與戴夢夢譜忘年戀 太極鼓手朱翰博爆婚外情 老婆:捉姦兩次

現年49歲的太極樂隊鼓手朱翰博(Ricky)近日被撞破與30歲的戴夢夢拖手令戀情曝光,兩人承認發展中,人夫Ricky強調與太太Anne已分居。據知Ricky與老婆結婚二十七年,當年Anne在新加坡華納唱片工作時認識Ricky,二人育有一子。前晚Anne先以第三者身份連發數封電郵向記者告密:「他太太發現他和戴夢夢有染才匆匆在6月5日搬走。昨天6月8日,他還回來偷東西,他太太報警求助。正人渣」、「是他老婆發現他們有染,還一連捉姦兩次,大打出手。」最後一封Anne才直認:「我是太極樂隊鼓手老婆,我們沒分居沒離婚。為甚麼他們可以謊話連篇,昨天看到報道很傷心。」

記者致電Ricky求證,他強調已分居:「廢話!我搬咗新屋,可以搵工人作證,我哋喺舊屋已經分房瞓兩三星期,佢全部講大話。根本個幾兩個月前分居,其實我哋之前做咗分居紙,傾少少資產點分配,當時佢唔想簽,不過律師E-mail咗草擬書畀我,可以證明唔係呢幾日先決定分居。」對於被指控搬走後返去偷東西?他說:「簡直天大笑話,我返去攞一個梳化咕o臣、一盞射燈仔、兩支紅酒,就係咁多嘢,佢想玩我,話我入屋盜竊報警。」

婚外情事件互數講大話 太極鼓手Ricky戀戴夢夢 老婆:捉姦兩次
左:Ricky與太太Anne,右:夢夢大前日與Ricky拍拖斷正

問到離婚原因?他說:「好私人,好難答,日積月累夫妻問題,總之強調絕對唔係識夢夢導致離婚,最近同佢出街都係呢幾星期事,我承認發展中,拖手都係呢幾日事。」對於Anne聲稱在沙田捉姦大打出手,他說:「冇,唔好玩啦,真係好恐怖。嗰日約咗夢夢傾嘢,因為佢係大名娛樂,我哋好多合作關係,接觸多對佢有好感,真係公事開始先,冇乜唔正常,嗰時已經分居。」

二十七年的婚姻弄致如斯田地,Ricky無奈說:「坦白講佢唔係娛樂圈人,令佢承受壓力我都唔想,但佢唔可以侮蔑我講大話。」問會否與夢夢繼續發展?他說:「唔知,可能佢聽日好怕我走咗呢,我諗夢夢都好驚,佢都係受害者,明明分咗居咁煩,我又唔係富貴,我哋呢啲阿伯咁,忘年……其實又唔係好忘啫。」

不過,Anne接受電話訪問卻說出另一版本:「佢有提出分居,但冇話離婚,佢係6月5日搬出去住,分房都係5月1日開始。」點解婚姻出現問題?她指名道姓控訴:「因為戴夢夢,有人撞到佢哋兩次,一次4月喺大坑食意大利粉,我去到時Ricky話傾製作,前一日睇到Ricky個手機WhatsApp,有個Renee Dai:『BB我到咗屋企,我瞓啦!』我叫佢唔好搞我老公;4月25日Ricky去廣州,有朋友話大學站見到佢,我諗到沙田有酒店,去到見夢夢同老公飲嘢,挨得好近,問佢同我老公係咪有嘢?戴夢夢發爛渣,我摑佢一巴,佢避開咗。」.

Anne表示自此後與Ricky關係變差,她說:「夢夢出現之後先分居。」問Ricky有否向她交代?Anne說:「佢話當叫x!之後我哋鬧交,佢6月5號搬走,8號返嚟拆燈、咕、攞紅酒,我報警。8日(拖手)新聞出,分居要滿一年先離婚,我仲係佢老婆,睇到新聞好震驚好嬲。」問會否答應離婚?她說:「未知,一年後睇吓點先。」

對於婚姻破裂,她說:「好唔開心,點解啲人可以咁厚顏無恥,大家好嚟好去,但唔鍾意啲人講大話。」有否憎恨Ricky?她說:「唔會,我唔係怨婦,只係講出事實,成日問佢都話唔係戴夢夢,但搬走三日就話發展中,有少少被欺騙。」

至於被指第三者的夢夢昨透過短訊回覆:「當事人已解釋了所有事情,我不便再作任何回應,但由始至終都相信他!」

四大罪狀:各說各話

Ricky的二十七年婚姻破裂,被老婆Anne指控四大罪狀,兩人互插對方講大話,公說公有理,婆說婆有理。

冇分居冇離婚

Anne版本:佢有提出分居,但冇話離婚,佢係6月5日先搬出去住。

Ricky版本:6月5日搬唔通4日先決 定分居?都唔make sense,根本個幾兩個月前分居,如果唔係點買晒嘢搬到入嚟。

兩次捉姦斷正

Anne版本:一次佢同戴夢夢喺大坑食意大利粉,另一次還在沙田發現他們密會,大打出手,當時酒吧有很多客人,酒店部長也可以做證。

Ricky版本:大打出手?冇,唔好玩啦,真係好恐怖。嗰次係同戴夢夢傾嘢,因為戴夢夢係大名娛樂,我哋好多合作關係。

返舊屋偷東西

Anne版本:放工回家後我很害怕,馬上報警備案,警察聯絡Ricky他就不聽電話。昨天報道出後,Ricky知衰將東西歸還。警察也警告保安不可以再讓Ricky出入,保障我的安全。

Ricky版本:我返去攞一個梳化咕、一盞射燈仔、兩支紅酒,佢想玩我,話我入屋盜竊報警,差佬都冇搵我,差佬叫佢唔想我返嚟就換鎖。

離婚因為夢夢

Anne版本:戴夢夢出現之後先分居,佢話當係去叫×,但搬走三日就話發展中,有少少被欺騙。

Ricky版本:當我分居時,就算同其他女仔出街好正常,包括佢同其他男仔拍拖,我都唔會干涉。

Ricky創校教音樂

與戴夢夢發展「父女戀」的朱翰博(Ricky),今年49歲,是太極樂隊的鼓手。12歲自學打鼓,1985年與雷有曜、雷有輝、鄧建明、劉賢德、盛旦華及唐奕聰組太極樂隊,上月在紅館舉行入行30周年演唱會。1998年Ricky成立音樂學校Ricky Music Factory,2004年他以滿分成績考取Trinity College London之Drum Kit演奏級證書,成為香港第一位取得演奏級滿分之鼓手。前年,Ricky開設的音樂學校惹上官非,被兩名職員追討欠薪,向小額錢債處追討,最後與其中一名職員和解。

鄧建明撐Ricky新戀情

太極鼓手Ricky一向低調,昨被老婆Ricky嫂指控搞婚外情大話連篇,記者致電問隊友鄧建明(Joey)知否Ricky離婚?他說:「唔知喎,冇聽過。」問識唔識Ricky老婆?他說:「梗係識,農曆新年仲一齊食飯,冇嘢,佢帶埋老婆出嚟。」

不過早前太極在紅館開騷,他承認綵排期間沒見過Ricky嫂探班。問知否Ricky跟戴夢夢拍拖?鄧建明反問:「係咪㗎?我要求證吓先。」記者指兩人承認發展中,他說:「係咩?嘩!好呀!」不過Ricky嫂聲稱沒分居沒離婚,鄧建明說:「我真係唔知內情,咁大個人,自己識處理,家事唔可以亂咁講,靠佢哋自己發展。」