在無綫捱足六年，沈震軒去年泊到Paco這個大碼頭，由三線傍友躍升做男主角，早前更以黑馬姿態奪勁歌新人獎，接森美捧做男神，對手是女神倪晨曦、高海寧，「發夢都估唔到Paco會簽我，我常提醒自己有機會就要去盡，現在拍戲可試不同角色，跟發哥拍戲，你可以學到好多，剛完成的新劇《大藥坊》演大奸角，角色發揮好大，算是一個新挑戰。」30歲仔終於行運，沈震軒坦言做人要夠堅持才能成功，「娛樂圈這口飯不易吃，只要有人肯畀機會一定會好好珍惜。」

你有聽沈震軒唱《一天一天等下去》嗎？堅係好聽過原唱，還有那首Paco為他打造的新作《講多變真》，唔怪得Paco揼本捧佢上，如今歌影視三線發展，一切來得快又癲，「自己一直好擔心，未出碟就攞獎會否有閒話，但後來諗通了，那個獎是大家給我的肯定。」沈震軒說，事實是你唔唱得Paco都唔會捧，亦唔會再整首新歌《失愛》畀你。

不再靠邊站

捱住上，02年沈震軒終憑《喜愛夜蒲2》中的「蘭桂坊USB」一角彈出，有份角逐金像獎最佳新人，及後更獲Paco賞識欽點埋位，有後台撐，沈震軒在TVB的地位亦日漸提升，角色戲份亦愈來愈重，「《大藥坊》是一個很新的嘗試，第一次在劇集中演大奸角，好多謝監製徐正康咁信任我，給我一個咁好的角色，是由頭帶到尾，要拿捏得好準有一定難度，早兩日拍完就即刻要開《使徒行者》，接森美的角色做卧底，跟敏之有好多對手戲，晚晚收工就要讀劇本做功課，唔想畀人覺得我玩玩下唔在乎。」

昔日被人當草，拍劇永遠靠邊站的沈震軒坦言從不理會別人目光，他說：「做好自己囉，我成日講笑咁話，你今日無，唔代表你將來無，當初入TVB真係得6000元一個月，交租搭車都唔夠，有時要同朋友借錢開飯，又試過為買盒平價叉燒飯由行幾條街，有劇拍已好開心，甚麼角色都做，在TVB就係咁，要捱的，現在搵到錢，我會請朋友食飯，有導演搵我拍戲一定拍，每個機會都會好珍惜。」

沈震軒被打造成男神，如今歌影視三線發展。