黃浩然最近成為無綫收視「止血散」，早前由兩大視帝黎耀祥和陳豪分別擔正的《神探高倫布》和《金枝慾孽貳》，收視一度下跌低至18點，情況令人擔心，直到由他擔演的《情越海岸線》上場，即時止跌回升最高28點，但浩然未敢邀功。對於鄧萃雯投訴劇本「飛紙仔」，令演員未能準備充足影響表現，浩然認同制度有問題，但認為《金》監製戚其義和編審周旭明絕對是認真製作的人，而演員入得TVB就預了辛苦，如果想舒服大可向內地發展。

撰文：杜淑霞　攝影：李權威

髮型：DY@Hair Corner

浩然對於《情》劇收視平均26點，本周一（27日）最高達30點，比起《金》劇最低18點足足贏12點，他認為只是戲種夠輕鬆，觀眾較易接受而已，「咩『止血散』真係唔敢當，呢啲小成本製作又冇咩大龍鳳，都預咗唔會大爆，有咁嘅成績已經好開心，唔敢有咩期望，踩到30點已經要慶祝啦！」

唔啱觀眾口味

對於贏了《神》劇和《金》劇兩部大卡士製作，浩然坦言未有收看兩劇，不知真正「死因」，「我呢排雖然唔使開工，但要陪小朋友食飯，但我相信兩部都係誠意之作，兩套劇監製添哥（李添勝）同戚其義，都係認真工作嘅人，唔收得只可以係話唔啱觀眾口味，唔係佢哋做得唔好囉！」

至於《金》劇更連參演的鄧萃雯亦狂插「睇唔明」，還趁機投訴該劇劇本「飛紙仔」，至令她未能好好準備影響演出表現，浩然就認同制度確有問題，「咁『飛紙仔』實會有影響，本身已經唔夠瞓，又要記咁長對白，如果唔夠時間準備，真係好辛苦，情緒唔好，對演出都會有影響，但可能我拍電影時已經係咁，所以早已經習慣咗。」

鋪路內地發展

不過浩然認為既然制度早已存在，作為演員無法改變唯有接受，「其實入得TVB都預咗係咁，辛苦係一定，你想舒服咩？有本事咪去內地拍囉！你想瞓8個鐘都無問題，但呢度制度一早係咁，你留得喺度無辦法改變，咪唯有接受囉！（有打算返內地發展嗎？）都有，老實講o依家多咗個小朋友，負擔真係大咗，都想多啲搵錢機會，係時候為內地發展鋪路，希望下年可以成事啦！」

剛成為第二任爸爸的浩然，坦言在港拍劇時間長，確實令他難照顧家人，所以決定未來會減產，「我第一個囝囝出世時拍緊《拳王》，只係請咗一日假陪太太生，真係覺得好內疚，所以今次第二個小朋友出世放長啲假，其實嚟緊每拍完兩個劇之後，大約5個月度，都會放假陪吓屋企人，始終都係要攞個平均點，工作唔係生活全部，家人先至係最重要。」

浩然坦言入得TVB工作，就預了辛苦，所以從沒埋怨。