Face 156期

我個鼻高過你喎！設計對白
福山雅治個經典白袍 look，加埋塊寫滿物理程式嘅黑板，估唔到都俾無綫抄到咁足，唯一唔同，應該係林峯塊白板寫嘅嘢簡單好多囉！

FACE TV

《談情說案》抄日劇　林峯山寨版伽俐略

2010年05月19日

近期無綫劇集頻頻俾人話抄襲，《飛女正傳》喪抄西片《超女回歸》，《掌上明珠》就翻 dup日劇《女系家族》，黃金時段變抄劇時段。
《飛》劇就播完，不過唔好開心住，緊接由林峯同楊怡擔正嘅《談情說案》，講林峯係天才物理學家，專幫警察好友馬國明查奇案，而楊怡就係傻更更女警，同林峯查案查出感情，唔煲開日劇都知擺明係山寨版《神探伽俐略》。
新劇都抄舊橋，不如煲番深夜重播嘅《天地豪情》好過啦！

《談情說案》上年開拍，已經被指激似由福山雅治同柴崎幸主演的日劇《神探伽俐略》，不過當時林峯極力否認：「兩套劇都唔同劇本，唔同演員有唔同演繹，應該係兩回事。」

網友改圖

劇集未出街已俾網友喪踩，仲改埋圖贈興，真係要放長雙眼睇套劇有幾多點收視。

造型抄

林峯平日唔係着白袍就係西裝背心，連女警楊怡都要整番個斯文女警 look同柴崎幸拗一拗手瓜，好在楊怡個樣同演技都唔輸蝕，未必輸畀日版！

角色抄

《神探伽俐略》中，由北村一輝飾演的草薙 sir（上右）經常搵中學同學福山幫手查案；港版由馬明做草薙 sir，係林峯同學兼楊怡上司，人物關係抄到足。

串星都抄

《神》劇其中一個賣點係多串星，有廣末涼子同香取慎吾等等，《談》都搵咗吳彥祖老婆、名模 Liza S.客串做馬明其中一個女友。

橋段抄

《神探伽俐略》第 8集講死者突然出現喺細妹面前（左下圖），而《談情說案》嘅巡禮片段亦大玩靈異，大大個阿婆頭出現喺天上面，嚇鬼咩！

查案抄

柴崎幸鍾意去福山個實驗室傾案情，港版一樣，鍾意成班人圍喺 lab度討論案件。

布景抄

林峯個實驗室驟眼望落去，同福山嗰個勁似，大家都同樣有個閣樓仔，不過始終係山寨版，香港呢個簡陋好多。

床戲搶鏡

話係兩回事，其實咪又係同一回事。兩齣劇集無論劇情、角色同造型都好似倒模一樣，不過無綫為咗避免俾人話抄到十足十，刻意加多幾條愛情線穿插，監製劉家豪話：「套劇雖然係講用科學破案，不過其實係愛情為主，所以同《神探伽俐略》唔同。」
林峯同楊怡條愛情線同《神》劇差唔多，都係講理性林峯唔信愛情，楊怡就愛情大過天，最後日久生情撻着。反而馬國明條線新鮮得多，講佢飾演花弗重案組督察，同大學同學廖碧兒成日玩一夜情，兩人有多場激情床戲，連廖碧兒都話今次又低胸又露背，係入行以來最大膽一次，仲懷疑唔知出唔出得街添！講到咁激，點都好過睇林峯個 chok樣啦！
廖碧兒原本只係客串，但有傳佢同當日未敗走嘅陳總要求加戲得米，成功榮升第二女主角，加埋同馬明嘅肉搏戲，分分鐘搶過密實楊怡。

山寨劇陸續嚟
《讀心神探》 Vs《心計》

《讀心神探》講由林保怡飾演的幹探，從相士父親身上學到一套觀人術，可以睇穿人的弱點，林其後去美國讀犯罪心理學，之後將兩種技巧一齊運用，屢破奇案。而 08年首播的美劇《心計》（ The Mentalist），男主角亦係透過出色的觀察技巧同分析能力，幫助警方破案。係咪抄？你話呢？

《刑警 2010》 Vs《刑警》

黃日華回巢拍住苗僑偉的《刑警 2010》，講原本係警察的黃俾人屈而坐咗十幾年冤獄，出獄後用私刑對付班罪犯，搞到同好兄弟、正氣警察苗僑偉反面。而明珠台播過的美劇《刑警》（ Life），同樣講含冤入獄的探員，出獄後重返警隊為自己平反，其另類查案手法亦惹起同袍不滿。希望淨係得個名似啦！

撰文：湯勵貞