錢小豪跟前妻郭秀雲所生的兒子錢景峰，早已隨繼父龐傑姓，改名為龐景峰，但畢竟遺傳父母的演藝細胞，有意入行的他，早前更辭去美國的銀行工作，簽約韓國唱片公司。對於龐景峰現時長駐新沙士肆虐的韓國，錢小豪非常憂慮，肉緊表示：好擔心！

24歲的龐景峰多年前已想入娛樂圈，媽咪郭秀雲亦曾出手，周圍拍門為兒子物色經理人，一度在《Elite》掛單做模特兒的他，最後索性到美國修讀電影課程，可惜畢業後依然苦無機會，但龐景峰未有死心，留在洛杉磯邊做銀行工，邊碰運氣。幾經努力，大半年前，龐景峰終於成功叩門，簽約韓國唱片公司，並飛到當地，接受特訓。

拍《潮拜武當》再孭正男一的錢小豪人氣回升。

「雖然繼父鋪路想Andrew（龐景峰）做銀行家，但佢由始至終都想入娛樂圈，所以屋企人都唔想太勉強，話俾幾年時間佢試吓。Andrew之前個女友Mirae係韓國人，所以基本韓文應對唔成問題；今次簽到韓國呢間唱片公司係朋友搭路嘅，公司安排嘅特訓好密集式，除咗學唱歌跳舞，仲要操肌，早前仲去咗美國錄音。」知情人說。

錢小豪跟現任妻子丘倩鳴所生的兒子錢穎德關係親密，力谷囝囝十八般武藝皆能。

郭秀雲改嫁龐傑後，她跟錢小豪的兒子隨後父姓龐，改名為龐景峰，父子關係疏離。

龐景峰出碟有望，不過跟生父關係疏離，錢小豪亦直認未聞大仔入行，對於他身處新沙士肆虐的韓國，更感震驚，「根本唔知佢去咗韓國！」至於是否擔心兒子有感染新沙士危機，錢小豪說：「都好擔心！好耐冇同佢聯絡，唔知佢入咗娛樂圈。我得佢手機號碼，會搵佢傾吓，但都支持佢，祝福佢！」

之前在美國任職銀行時，龐景峰回港也打扮穩重。

早前去了美國錄音，龐景峰將新歌 demo同朋友分享，被大讚歌喉不俗。

近日染金毛變身韓仔 look，龐景峰韓味濃！

狂谷肌練大隻，唱片公司打算將龐景峰打造為勁舞型男。

以前跟Mia拍拖去台灣時，二人將密照放上網。

龐景峰在fb上載圖片，自爆曾造訪韓國的表演藝術中心。

楊埕及女友人去韓國探訪龐景峰，只見一頭金毛的他愈來愈有星味。

今年24歲的龐景峰，先後跟嫩模陳靜（Mia）及蕭美卡（Mika）拍拖，10年，在英國讀書的他放暑假回港期間，與模媽陳靜儀（Mia）撻着，並因而跟拍拖兩年的女友分手，其後有指郭秀雲棒打鴛鴦；分手後，隨即搭上另一嫩模蕭美卡，二人拍拖半年便散，女方更公開大數前度小器、大男人。赴美修讀電影後，在當地結識韓籍女友Mirae，去年回港過聖誕時，他被發現跟退選港姐楊埕夜蒲蘭桂坊，但二人否認拍拖。

同蕭美卡曾打得火熱。

去年被爆跟楊埕撻着。

錢小豪郭秀雲爆糾紛

有報道指郭秀雲不滿錢小豪不單未有照顧兒子，卻借兒子入韓國樂壇「抽水」宣傳自己，她接受訪問時爆錢小豪多年來「連一蚊都無畀」，她說﹕「法庭要求他每個月付象徵式一蚊，但他沒有畀，我亦沒有要求，但我認為他應該負起這個責任！」錢小豪對此直認﹕「我沒有付過一蚊，但要聲明，我不是不養！我想負起責任，但她說不需要。（有否主動提出負擔兒子的生活費？）沒有，當時見個仔好難，跟她也溝通不來，只好集中精力照顧自己的家庭。」他否認借兒子「抽水」，他根本不知兒子要做歌手，是記者告訴他的。對於兒子被指「花弗」，郭秀雲回應：「Andrew好單純，佢睇落係麻鷹，但係麻雀，佢唔係溝女大王，係女仔主動溝佢，佢依家好努力唱歌，花兩個月時間練呼吸先去錄歌，佢係有下苦功。」