林峯糖不甩示愛

林峯和徐子珊趁農曆新年相約整傳統賀年食品糖不甩,林峯剛剛承認與吳千語蜜運,炮製糖不甩莫非寓意這段情似糖甜,打風都打唔甩,他表示未想到怎樣過情人節,更自嘲是個不浪漫的人。

林峯與徐子珊相約整糖不甩,雖然做法好簡單,但他們有點手忙腳亂,林峯笑說:「如果叫我哋擺檔就弊,咁耐都整唔到一個。」子珊笑說:「係呀,一定排晒長龍。」子珊用心教林峯將花生芝麻碎黏在糯米糰上,可惜他始終弄不好一個似樣的,林峯笑說:「咁樣先有對比,你整嗰啲咪靚好多!」

林峯和徐子珊趁農曆新年相約整傳統賀年食品糖不甩
【今日我至甜】林峯同子珊約埋整糖不甩,啱啱公開拍拖嘅林峯對住粒糖不甩好有feel,真係由個心甜出嚟!
林峯和徐子珊趁農曆新年相約整傳統賀年食品糖不甩
■林峯與子珊去年有個豐收年,他們希望將氣勢延續到蛇年。

子珊初一着紅底

林峯早前公開承認與BB吳千語的戀情,更有網友拍到與女友去了日本過情人節,不過早前林峯接受專訪時被問到如何慶祝情人節時,大賣關子說:「未諗到,我好懶,所以唔係一個好浪漫嘅人,不過我都好想過一個好正常嘅情人節。」子珊則說:「細個都好着重情人節,但我接受唔到喺街度拎住紮花,不過我入行之後都冇乜點過。」

林峯透露每年農曆新年,林爸爸會親自下廚,更會炮製一道傳統美食,林峯說:「我爹哋嘅姑婆發明嘅『姑婆果』,但已經失傳咗,我爹哋用咗幾年時間研究,呢個我一定要學,不過好難整。」子珊回想兒時過農曆年,家裏貼滿揮春:「以前讀書,我要阿媽每年送『學業猛進』揮春畀我,進步都唔夠,要猛進,而且仲會用碌柚葉沖涼,年初一着紅色內衣褲,年初二就着金色內衣褲,主要係攞個好意頭。」

採訪:黃曉妍
攝影:陳志嵐
場地:北角城市花園酒店
(林峯)化妝:Raymond Yip
髮型:DY of Hair Corner
(徐子珊)髮型:Zap of Xenter
Styling:Patrick Sun