳生」稱呼陳山聰，擺明要劃清界線。

寄居屋邨

索錢不遂，上周六下午五時半，陳山聰由倫敦返港，自從跟何超雲拍拖後，陳山聰以為「嫁」硬入豪門，自我感覺良好，對記者不瞅不睬，但落機當日他態度友善，一出閘更自動波企定俾傳媒影相，更說：「大家辛苦啦。」而為了避免令人覺得他冇咗超雲靠山衰到貼地，他更自製排場，身穿 Givenchy 窩釘外套、Giuseppe Zanotti波鞋、Cartier手錶，安排男友人接機兼推行李。問到他跟超雲感情狀況時，他笑着說：「感情事我就唔講啦。」再問他是否欠債，似乎觸及其死穴，他大聲否認，「冇！唔係事實嘅嘢唔值得講！」再問他將會有何工作？他繼續扮若無其事强顏歡笑，「有工作遲啲大家就知。」

以往跟超雲拍拖，出入坐Benz、住陽明山莊豪宅。豪門夢碎，回應記者問題後，陳山聰登上友人的舊款七人車，最後直駛九龍灣麗晶花園居屋，暫寄居於親戚家。