失蹤多年，一度盛傳已在加拿大剃度出家的46歲王祖賢突然「膠現」香港，經典「小倩」走晒樣，全民同聲一哭！連曾演「聶小倩」一角的徐熙媛（大S）都勁失望，以哭泣公仔符號訴心聲。不過邁向40，谷盡34C「湯碗胸」為醫學美容做宣傳大使的孫佳君就挺身為王祖賢講句公道說話，「娛樂圈邊個唔整吖？話唔整就呃你啫，最緊要係靚！好似大S、吳佩慈咁，佢哋都愈變愈靚啦！」息影十年的孫佳君依然夠辣，一招連消帶打，五十步笑百步之流速速冚旗。

暑假將完，o靚模返歸冬眠，取而代之的是「中女系」抬頭，繼年初息影16年，45歲的3級艷星葉玉卿復出接拍邵氏賀歲電影《2013我愛HK恭囍發財》大跳扭腰蛇舞後，「20對」熟女袁潔瑩、李若彤、李麗珍、陳慧珊、張慧儀、葉蘊儀及陳秀雯等統統回歸，陸續登場，就連失蹤多年，46歲的王祖賢都「面目一新」蒲頭。僧多粥少，熟女們想突圍唔容易，48歲失婚羅霖就選擇豁出去，在處女電影《愛‧尋‧迷》中跟細自己18年的小弟弟關楚耀大玩激烈牀戰，男方還會向其胸部及敏感部位進攻，羅霖還會露股，單親媽媽不易做。

渴望尋第二春

至於作為兩子之母的孫佳君，以索爆單親媽咪姿態強勢出擊，最近便身穿噴血比堅尼谷34C「湯碗胸」，還附送修長美腿為醫學美容出任宣傳大使，輕鬆穩袋6位數字。雖然30有9，但其34C、24、33魔鬼身材十年如一日，跟昔日「星女郎」比較完全冇走到樣，保養得宜，她坦承曾打過Botox，有需要亦唔介意執一執：「最緊要係靚，女人係要keep，唔係點做索爆黃金盛女呀？我都希望仲有第二春，不過凡事適可而止，唔好追住打變成硬膠人。她笑說：「當年覺得自己好樣衰，但家陣翻睇以前啲相又覺得幾索，其實娛樂圈有邊個唔整吖？話唔整就呃你啫，大S、吳佩慈都靚咗好多，女藝人要出鏡，最緊要係愈變愈靚啫！」 相隔多年冇着過比堅尼亮相，孫佳君唔認係「博老命」！她說：「呢啲係碎料啫，其實夏天我會keep住着三點式去沙灘游水，睇下書，曬下太陽好爽呀。因為成日游水，基本上可以着得番以前嘅舊衫，身材冇乜太大改變，都算係安慰。」

替DaDa感可惜

千帆過盡，孫佳君坦承人生最錯的決定是在黃金時間裏選擇了家庭，其實她只愛工作，家庭不是她那杯茶：「所以我唔主張陳靜(Da Da)退出，佢好有天份，喺佢未獲獎前已睇好佢，而佢所做嘅事又有迴響，應該好好珍惜，如果壓力太大，咪請假休息吓囉，唔使退出咁大件事。至於之前o靚模為出位凸點兼漏M？我覺得好好笑呀！」未來她最想多拍電影，隨住年紀增長，她反而可以豁出去，突破自己的框框，更事先張揚，如遇到一級導演、演員同好劇本，她願意冇底線，冇上限作全祼演出，並揚言有能力自己照顧自己，就算冇男人投靠都唔怕！

傳奇一生

95年，孫佳君與擁20億身家的「神童輝」羅兆輝拍拖，被對方喻為「一生最愛」，當年一張兩人的法式濕吻私密照轟動全港。後與富商男友生下兩名兒子，2009年報稱遭富商男友在壽山村道豪宅內毒打，二人對簿公堂後和解。去年孫佳君宣佈復出，跟英皇簽約3年，先後拍了《重口味》和《微交少女》兩套電影，闊別影壇10年，但無損「戰鬥力」！