大熱劇《衝上雲霄II》將於本周日播映大結局，Sam哥、Cool魔與Holiday這段三角關係，早已成為茶餘飯後的熱話。成熟穩重與浪漫激情，兩種截然不同的性格，的確令人難以抉擇。雖然Holiday最後與Sam哥成為一對，但現實中演Holiday的陳法拉，卻大唱反調偏愛靚仔，仲話有信心可以憑自己去改變對方，看來小妮子在感情上有點好勝哩！

撰文：Niki Chan、恩｜攝影：Barry

場地：香港九龍東皇冠假日洒店｜美術：Ronnie Cheung

愛情Q&A

由於後期剪片問題，令《衝上雲霄II》劇情發展有點古怪，就好像Cool魔風流變情痴、Holiday與Sam哥突然撻着等，搞到張智霖都在微博上表示不滿。不過法拉解釋：「其實監製由最初開始已經有鋪路，鋪排了好多他們兩個人之間的緣分，他們的感情看似淡淡的，但細心睇，會發現他們兩人其實一直經歷了很多磨練，亦都有幫彼此解開很多心結。」

法拉自認跟戲中的Holiday同樣敢愛敢做。戲中她選擇了成熟的Sam哥，現實中的她則表示兩個都鍾意，她解釋：「感情無完美，要互相遷就同溝通，如果真係好似Jayden咁又靚仔又浪漫，係女仔都暈啦！但如果似阿Sam咁成熟穩重都幾好。」話雖如此，但鬼妹仔性格的法拉亦坦言：「其實Sam都悶，我會希望自己能夠改變Jayden，或者到某一日佢會成長到好似Sam哥咁穩重呢！」

與Tom Cruise緣慳一面

要演繹一名女飛機師，在拍攝時必須記下大量的專業名詞，這絕非易事，尤其是今時今日的觀眾，對劇中場景、服裝、對白或咬字的要求都非常嚴謹，但這一切對於法拉來講，竟然輕而易舉。「其實我一直對航空界都好有興趣，所以要我記專業名詞唔難，反而去揣摩Holiday依個角色所用的時間更多，因為Holiday係一個複雜的角色，佢性格會因應故事發展而變化得好快，所以自己要捉摸不同階段的Holiday，這是比較難掌握的地方。」

面對如此具挑戰性的角色，加上要與影帝吳鎮宇合作，法拉直言壓力一定有，但真正壓力竟來自鎮宇的即興爆肚，「鎮宇好專業，經佢處理過的每場戲都會爆發好多火花，而佢幾乎場場戲都會爆肚，好彩我在無綫累積了幾年演戲經驗，算是應付得來，當然我也會靜靜雞偷師，當係返訓練班。哈哈！」除此之外，《衝II》有大量外景拍攝，環境因素每日在變，所以在拍攝期間的確有點混亂，「其實拍攝期間時間好趕，有次想去一個場景拍攝，竟然撞正Tom Cruise在拍電影，又坦克又直升機，好大陣仗，搞到我們最後要改地方拍攝；最可惜就係見唔到Tom Cruise囉！」

正面面對批評

《衝II》由開拍至今仍是城中熱門話題，好評以外，亦夾雜不少觀眾投訴，又或被捉錯處等，對此法拉直言：「我認為係責無旁貸的，因為接受批評都屬於我們的專業範圍，我很感謝觀眾給予的意見，包括對Holiday的演技批評。其實我覺得都叫係好事，因為以前的媒體比較單向，但現在多了渠道，更多人可以大膽將意見表達出來。如果諗得正面點，我認為係一種動力，可以令演員有所進步。」

面對批評，法拉強調唔會選擇逃避，她更指會從不同聲音中學習成長，吸收後再去改進，亦會作自我反省。法拉又指鎮宇面對批評時，處理的手法很值得學習，「從Sam哥身上的確學了很多東西，他的話令我覺得要畀自己更高的要求，令我明白，偶然的犯錯其實是可以的，因為太擔心犯錯，就好難放開去演，會畀個框框困住自己，這樣絕對不能。我情願去挑戰未接觸過的角色，因為我唔想自己害怕去演繹陌生的角色。」雖然法拉選擇跳出電視台，踏上大銀幕，但入行8年的她，認為要時刻保持虛心、了解自己的長短處，這一點對她的演藝事業，可謂非常重要哩！

後記：人生有幾多個十年

十年前的《衝上雲霄》叫好又叫座，可是續集一等就等了十年，這次訪問中，法拉坦言覺得編劇在故事結局留有伏線，似乎想將《衝》的傳奇延續下去。不過法拉斷言《衝上雲霄》唔會有第三集，她笑指：「第一輯Sam哥都40幾歲啦！如果按照返《衝II》佢都已經50幾，再等多10年？唔通幫Sam哥擺60大壽咩？」話雖如此，但我深信一眾《衝》的粉絲，仍然會等下去，只要有好製作，再等十年又何妨？