男生圍:林峯殺入阿太區

林峯冧莊勁歌亞太區最受歡迎香港男歌星,服不服眾很難說,但他殺入阿太區一定掂。毋須去亞皆老街或太子道西,去灣仔春園街已經夠哄動,過百阿婆阿嬸 o靚妹離遠見林峯掃年貨,馬上踩油一擁而上,「嘩!林峯好靚仔呀!」

由當年一堆扁口扁面的粉團,變成今日輪廓深邃的全宇宙最靚仔,又由去年捧走亞太獎後,林峯便開始分裂,天天被東邊讚西邊踩。笑他 chok樣、整容,也罷;但對他妹妹評頭品足,他真的受不了。想家人放心,卻變了令家人傷心,銀色旅途是否依然值得眷戀,「我會重新考慮。」林峯如洩了氣的皮球,謝了。

林峯近月被封全宇宙最靚仔,與全宇宙最好打的甄子丹齊名。常變臉的林峯是 chok還是索,審美標準就因人而異了。攝影:陳俊強

林峯近月被封全宇宙最靚仔,與全宇宙最好打的甄子丹齊名。常變臉的林峯是 chok還是索,審美標準就因人而異了。攝影:陳俊強

靚仔篇

今日是年廿七,尚有三天便踏入兔年大年初一。貴為廈門地產商長子、亞太區最受歡迎香港男歌星的富二代林峯,日前一如升斗市民走入灣仔街市辦年貨,買糖果、選年花、揀賀年飾物;他邊行邊嘆熱咖啡,吃燒賣,儘管被過百阿太學生妹重重圍剿,但他絲毫沒有不自在,反而盡興蹓躂。

當然,阿太比他 high得多,連師奶手抱的小 baby見林峯也眉開眼笑;林峯錫錫, BB「咭」一聲笑出來。千真萬確的是,十個阿太九個直呼:「嘩!林峯好靚仔呀!」偶爾傳來男街坊千里傳音:「峯哥!有睇你啲劇 o架!」林峯走時,女路人喪奔成條街,捧着一盒燒賣遞向他:「買畀你食 o架。」忽然間,這位亞太男歌星就像回復當年《溏心風暴》的管家仔模樣,親切得如鄰家男孩。電視劇的威力,實在唔講得笑。

堅稱不曾整容

林峯胞妹林蔚殷(小圖)和堂妹林夏薇於近日曝光,兩人容貌均成網民熱話。資料圖片

林峯胞妹林蔚殷(小圖)和堂妹林夏薇於近日曝光,兩人容貌均成網民熱話。資料圖片

既然如此,不如解構微博熱門搜尋關鍵字─「林峯好靚仔」。林峯出道 12年,幾年前點解冇人讚靚仔?林峯解說:「呢句嘢係 EO2講先 o架,嗰時成班人當 slogan咁大聲講,因為啱啱播緊我套劇,係四四正正靚靚仔仔(指《歲月風雲》),跟住有啲同事嘅姪女、妹呀,話鍾意睇你啲劇,就係咁開始囉。」

甄子丹是全宇宙最好打,林峯則是全宇宙最靚仔,他反問:「我都唔知點解變咗咁,靚仔 TVB大把,我唔覺得自己靚,但算襟睇嘅。」眼前林峯鼻挺兜下巴,跟從前扁口扁面相距甚遠,他認同:「以前成日眼腫面腫,但我真係冇整過任何嘢。」如何變靚仔呢?他說:「我係呢一兩年先保養。我拍咗 10年劇,又懶,返屋企唔落妝,所以皮膚唔好,家要做 facial。最近有新嘅 facial幫你 firming, firm完呢邊面之後,真係呢邊瘦過嗰邊。」即是甚麼 facial?林峯說:「我唔知,因為瞌埋眼瞓咗。其實最好嘅美容只得一樣嘢,瞓。」

藝人整容漸趨普遍,林峯點睇?他說:「輕微可以接受,唔好整到唔係你,咁就冇意義。」他能接受?「輕微割吓雙眼皮啦,都好恐怖吓 o架啦。我覺得唔需要,靚嘅標準有好多種,有自己 character就夠。」

小 baby一見林峯笑開眉,原來林峯 B有一手。

小 baby一見林峯笑開眉,原來林峯 B有一手。

林峯辦年貨,師奶粉絲即瘋狂拍照。

林峯辦年貨,師奶粉絲即瘋狂拍照。

家人最後底線

林峯殺入灣仔街市阿太區,即被大批師奶重重包圍。

林峯殺入灣仔街市阿太區,即被大批師奶重重包圍。

林峯被譽為全宇宙最靚仔,早前他回廈門老家參加妹妹林蔚殷婚宴,本來這是他和妹妹人生中最開心的一天,沒料到因為其出現令妹妹容貌曝光捱批,作為家中老大,林峯既內疚又懊惱。提起此事,他即封嘴:「呢個唔再提。」他曾透過經理人微博發表感受,痛心妹妹遭牽連,語調很氣餒。

問林峯是否想離開娛樂圈?他說:「會,屋企係我底線,你保護屋企人十幾年,無端端咁樣好冇意思。最初想屋企人放心,家令到屋企人傷心,同我入行初衷唔同,扭曲晒成件事,自己會開始諗一諗。」

早年林峯父親林華國希望兒子在 30歲前接手家族生意,現在林峯 31歲了,也開始思考這件事,他有點無奈地說:「以前覺得辛苦冇所謂,出去當學嘢,但每年嘅挑戰一次比一次大,係有滿足感。如果只係關於我,自己咬咬牙就忍過咗,但如果令身邊愛錫你嘅人或者最親嘅人擔心你,甚至影響佢哋,我覺得好過份!我會重新考慮,真係唔可以再有第二次!因為對我嚟講好大件事,我唔知點樣面對我屋企人。」

他又說:「你點踩我點講我冇所謂,做得公眾人物預咗被人逼埋牆,但身邊嘅人唔係,冇必要吖嘛。」他的靚堂妹林夏薇是話劇團成員,林峯依然拒談:「唔講任何一個屋企人,唔想因為我嘅關係扯埋一齊,自己嘅路就要自己行。」

全宇宙最靚仔

感情篇
挑剔擇偶 自認神經質

近年跟林峯扯上關係的女星,只得鍾嘉欣,早前他提到嘉欣卻發惡,因為緋聞阻他媾女,他說:「個個都信以為真,你話幾大鑊。拍嘢嘅時候宣傳吓,過咗就過咗啦,我當佢妹妹之嘛。」

林峯直認曾嘗試跟圈外人發展感情,但唔 work,他說:「一來唔清楚人哋底細,二來係如果我拍拖,一定會犧牲工作或者休息時間,但又未遇到一個我一定會咁做嘅人。」他想拍拖但又驚:「試過 OK、傾得埋、合眼緣,但一接觸之後……朋友聽到話我狂追佢,所以開始驚。」

到底林峯想要一個怎樣的女朋友?他想一想說:「應該搵個識得照顧我嘅人,因為我唔係好識照顧自己。不過我好挑剔,要慢慢睇,發掘吓有乜缺點。」從前他會觀察女朋友愛他甚麼,愛他的名氣還是人,但隨着年紀增長條件放寬,他苦笑:「家搵到個就到你時間嘅都唔錯,可以忍受男朋友由朝忙到晚,返到屋企仲可能對住你都瞌眼瞓,你都唔好意思啦,所以我羨慕華仔(劉德華)。」

避靚女投懷

林峯性格腌尖,對揀女友諸多挑剔,難怪至今仍做寡仔。

林峯性格腌尖,對揀女友諸多挑剔,難怪至今仍做寡仔。

粉絲眾多的林峯若拍拖,會否願意公開?他說:「我唔會避,唔會否認,但唔會刻意講。同埋好驚,點解成日話睇定啲呢,如果一兩個月之後,原來佢有啲嘢你好唔鍾意,睇唔過眼開始。我人馬座,好神經質,一樣嘢化大就開始有其他嘢,跟住就不停避,去到某個程度爆發出嚟就冇得救。我以前咪咁囉,但人大咗會攤開講,咁會比較好。」

以林峯外形,相信投懷送抱者眾,且他又血氣方剛,但他說:「避 o架,呢啲仲驚,畀你唔驚呀?點知人哋諗乜呀!」以上女子有否包括女藝人?他否定:「冇,女藝人知我好避忌同行內女仔行得埋,所以我哋好 friend,因為對我放心。」

TVB篇
攞獎有愧 一步一腳印

林峯得亞太男歌星獎卻失落最受歡迎男歌星獎,他第一個反應便說:「乜嘢失落啫,唔知幾驚攞。」他開紅館演唱會,古巨基反而冇,林峯驚乜?「我想攞嘅,但希望攞更多認同先,自己加入樂壇 4年,但有人對我演員身份深刻啲,好事嚟嘅,希望自己做歌手時嘅身份再清晰啲啦。」

有關林峯的話題,其實一切來自亞太獎,他也承認:「係有唔同嘅眼光,但大家都錫我,唔係惡意地針對,起碼一部份人知我做緊嘢,唔係攤大手板等飯食。不過我要做得比人哋更多,先可以令大家嘅視線稍為轉移喺我工作上。我要穩打穩紮,一步一腳印,唔係一步登天。」

被無綫捧到上天的林峯,自知要比別人努力才能獲得認同。

被無綫捧到上天的林峯,自知要比別人努力才能獲得認同。

林峯自從升呢亞太區男歌星後,是非未停過。資料圖片

林峯自從升呢亞太區男歌星後,是非未停過。資料圖片

網友笑林峯的亞太獎是掃街獎,他揚言無所謂:「我都認為仍需努力,其實我屋企個獎櫃有兩個獎未攞出嚟擺,仲喺個盒度,就係今年同舊年嘅亞太。點解?我覺得自己未做到想做嘅嘢,即係呢個獎嘅範圍,呢個獎喺我心目中比最受歡迎男歌星獎更大,因為覆蓋範圍更大,我係拍劇 10年儲埋觀眾先贏到投票率,嚟緊 3月我出國語碟,如果銷量好,就會將呢兩個獎攞返出嚟。」

化妝: Raymond Yip
髮型: D.Y. of HAIR CORNER
部份服裝提供: Club Monaco
場地提供: ilivetomorrow