在處境劇《愛．回家》中飾演樓尚友的李霖恩，劇中有個有錢家姐樓尚好（姚瑩瑩飾）睇住，同樣現實生活中亦有個猛料老竇—前保安局局長李少光。

一直居於沙田碧濤花園細單位的他，08年和太太Candy結婚後搬到同屋苑1,300呎單位，他自嘲：「我呢啲級數藝人，老竇唔幫邊度有錢買樓！」單位成交價550萬，上手業主正是花旦蔡少芬（Ada），「嗰時同毛姐（毛舜筠）拍緊《天天天晴》，佢知我搵樓，咁啱Ada放盤，結果一拍即合。」承接了Ada物業，同層住了毛姐、陳法蓉，群旦拱照，物超所值！

為女兒棄黑選白

昔日住九龍塘、大圍的霖恩，婚後為了方便和家人互相照應，便搬近父母於沙田區居住。「有時我返工，老婆做part time，對仔女都有爺爺嫲嫲睇住。」訪問當日霖恩兒子尚宜便到了樓下爺爺嫲嫲家睡午覺。退休後的前李局長，弄孫為樂，打發時間。

以往霖恩偏愛黑調，曾花70萬來為舊居裝修，但新居感覺截然不同，全屋以白色為主調，還採用了落地玻璃窗，採光入屋，即使傍晚也可以不開燈。「我鍾意沉色啲，咁先夠型，不過有咗小朋友之後，就以佢哋為先，光線充足，對小朋友雙眼都好啲。」從落地玻璃窗往外望，是一望無際綠油油山景，感覺開揚，霖思謂望多啲連腦筋都轉快啲！

家有爬蟲類成員

為了支持環保，霖恩保留了不少上手業主Ada的裝修，「起初個廳被打通晒，喺度打幾個筋斗都得，後來我搵個櫃來分隔書房、客廳，其他冇乜特別改動。」所以間屋雖然比以前的大，但裝修費只需約$20萬，很划算；書房雖無遮無掩，但霖恩說：「對我冇乜影響，就算佢哋喺廳睇電視都唔會嘈到我，因為慣晒。」

近日他迷上養變色龍，特別在書房窗台設了一個私人觀賞園，放置6條新買的奧士力、巨人疣冠和七彩變色龍。「我好鍾意變色龍，放工返嚟攰攰地，欣賞吓佢哋嘅動態，令個人放鬆。」問到太太冇詐型嗎？霖恩口快快說：「我老婆成日都話咁總好過我出去玩女人呀！」

(第806期《東方新地》)