現年47歲的當紅監製、導演錢國偉（Wilson）經常有女埋身，最近終於修心養性，準備明年迎娶傳緋聞傳足傳6年，前年才承認拍拖的「雜果賓治」女友陳宛蔚（Calinda）。據悉今年7月Wilson到美國做Big 4登台騷，女友亦有隨行，Wilson趁機送上驚喜，在眾好友配合下送上鮮花及3卡戒指跪地求婚，Calinda喜極而泣答應。

不過Wilson最近忙到不可開交，拍住周星馳開戲，經常要中港兩地飛，還未有時間籌備婚禮事宜，連雙方家長都未正式見面，故兩人一直好低調，未有公開婚訊，只有鄭伊健、錢嘉樂、曾志偉等老友知道。

其實Wilson想結婚早有蹟可尋，8月尾Wilson才被影到與女友結伴到睇天晉IIIA示範單位。陳宛蔚最近出席活動亦不避嫌戴上求婚戒指，幸福滿瀉。記者致電Calinda講恭喜，她狂笑說：「吓？哈哈哈……遲啲先算啦！」婚禮是否籌備中？她說：「等佢返香港先，佢好忙，工作期排到明年中呀。」是否有結婚打算？她說：「一切隨緣啦！佢份人好好，工作有魄力，識尊重老人家，又錫小朋友。」而錢國偉接受電話訪問時，被問到是否與女友陳宛蔚結婚？他說：「唔係呀，出年先啦。」至於有傳已求婚？他就說：「求咗都可以擺幾年㗎嘛，唔好寫咁大啦。」