前助導出書爆TVB血淚屎 明寸林峯吳卓羲

無綫一台獨大,不少幕前幕後員工就算被公司欺壓,往往也因為要保住飯碗而敢怒不敢言。不過,近日有位化名為偽文豪的無綫前助導(PA)出書數臭無綫,大爆無綫黑幕及如何刻薄!在《TVB血淚屎》中,偽文豪又大爆無綫小生「Chok峯」及「臭蝦哥」經常爆粗鬧人,臭蝦哥還嫌替身周身汗臭趕人落車極冇品,明寸林峯及吳卓羲。至於陳志雲、廖啟智及艾威為其新書寫序幫拖,無懼得罪無綫。

化名偽文豪的無綫前助導,去年開始在facebook狂數無綫而引起出版商注意,力邀他出書。在偽文豪下周一推出的《TVB血淚屎》中,不少內容是轉載其fb內容,其中偽文豪大爆07年在無綫任職7個月PA時的辛酸史,他更強調是百分百真確。內容包括日日做到天昏地暗沒有私人生活,導致女朋友離他而去,還要日日被人粗口問候,又指有同事兄長過身,無綫竟然只准同事放兩日喪假兼即刻返工。拍古裝劇《大冬瓜》時,明明清楚註明要唐狗作道具,但無綫有人卻找來金毛尋回犬頂上,十分求其。

明寸林峯吳卓羲 志雲出手幫拖 前助導數臭無綫

電視台得七成好人

不過,偽文豪除大爆無綫如何刻薄外,最叫人感到興趣的,是他以揞名形式大爆無綫小生「Chok峯」爛口及「臭蝦哥」如何無品。偽文豪指在7個月的PA生涯中,曾參與的劇集包括由林峯、吳卓羲及馬國明等主演的《少年四大名捕》,以及廖啟智、陳錦鴻及蘇玉華主演的《大冬瓜》,曾有一位唱過《別怪蝦》的小生「臭蝦哥」,對住監製時如比卡超對主人般非常溫順聽話,但一對住其他人則化身囂屎男大講經典奸佬對白。偽文豪指一次服裝姐姐幫臭蝦哥着古裝衫時,不小心拮親他,臭蝦哥即大聲爆粗說:「好X痛呀!」之後全程黑口黑面。

偽文豪又爆臭蝦哥嫌棄替身,極之無品:「佢(臭蝦哥)呢種演員咁識做戲,又身嬌肉廢,所以武術指導幫佢搵咗個替身,幫佢處理一啲較難動作場面。拍完後,個替身跟埋我哋一齊坐服裝車走,由於那位替身幫完臭蝦哥打咗一輪,所以身水身汗,以致車入面都可以聞到佢陣汗味,架車行咗一陣之後,有一工作人員要在某處落車,臭蝦哥突然大大聲話:『喂!啲臭人唔該落車先啦,好很臭呀!』」除臭蝦哥外,偽文豪又大爆「Chok峯」爛口:「你是個不錯的人。除了粗口比較勁,有時講嘅嘢有啲刺耳之外,你個人都算冇咩架子,係一個正常人,不過麻煩下次唔好一見我就問候我媽媽。」雖然偽文豪未有開名,但主人翁吳卓羲及林峯已幾乎呼之欲出。

在新書序言中,偽文豪謂:「呢本書除咗娛樂讀者,利用我悲慘嘅經歷畀大家消費兼嘲笑之外,我想表達嘅,係電視台嘅惡性文化如何一代一代循環:高職位虐待低職位,然後當低職位晉升高職位,便開始虐待低職位……喺我接觸到嘅電視人裏面,有70%係好人,有30%係PK……」最後,他還向無綫「致敬」說:「食X啦你!」

志雲:有啲可能係事實

另一樣引人注意的,是《TVB血淚屎》竟邀得無綫前總經理陳志雲寫序,記者昨致電志雲,原來他不認識偽文豪,只是由商台《1872遊花園》前主持阿Bu提出幫手。難道不怕得罪無綫?志雲說:「唔怕!佢(偽文豪)睇到、佢講嘅係咪事實我唔知道,有啲可能係事實,有啲可能係創作,有種物體叫faction,事實撈埋一啲創作小說,我就由呢個角度去睇,一來係我前同事推介,二來作為一個年輕人,佢想寫一本書娛樂吓大家,又無妨呀,雖然佢寫嘅嘢我唔係完全睇得懂。任何人肯出一啲力去創作,我諗我哋喺呢個行頭都應該支持吓。我相信佢裏面有啲創作空間喺度,增加娛樂性,大家唔好對號入座,當一本娛樂消閒書、睇吓得啖笑。」

不過艾威昨日透過電話回應:「其實我唔識佢㗎!係出版社叫我幫手咋。對方出書爆料我都好支持,有啲嘢一定要發生嘅,撳都撳唔住。」馬國明昨日接受訪問時,覺得只係小事一樁,仲話:「娛樂圈嘛!咪當故仔咁睇。(話「Chok峯」成日爆粗?)我都會講(粗口)啦!冇乜特別啫!」談到他是「偽文豪」少有稱讚好的藝人,馬明笑言:「自己都做過新人,都要畀機會佢哋,有機會就幫吓,不過有時見到佢哋冇心機,我都會鬧㗎!」

【是非滿瀉】

公仔箱向來是非多多,如果要爆料嘅話,可能出本特刊都講唔晒,關仁就精揀四單最爆嘅同大家share住先。

「魚仔」屎橋立官威

「魚仔」入咗公仔箱之後,權力慾越嚟越大,由於過往頒獎禮啲姐仔哥仔攞獎,只係多謝「假姐」同「數毒」,好少人會多謝魚仔,因為平時同佢冇乜接觸,佢江湖地位又冇假姐同數毒咁高,所以魚仔度咗條屎橋,就係要約見全台藝人見面傾偈,喺班藝人面前擺番個姿態。關仁聽聞佢想做「大帥」之前個總經理位,所以樣樣都要管,又藝人又工程部,其實做咁多嘢,無非為做總經理鋪路囉。

「蚌姐」當正老闆娘

電視台姐仔「蚌姐」恃住同高層嘅關係,當正自己老闆娘,氣燄真係好勁!幕後工作人員爆料,蚌姐當正自己係老闆娘咁,遲到早退已經係慣常事,連監製導演都唔敢哼一聲。話說有次蚌姐對劇本好有意見,要求導演照佢意思改動,其他演員啲對白自然受影響,有位甘草原本有戲變冇戲,等咗成晚又話可以收得工,自然唔多高興,不過佢知人哋把口大,只好吞聲忍氣,真係好慘囉!

「大木偶」帶頭玩扭計

拍咗套《門當戶對》而攞獎嘅「大木偶」,如果你以為佢攞獎而升呢嘅話,咁就大錯特錯,事實上一直以嚟,好多人聽到佢個名都走夾唔唞!呢位阿姐氣燄逼人,聽講佢嗰陣幫《門當》做宣傳,好似有啲場面諗住係幾個主要演員跳舞,但係呢位阿姐唔單止唔肯,仲要叫埋啲拍檔齊齊say no,結果要為佢改晒啲內容,最慘係好多藝人都跟風扭計唔跳,好多幕後都有冤無路訴!

「韻律泳」狂鬧人出氣

做爛仔做到出位嘅「韻律泳」,不時俾人影到佢同啲女仔出雙入對,每次有親呢啲新聞,梗有記者問吓佢啦。唔知係咪身有屎,抑或唔忿氣次次俾啲女擺上枱,呢位阿哥俾人問親呢件事,塊面已經燶燶哋,不過喺記者面前,佢梗係唔會發脾四啦!跟住活動尾聲,又有人搵工作人員去搵佢出嚟,雖然佢最後都有出嚟答兩句,但係一擰轉背就狂鬧個工作人員出氣,仲走去人哋部門投訴㖭!

衰嘢難冚:惡啃十事例

1.大爆藝人「Chok峯」為人冇架子,但愛講粗口,經常問候他母親。

無綫前助理編導偽文豪大爆在無綫工作的辛酸史,盡訴心中怨恨之餘,亦揭露藝人的真面目。

1.大爆藝人「Chok峯」為人冇架子,但愛講粗口,經常問候他母親。

2.「別怪蝦」(臭蝦哥)與替身拍劇後坐同一架車,臭蝦哥嫌替身一身臭汗,竟大嗌:「啲臭人唔該落車先啦!」

3.道具部做事求其,有次拍古裝,道具紙明明寫上要求「唐狗」,但最後搵來一頭金毛尋回犬。

4.有服裝姐姐不慎用大頭針拮到「臭蝦哥」,臭蝦哥爆粗「好X痛」。

5.做PA,有開工時間,冇收工時間,人工低,加班冇補水,當日冇被問候家人已是福利。

6.曾有PA有親人逝世,但公司只准請兩日假,雖然同事很難受,但都要接受。

7.有次與導演到canteen食飯,導演卻說:「你仲坐喺度做乜X嘢!」要他為其斟茶。

8.PA的休息室似監獄,一進去,好像有十個沒刷牙的人向你臉上吐氣。

9.見有競爭對手就不擇手段阻撓對方攞牌。

10.寫rundown就似地獄,經常因為rundown而被鬧,偽文豪舉例:「張學友用雕花的冬瓜盅打劉德華」的場面,遷就到劉華,學友未必會like。