林峯聞閃婚 5現含春樣

自藝人「吳千語BB」早前高調現身林峯演唱會,並坐在前排宣示「峯嫂」地位後,「峯語戀」逐漸浮面,昨日爆出兩人閃婚消息,林峯在電台風騷默認戀情,講到好事近更怕醜到臉紅,要五度用手掩面遮「含春樣」,更護挺身否認林父棒打鴛鴦。

口窒窒Q&A

林峯以往對所有針對性新聞均可處之泰然,不過昨日到電台宣傳新碟,被問到與吳千語閃婚傳聞,竟然有點招架不住,在短短13分鐘訪問,不時小動作多多,更「語無倫次」!


林峯昨日回應閃婚傳聞時,笑到見牙唔見眼。你睇!有相為證!

峯:林峯 記:記者


「含春樣」之仰望

「含春樣」之捽鼻

記:恭喜你閃婚喎!


「含春樣」之捽眼

「含春樣」之掩面

峯:(笑意盈盈)啱啱人哋send畀我先知,咁好笑嘅喂,愈作愈離譜,點解會咁?

記:好襯啦可能,係咪見咗家長?印咗帖未?

峯:你哋唔好見到(鄭)伊健同YoYo(蒙嘉慧)咁就拉埋我啦。

記:一講起BB咁Sweet嘅?

峯:(翹埋手甜笑)吓!對住你哋梗係笑啦,唔通喊咩!

記:有冇諗過咁早結婚?

峯:(開始口窒窒)吓,我以前……你講……冇……唔關事,咩呀?你講乜嘢?

記:話你閃婚囉,廈門見埋家長?

峯:(扮鎮定)吓!冇喎,冇啲咁嘅plan,咁好笑嘅喂!

記:冇咁嘅Plan但見過家長?

峯:(掩面)冇呀,冇呀冇呀。

唔知點算拍記者

記:講清楚有冇拍拖先?你話冇,疑團咪解開晒囉!

峯:(諗一諗又掩面)唉,唔知唔知唔知呀。

記:唔知即係真?

峯:(嘴角含春、三度掩面、坐立不安)激死我喇。

記:拍拖開心事!

峯:(忽然認真)但真係唔好牽涉到屋企人,有啲報道作到離晒譜,真係唔好咁,唔好笑囉。

記:拍拖就係真嘅,唔涉及屋企人嗰啲就係真?

峯:(第四次掩面兼苦笑)唉吔!

記:究竟BB係邊個?吳千語?

峯:(托腮Chok樣諗5秒)放過我啦,即係我希望……放過我啦。(捽眼,繼續冧笑)

記:乾脆啲,認咗佢啦。

峯:唔知點解連續有咁多得意新聞,又話唔做,又退出又成家立室。

記:實情係點?

峯:(開始甜笑臉紅,並拍打記者)唔知呀冇呀……

記:平時你講呢啲黑面O架,今日係咁笑晒。

峯:新年流流費事黑面。(五度掩面)

護未來外父外母

記:公司唔畀講?

峯:(瞪大眼)唔係,公司唔理Artist屋企嘢。

記:會唔會係嗰邊(吳千語)公司干涉佢?

峯:冇冇冇,我唔知,唔好問我。

記:有傳你爸爸唔鍾意BB(吳千語)?

峯:(笑容誠懇,諗咗陣)所以我都話,之前報道牽涉到屋企人,作到咁離譜。

記:因為真係好鍾意?

峯:(趴枱冇面見人,講不出聲)

記:搞到BB屋企人,係咪好唔好意思?

峯:幾唔好意思O架,因為入面啲嘢唔屬實,作得就作,唔好咁樣啦。

記:講緊個BB係吳千語喎?使唔使再答過?

峯:係呀,係呀,唔好意思呀。

記:使唔使同Uncle、Auntie道歉?

峯:(抓頭)係啦……幫吓手啦,唔好亂作。

未諗情人節點過

記:係咪要買定椰子?(結婚用)

峯:(笑得極甜)唔好玩啦,畀你哋逼到我打算退出。

記:情人節點過?

峯:冇諗到,唔知嗰日使唔使做嘢。

記:無論同邊個拍拖都唔公開?

峯:不嬲私人嘢唔會牽涉工作。

記:樂小姐知唔知你拍拖?

峯:(認真思考5秒)如果我拍拖嘅話……佢會知嘅,所以你問佢。

吳千語趕劇等過年

有傳吳千語在拍攝電影《男人如衣服》時獲林峯力追,雖然二人未有開腔承認戀情,但每次被問到感情時,兩人不禁露出甜到漏的表情。林峯剛在紅館舉行演唱會,獲吳千語大方捧場,坐在觀眾席第七行的她任記者拍照。據知二人感情穩定,不排除閃電結婚,更傳女方將於農曆新年期間,到廈門拜會林峯家長,記者聯絡吳千語經理人Carmen,她說:「我冇聽過,唔係事實嘅事唔回應。吳千語依家喺內地拍劇,仲趕緊工,唔知幾時先停廠,農曆新年邊日放到假都未知。」

林家資產20億

林峯父親林華國是廈門最大的地產商之一,他自80年代從商,即發展其房地產、建築材料及工程等生意,現時在內地已擁有多個屋苑和商場,於2010年3月,更在杭州投資約4億港元,設立觸點科技有限公司作技術研究和實驗,公司資產總值逾20億港元,堪稱「廈門首富」!


林峯父親林華國為廈門首富。

至於吳千語的家底則眾說紛紜,電影監製黃百鳴曾透露吳父在澳洲做生意,母親是國語老師,家庭背景甚佳。不過近日有報道指吳千語的家境與林峯甚為懸殊,更指吳父是燒臘師傅,並於大圍斬叉燒。

林峯爸爸林華國
林華國

林峯與吳千語的「婚訊」傳得熱烘烘。

吳卓羲戥兄弟開心

林峯、吳卓羲與黃宗澤(Bosco)三位無綫小生的戀情都備受關注,有指林峯將攜吳千語返鄉拜年,其餘兩兄弟吳卓羲、Bosco近日則忙拍內地劇,感情似乎未有着落。


吳卓羲(左起)、林峯與Bosco情同手足。

剛返港的Bosco接受記者電話訪問時,坦言未有拖拍,至於工作上有否遇女仔主動埋身?他表示:「冇喎,(內地女仔溫柔啲?)個個地方都有溫柔女仔,我鍾意有個性啲,但暫時都未遇到。(真係拍拖,效法林峯公開或默認?)到時有先算啦,未有耐。」而身在內地的吳卓羲直言戥林峯開心:「人哋嘅嘢要問番佢,總之做朋友,佢開心我梗係戥佢開心。」

樂易玲:佢冇可能結婚

有傳林峯與吳千語玩閃婚,無綫高層樂易玲昨日表示並非事實,亦不需要向林峯求證:「我完全冇睇過段報道,最近都好忙,我冇聯絡過阿峯,(林峯真係會閃婚?)唔係!佢冇話結婚,根本唔係事實,亦冇可能,根本唔使搵佢問!」

預測娛圈囍事

繼上月鄭伊健與蒙嘉慧秘婚,昨又傳林峯與吳千語閃婚,可謂喜事重重。其實圈中多對甜蜜情侶的結婚指數亦甚高,相信報喜消息陸續有來!

5分最高

胡定欣 ● 男友Patt
5分

胡定欣與圈外男友Patt拍拖半年,恨嫁的定欣曾表示想盡快生BB,又說跟男友傾過結婚話題,不排除閃婚,結婚指數最高!

安志杰 ● 謝婷婷
3分

謝婷婷和安志杰人前人後恩愛到爆,早前安志杰揚言想今年結婚,但婷婷拒做蛇年新娘,令二人結婚指數暫時回落。

陳豪 ● 陳茵媺
4分

筍盤視帝陳豪兩年前與陳茵媺合作《心戰》撻着,拍拖以來一直甜蜜蜜,兩人經常大讚對方,又視對方為家人,拉埋天窗指數甚高。

梁烈唯 ● Tina
3分

近年獲無綫力捧的梁烈唯與圈外女友Tina拍拖10年,打風打唔甩,唯唯更積極儲老婆本,揚言等適當時機給女友一個名份。