我行我素的樂基兒自與黎明結束四年夫妻關係，即失去黎明這條大水喉，冇跑車揸冇豪宅住，生活頓時打回原形，上周為搵錢貼老外焗暫別Cuz回港出席收錢活動，卻要入住賓館級數的廉價酒店，認真折墮！

(第808期《東方新地》)

離婚住四季

滑水曬得一身性感蜜糖膚色的Gaile，上周三（29日）晚11時，乘坐以平價見稱的香港航空班機由印尼峇里返抵香港，以往貴為黎太，司機、七人車、助手任用，如今失卻黎太光環，只好租用七人車接載，自己落手落腳搬行李，租用的七人車其後直駛西環以價廉見稱、房價只需$700一晚的隆堡滿景酒店，離婚時被黎明安排入住五星級四季酒店，由天堂跌落地獄，當然唔慣，甫見大堂，即時扁嘴，發出多聲「jip jip」聲，擾攘一輪，要女友人多番安撫，才終於接受現實上房。

黎明斷糧 身家冇份 樂基兒cheap住賓館 折墮！

齋睇冇買

翌日（30日）中午，睡眼惺忪、臉上仍有睡痕的Gaile，偕金髮女友人到中環dragon-i酒吧，無酒不歡的她，點了$188一位的任食點心及每人一杯白酒，以英語一輪嘴狂呻，隱約聽到說了多次「money」及「shit」，坐足兩粒鐘，終捨得離開。兩女其後轉到Joyce、Harvey Nichols等名店，Gaile對一對逾萬元的搭帶涼鞋相當感興趣，但當售貨員行近，即尷尬彈開，行近兩個鐘，結果都是運桔齋睇冇買！

傍晚Gaile履行是次回港任務，現身中環四季酒店出席護膚品活動，拒絕回應跟新歡Cuz拖手及閃婚傳聞：「感情事、私事都唔答。我同Leon已分手，我同任何人拍拖都唔關任何人事。」但就博同情稱在香港冇「家」：「我喺香港冇屋企，得美國先有！好慘！你哋可憐吓我啦！」問到會否選擇定居香港，她說：「香港係一個開心地方，俾咗好多嘢我，但我未必當係屋企。」

棄贍養費換自由

本刊收到可靠消息，Gaile為離婚換取自由，簽下內容不能公開的離婚協議，唔分黎明一毫子身家，知情人說：「影到佢去峇里會個鬼仔，又唔係老公要求離婚，佢惟有提出一毫子身家同贍養費都唔要，盡快換取自由！」Gaile雖跟黎明經理人陳善之維持經理人關係，但卻不獲安排接job，坐食山崩下，惟有靠自己越洋平 job，知情人說：「喺峇里滑水飲酒，生活雖然樸素，但一個養兩個，日日燒銀紙，有人以佢唔喺香港做理由幫佢推job，惟有焗住聯絡相熟品牌監平接job搵錢。」難怪被本刊發現住平價酒店、用過季手袋、電話爆芒不捨得換以及同友人首飾兩份戴。