現年38歲的影后李心潔與48歲導演彭順結婚短短四年，婚後生活表面上無風無浪，怎知幸福原來只是假象！大前晚彭順被發現背妻偷食斷正，公然拖曾任「SING之天使」的o靚模李悅彤到圓方睇戲，兩人肆無忌憚當眾拖手、啜嘴、搣胸、搭膊、攬腰，之後直落返將軍澳愛巢，彭順全程當老婆李心潔冇到！

憑彭氏兄弟電影《見鬼》榮獲金像獎和金馬獎雙影后的李心潔，於10年嫁給導演彭順，不介意對方已育有9歲女兒，愛情至上的李心潔甘為後母，婚後主力做好人妻角色，每年只拍一部電影，生活低調；相反彭順婚前已有偷食前科，於07年被踢爆與o靚模羅凱珊（Kama）夜蒲中環，最後更帶飲到啤啤夫的Kama到佐敦尋開心。以為彭順婚後會修心養性，怎知大前日傍晚約6時許，記者發現彭順現身圓方，與o靚模李悅彤（Liddy）密會。

■彭順和李心潔結婚四年，怎知幸福卻是假象。資料圖片

【錫錫】
■彭順和o靚模Liddy排隊買飛時，Liddy突嘟嘴索吻嗲到暈。

【啜爆】
■彭順大前晚背住老婆李心潔，拖實o靚模Liddy在圓方公然啜爆，偷食斷正。DV圖片

嘟嘴索吻餵爆谷

現年26歲的Liddy比彭順後生22年，兩人齊齊到戲院排隊買飛睇《香港仔》，其間Liddy向彭順大施嗲功，突然嘟嘴索吻，彭順望一望她怕尷尬冇反應，她不甘被無視，死纏望實他半分鐘，彭順投降與Liddy啜嘴，入場前兩人買了一杯汽水和爆谷，她再發功餵彭順食爆谷，旁若無人。

【餵食】
■兩人買了一杯汽水兩份飲，Liddy還餵彭順食爆谷。

【拖實】
■睇完戲後，o靚模和彭順玩人肉拉筋，旁若無人。

約8時許散場後，兩人各自去完洗手間，Liddy跳跳紮走向彭順，兩手拖着他玩人肉拉筋，被冧到暈的彭順再情不自禁啜了她一啖，她即發出得戚甜笑，之後兩人在圓方覓食，最後揀了稻成亞丁京川料理撐枱腳。飯後兩人意猶未盡，搭的士到尖沙嘴iSquare逛街，彭順搭着Liddy膊頭步入HMV，其間兩人打情罵俏，彭順扮向她揮拳，她即施擒拿手搣胸，他們買完DVD後再去便利店買飲品，之後雙雙搭的士返將軍澳日出康城寓所。

【搣胸】
■在HMV買影碟時，o靚模突施擒拿手向彭順搣胸。

【攬腰】
■彭順攬實o靚模Liddy在便利店入貨。

據知，近年李心潔長居馬來西亞照顧繼女，留港籌備電影的彭順有空才會返當地探妻女，兩夫妻長期分隔異地。對於背妻啜女斷正，彭順昨接受電話訪問，緊張問：「你哋影到啲乜？朋友睇戲啫，只係普通朋友。」記者問普通朋友都錫嘴拖手？他口窒窒說：「有錫咩？」問將軍澳寓所是否Liddy的屋企？有否過夜？他吞吐說：「應該係佢屋企，冇過夜。」

■啜爆彭順的o靚模Liddy（中），曾擔任《耳分高下》的SING之天使。資料圖片

認與老婆少見面

問彭順跟老婆李心潔感情是否冇變？他說：「冇變，但工作少見。」有否跟老婆交代約女睇戲？他說：「冇，睇戲啫。」問他是否依然愛太太？他說：「唔回應住。」記者再追問，他才答：「係囉！」他自爆該o靚模叫Liddy，將會拍戲，但不是自己開戲給她，問二人怎樣認識？他拒答：「唔好問呢啲嘢住。」Liddy曾在無綫節目《耳分高下》擔任SING之天使「檸檬」，曾推出歌曲《幸福頭像》。而李心潔的經理人則表示不回應。