今年初林峯奪《勁歌》亞太區最受歡迎香港男歌星獎項時，曾一度招非議。

林峯升呢《勁歌》亞太區最受歡迎香港男歌星後，繼續獲無綫力捧，今個暑假他既出碟又開紅館騷，主演新片《翡翠明珠》及孭飛新劇《摘星之旅》更於下月同期出街。 TVB加料歌影視三棲狂谷，林峯將再戰古巨基，問鼎最受歡迎男歌星寶座。

無綫與四大唱片公司反枱後，今年初即硬谷親生仔林峯升呢《勁歌》亞太區最受歡迎香港男歌星，古巨基則獲最受歡迎男歌星。不過亞太區一獎向被指為豬肉獎，最受注目的終歸是男歌星獎項，故林峯上位亞太後，無綫又谷他下半年與古巨基繼續惡鬥，爭奪本年度最受歡迎男歌星寶座。

「咁啱撞埋一齊」

本月林峯再戰紅館，明為年底樂壇頒獎禮造勢。
資料圖片

儘管林峯主演的《談情說案》才剛播映完畢，但無綫已為他鋪橋搭路，接令暑假回歸的林峯先於本月底舉行 3場紅館演唱會，開騷前會出廣東碟，而他和蔡卓妍（阿 Sa）合演的邵氏電影《翡翠明珠》下月 5日上畫；無綫下月 9日則首播林峯、黃宗澤及劉松仁等主演新劇《摘星之旅》，歌影視三路包抄。據悉他另一部夥拍楊千嬅主演的新片《抱抱俏佳人》預定 10月播映，國語碟暫安排年底推出。
對於爭奪最受歡迎男歌星，林峯日前在電話中說：「邊有時間諗呢啲嘢，做好演唱會先啦。我舊年都冇劇出，《摘》劇係同上海電視台合拍，舊年拍時已經話係世博期間播，啲嘢咁啱撞埋一齊啫。」

新劇翻炒舊橋

林峯和楊千嬅合演的新片《抱抱俏佳人》，將於 10月上畫。

至於林峯擔大旗的《摘》劇，則如短版《天地豪情》。內容講述富家子林峯與基層出身的黃宗澤情同兄弟，演林峯阿叔的劉松仁於商場戰上擊敗兄長，致兄長鬱鬱而終；林峯喪父後又逢事業重創及被黃宗澤出賣，最後他發現生父竟是劉松仁，這與 TVB現深夜重播的《天地豪情》中張家輝、陳錦鴻和秦沛的三角情仇情節似到足。
《談情說案》涉全抄宴，今次新作又如複製《天地豪情》，對此林峯說：「咁多年嚟劇集入面嘅商場戰、恩怨情仇，都係差唔多，但唔同嘅橋段同唔同嘅演員配搭，演出嚟就會唔同。」