人生如拍到《新不了情》 敖嘉年:死而無憾

無綫金牌監製李添勝破格泡製的懷舊科幻懸疑劇《神探高倫布》,在收視低迷下,今周終於進入結局篇,敖嘉年希望觀眾畀埋最後機會《神》劇,並作最後控訴:「好唔公平,鬧就大把人講,讚就冇人報道!」

在《神探高倫布》飾演「包平安」的敖嘉年,滿腹怨氣,聲言要趁該劇大結局在即,為《神》劇平反,他忿忿不平說:「呢部劇引起好多迴響,但我覺得唔公平,網民批評、鬧,大家就大肆去講,大篇幅報道,其實我喺網上睇到,亦聽到好多市民稱讚嘅聲音,不過,讚就冇人報道。」

鍾意拍古靈精怪劇

不過他亦冷靜地分析該劇問題所在,敖嘉年分析說:「睇劇本時我好鍾意呢個故事,可能劇本可以翻睇,但觀眾只要冇咁留心就會錯過某啲情節而睇唔明,的確係好超現實,觀眾一時之間接受唔到啫。」

以後還敢拍另類創新劇嗎?他理直氣壯即答:「敢!點解唔敢!我鍾意拍古靈精怪劇,幾Buy呢個劇種。」

他說其實有一部戲好想拍:「就係《新不了情》,人生如畀我拍到一次《新不了情》,我既人生就心滿意足,死而無憾!人生唔想遇到《新不了情》咁苦,但做戲就可以試下遇到。」女主角他選陳法拉:「法拉有活潑純真味道,又有重病時的苦情。」

但亦有一部戲,他一定冇膽量去拍,亦唔敢去拍,他敬重地說:「哥哥(張國榮)同梅姐(梅艷芳)既《胭脂扣》,張國榮『十二少』的風流倜儻;梅艷芳『如花』的滄桑、風塵味,冇得頂!『十二少』我真係唔敢演,『如花』我亦諗唔到邊個可以代替梅姐。」

熱愛唱歌欣賞學友

敖嘉年熱愛拍電視劇,原來他瘋狂熱愛鍾意唱歌,講到唱歌,他兩眼發光:「我真係好鍾意唱歌,我唱得吓!成日喺屋企玩唱歌,我有個喇叭仔、簡陋咪高峰,不過o依家先唱下電視劇主題曲,出唔出到唱片隨緣喇!」

歌星之中他最欣賞張學友、蘇永康、林憶蓮,還有已故的陳百強,尤其陳百強創作的金曲,他最為仰慕:「陳百強把聲好簡單,但好有力,佢作嘅歌長青不舊,以前嘅歌手真係好厲害。」

人生如拍到《新不了情》 敖嘉年:死而無憾

文、攝:山葵
化妝:Eleena Yu@agogo image
髮型:Philip Lee@HAiR
服裝:LUXE TUXEDO LIMITED