（「公關界女強人」周美鳳（Lelia）港姐出身、從事公關行業多年，公認為有拼勁及魄力的事業型女性，深得城中名人明星及各大品牌愛戴信任；近年更致力推動慈善工作，回饋社會。敢言而有義氣的她、相識滿天下，主持欄目【鳳旨要講】，奉旨講盡娛圈名流趣聞軼事。）
本周嘉賓是已婚型男黃浩然，黃浩然甫出道便被杜琪峯導演睇中、成杜Sir班底晉身大銀幕力捧；其後因演技沒進步失卻杜Sir光環，6年前經歷近一年冇工開黑暗日子，幾經轉折加入無綫；昔日看不見前路，令浩然學懂珍惜，不論對事業、家庭，同樣勉力做到律己以嚴；但誘惑眾多、世事難料，甚有自制力的他亦直言難保有日會為女色而出軌、淪為負心漢！
有小朋友後，對夫妻關係的最大影響，「兩公婆的溝通少咗、拗撬多咗，因為太多嘢要處理，嗰頭餵完細仔食奶，又到大仔醒，抖都冇得抖，依家改變咗，公事盡量喺公司做，返到屋企淨係做屋企嘢！」
食飯怕埋單
周：入無綫前，九個月冇工開，日子點過？
黃：靠屋企人同積蓄過活。人係惰性，當唔知前面會有咩工作，好難的起心機去進修啲咩，咪就係hea同頹！其實我入無綫頭幾年都好灰、一句講晒入不敷支，搭地鐵再轉廠巴返工；食飯時間，我會走開、唔敢同工作人員食，因為驚要我埋單！
周：初初由影圈入電視圈，有冇覺得降格？
黃：我又冇咁諗，係覺得台前幕後好多嘢唔習慣、做戲好似仲差過之前！初頭入去嗰年幾時間、幾逃避返工，其實幾大鑊！直至《碧血鹽梟》開始pick up番、至搵番樂趣。
周：逃避返工咁大件事！咁有冇諗過放棄？
黃：冇！有合約㗎嘛！係唔開心，但只係過渡期，覺得可以控制到，係未控制到啫！
周：你既非無綫「親生仔」（經理人合約藝員），點解無綫會提攜你擔正？
黃：換轉五年前，競爭仲係好激烈；但近年嘉穎、卓羲及Bosco（黃宗澤）等好多小生去咗大陸搵錢，於我相對多咗機會。
曾效力亞視，只因「位又靚啲、錢又多啲！」
驚一睡不起
周：2010年高峰期，你一年共拍一百三十幾集電視劇，點分配時間休息？
黃：我入無綫頭三年，每日瞓唔夠四個鐘，有時返到屋企都喺梳化瞓、唔敢上床瞓，驚一睡不起唔知醒開工。大仔出世，唔夠廿四小時，我就開工，基本上頭四個月，我完全唔認識我個仔。
周：太太冇詐型？
黃：太太都係做呢行（任職形像顧問）、會體諒，但完全見唔到人，返親嚟又死魚咁，hard feeling一定有，不過凡事有得必有失，依家有小朋友，希望盡量取得平衡，因為有啲嘢錯過咗就係錯過咗。
周：點解會拜冼灝英為師習武？
黃：以前我個人好物質，嚿錢未到手，已經訂定隻手錶，冼灝英帶俾我一啲唔使錢的娛樂，行山、打功夫都已經好開心！而且放假做運動，就係為儲定啲quota留番開工嗰陣消耗。
周：有咩令你由着重物質到可以放開物質枷鎖？
黃：我依家都想買嘢、買心頭好當然會開心，但唔會覺得唔買嘢會死囉！有次喺公司見到有條友演技麻麻，但揸波子（保時捷跑車）返工，個心真係會藐、會諗「好心你做好啲戲先啦！」究竟我用二百萬買架車開心、定留二百萬喺袋開心呢？依家嘅我會覺得拍套劇收視高凌駕於一切！
周：演藝生涯難以預計，對前路有冇憂心？
黃：做人嘅嘢，係有危機先會諗；現實啲講，可能依家仲有個位置，所以唔會去諗。我自問能力好低，時間已經唔夠用， 一心二用搞生意，一定會影響拍劇，既然依家有機會、我又有興趣，點解唔全副心力去做？
為迎接幼子出生破天荒請三個月大假，亦因而修補了跟大仔的關係，「以前我唔敢單獨帶個仔去街，一定要太太喺身邊，依家冇太太喺身邊都OK，終於可以獨立同個仔去做一啲事。」
靚仔冇用
周：結婚7年，同太太仲有冇浪漫時刻？太太有冇嫌你悶？
黃：嫌咗好多年！我啲生活直情悶到爆！太太鍾意試唔同嘅食店，但我成日食茶餐廳、唔會試新嘢，老婆都話：「你拍拖嗰陣唔係咁㗎！」我答佢：「個個男人拍拖嗰陣都唔係咁㗎啦、嗰陣媾緊你吖嘛！」不過我覺得間中都需要試新嘢嘅！所以依家通常約埋朋友、等朋友介紹。
周：相處上，係咪太太遷就你多？
黃：佢遷就我多啲！淨係佢放棄咗佢嘅夢想，我仲可以追逐我嘅夢想，都已經係啦！
周：佢嘅夢想係咩？
黃：佢想開畫展，佢其實喺加拿大美術學校Emily Carr Institute 讀油畫，即係Wing Shya（夏永康）讀嗰間，一年只收幾個中國人、同埋事業上都想再闖，但依家要照顧兩個仔，時間上唔容許。
周：太太出身自富有家庭，有冇壓力？
黃：我太太同佢屋企人嘅經濟完全獨立，想當年佢讀書都係自己做part time賺零用錢，因為佢爸爸比我爸爸嚴厲十倍。我外父覺得管教嚴、將來子女去到邊都生存得到，所以我太太被訓練到好tough，成個花園嘅草佢可以一個人剪晒，砌櫃、換燈都識做，呢行嘅人都知佢好辣、導演有唔啱佢一樣照媽叉！
周：考慮再生小朋友？
黃：唔好嘞，搞唔掂！先唔講經濟問題，而係分配唔到咁多愛！好彩依家大仔好錫細佬，平時明明好粗魯，但會偷偷地好細力錫細佬一啖、笑一笑跟住行開，幾難得、亦都係我所希望。
周：覺唔覺得自己靚仔？
黃：五官端正，當然我唔可以話自己樣衰，但依家國內十幾億人，靚仔周街都係啦！我覺得喺呢行靚仔係冇用，現實啲講，女仔唔靚做唔到一線，但男仔唔靚都做到一線！依家作為演員，最重要遇到好角色、觀眾有共鳴，同睇到你擺咗幾多心機演繹，樣貌反而係其次。
Lelia大讚浩然有自制力兼深明娛圈遊戲規則，他卻直言日後的事沒人敢保證：「唔係㗎、好難講，可能突然唔識諗都未定！」
嘉穎驚我瀨嘢
周：點對抗誘惑？
黃：維持一段婚姻好難，嚟緊可能會返內地發展，好多人提醒我小心，尤其嘉穎特別提我：「兄弟，你有老婆真係要小心、分分鐘瀨嘢！」今日我到接受你訪問呢一刻都好想維持家庭直到永遠，但可能兩個禮拜或者兩年後，我拖住第二條女被影到都唔定，人嘅嘢好難講、好難去promise！
周：真係要發生，其實喺香港都可以發生㗎！
黃：呢方面我唔係太大癮！我個人幾避忌，如果唔係有熟朋友或者經理人在場，夜生活我盡量唔出席，就算應酬而要飲酒，我都係點到即止，亦都杜絕咗有人挨埋嚟影張相，難聽啲講，真係有嘢就話啫，否則俾你挨埋嚟影張相我咪好唔抵！而且出去夜蒲飲酒消費，俾千幾、二千蚊飲支只係值二百蚊嘅酒，除非為食女啫，如果唔係有目的，同朋友喺屋企飲咪得囉！呢行做嘢咁辛苦，值唔值為咗呢啲嘢一鋪清袋呢？
(第806期《東方新地》)