政府漠視民意，就增發免費電視牌照事宜一味拖字訣，特首梁振英日前更稱發牌問題「複雜到不得了」，令發牌凍過水。不過電視革命之路越艱辛，王維基與旗下香港電視員工越是團結。今日大年初二，王維基率視帝夏雨、影后鮑起靜、黃日華和張可頤等旗下藝人舞龍慶新春，並促請政府早日發牌，為電視行業帶來新景象。

廣大市民一直期望新電視台的出現，能為停滯不前的電視行業帶來新衝擊、新景象，無奈政府在發牌事宜上一拖再拖，無綫和亞視又聯手夾擊王維基，加上日前有議員踢爆特首梁振英被問到何時發牌時，竟指要求政府發牌的論據「唔係好清晰」，又稱發牌問題「複雜到不得了」，令發牌問題變得波折重重。有指香港電視（HKTV）主席王維基不忿政府拖得就拖，有意在農曆年假期過後作終極反擊行動，策動全台職藝員、演藝界、學界、文化界和泛民議員到政總外靜坐抗議。

■今日大年初二開年，香港電視揸弗人王維基率旗下20多位藝人舞龍助興，期望蛇年一定發。

「希望個牌快啲落實」

日前本報邀請王維基與HKTV行政總裁杜惠冰率領旗下20多位藝人為今日年初二舞雙龍開年，問王維基會否採取遊行等進一步行動促請政府早日發牌，王維基未有正面回應，反而對無綫和亞視兩台聯手夾擊表示未驚過，王維基說：「睇其他電視台反應，佢哋反應越強烈、越緊張、越驚青，我就越安心、越老定、越開心，因為件事一定去到個龍門邊，所以先至見到有電視台咁緊張、咁驚惶，進退失據，所以我諗件事好快會成功。」

■王維基與香港電視藝員均希望蛇年獲政府發免費電視牌照。

■王維基跟一眾藝人恭祝本報讀者蛇年萬事如意。

無綫和亞視聯手可有造成壓力和威脅？王維基說：「嗰兩個電視台聯手唔係對抗我，佢哋係對抗緊700萬市民，因為700萬市民嘅意願就係希望快啲發牌，多啲競爭多啲選擇。我睇報紙好多藝員都係贊成快啲發牌同多啲選擇。」

當日王維基率視帝夏雨、影后鮑起靜、黃日華與女兒黃芷晴、張可頤、林文龍、艾威、林嘉華、姜大偉、姜文杰、姜麗文、石修與兒子陳宇琛、唐寧、周家怡、陳曼娜、楊淇、黃美棋、錢國偉女友陳宛蔚、丁樂鍶、呂熙和梁寶琪舞龍助興，向本報讀者恭喜發財。講到新年願望，王維基與一眾藝人均不約而同表示發牌成功。王維基說：「新年願望700個同事同埋我都係一樣，希望我哋個牌可以快啲落實到，咁我哋就可以繼續拍多啲好嘅節目畀香港市民睇。」

■黃日華今年有乖女黃芷晴陪同拍賀年照，難怪感覺特別心甜。

■張可頤興奮地接過老闆王維基的大利是。

黃日華父女拍住上

今次王維基率藝人舞龍，華哥父女異口同聲表示新鮮，華哥說：「以前返廠同一班人做節目，玩吓遊戲，今年比較特別，我哋成班同事一齊做吓運動，影吓靚相，舞吓金龍，我覺得係一樣新鮮嘅活動。今年仲有個靚女喺我隔籬，真係心都甜埋，亦都好高興黃小姐入咗呢行，希望大家可以多啲支持佢啦！」至於蛇年願望，芷晴說：「願望係HKTV快啲發牌，大家可以睇到我哋籌備咗咁耐嘅電視節目。」在旁的華哥說：「我最大嘅願望係新年政府可以畀到份禮物我哋，就係發到免費電視牌照，我哋真係好有誠意同能力製作到好認真嘅節目畀廣大觀眾去欣賞，希望呢個願望可以早啲達成。」

採訪：戴彩煥、何慧斯、羅美倫
攝影：林德雄
協力：葉君海、藍文浩
鳴謝：夏國璋龍獅團

周家怡抓緊機會

■（右起）陳宛蔚、唐寧、周家怡和丁樂鍶爭住??利是。

周家怡去年由無綫轉投王維基旗下，踏入蛇年，周家怡除了希望事業有新一頁外，還希望政府盡快發牌。周家怡說：「見到王生（王維基）帶頭一直做，一直好有信心發到牌，變相感染咗我哋，大家喺呢方面嘅諗法都好齊心。有啲人覺得喺無綫過咗檔嘅藝人好反骨，仲試過喺微博留言鬧我，但我從來冇講過無綫有乜嘢唔好，只係唔想錯過任何一個機會，無論如何都會盡量去做，所以我希望大家鬧之餘，畀個機會我哋，睇吓我哋啲劇，有競爭先有進步。」

唐寧同樣希望政府早日發牌，她說：「對香港市民係好事，有邊個唔想有多啲選擇？我同香港電視已經拍咗兩個劇，仲有一個喺五月中拍，都希望演出有多啲人睇得到。

張可頤下廚慰親友

■姜大偉笑指帶住姜文杰和姜麗文開工一定很攰，因兩人唔讚得又唔鬧得。

貴為香港電視一姐的張可頤，蛇年願望也與新公司有關，她說：「我希望可以快啲發牌，公司繼續拍多啲好戲畀觀眾睇。」已多年沒在香港過農曆年的可頤，難得今年在港，她聲稱將會露兩手親自下廚煮餸給家人品嚐，可頤說：「我諗住露番兩手，海參成功咗，其他相信問題唔大。」

夏雨則謂：「贊成引入競爭，對電視行業係好事，自己只係簽香港電視一部，但活動、影相都做嚟撐場，自己新年願望係身體健康，繼續做落去。」先後轉投香港電視的姜大偉與兄長秦沛兩子女姜文杰和姜麗文，大家在蛇年都希望政府早日發牌。姜大偉說：「我諗全香港有好多觀眾都期待呢件事，我哋更加期待。」姜文杰則謂：「公司一向畀好大嘅自由度我哋，所以大家喺好開心嘅環境做嘢。」