Robynn&Kendy自爆獲邀參加好聲音 葉劍英孫女葉晴晴有特權

現年28歲的Robynn(葉晴晴)家族顯赫,祖父是中共元帥葉劍英,伯父葉選平曾任廣東省省長,貴為「天之驕女」的Robynn,兩年前與拍檔孫曉慧組成Robynn & Kendy女子組合攻香港樂壇,於今年1月在叱咤和新城勁爆頒獎禮獲組合獎後,至今發展平平兼人氣一般,惟兩女竟忽然登上浙江衛視熱播節目《中國好聲音》第三季,難怪引來中港兩地網民好大迴響。

比賽當日,Robynn家姐京城名媛葉明子現身撐場,節目於上周五出街,擔任導師的那英、汪峰等對她們讚不絕口,惟網民卻紛紛質疑Robynn是挾背景參加,譏諷:「家族控制權利半個世紀,冠軍敢內定嗎?」尤其她們在節目中自稱身份是中國香港人,更令網民反感:「你真的是葉帥的孫女?為甚麼說自己是香港人?」

昨日Robynn & Kendy現身尖東出席廣東廣播電視台有份主辦的《第一屆粵語歌曲排行榜頒獎禮記者會》,Robynn明顯有備而來,直認有留意新聞:「都有睇啲。」幫口解釋的Kendy越幫越忙,竟不慎自爆被邀參賽:「其實比賽兩季前主辦單位已傳message畀我哋,佢哋睇過我哋網上演出同聽過唱片,邀請我哋參加比賽,但當時我哋覺得未ready。」對於被網民質疑Robynn的家庭背景對其他參賽者不公平?Robynn說:「最緊要自己嘅價值觀冇改變,由彈歌、做demo,都係我哋一手一腳做。壓力係有,總之平常心。」

對於被質疑是內定冠軍,Robynn說:「我係12年出道,如果要利用啲乜,點解要等到o依家?」問到有否刻意隱瞞背景?她攬一攬拍檔Kendy激動說:「好感謝Kendy一路好撐我,加上公司一路冇利用我呢樣嘢。其實我一路冇刻意隱瞞家境,但自己係固執嘅人,由選咩學校、讀咩學科到入行,都係自己決定。」

問是否為報道不開心?Robynn說:「唔係話唔開心,最重要自己價值觀唔受人影。」問下次再出賽時,Robynn家人會否繼續出席?她謂不會請父母看,免兩老辛苦。對於介紹自己為「中國香港」惹網民狂插,Robynn解釋:「比賽當日導演提議用『來自中國香港』介紹自己,我聽到覺得好敏感,不過諗番香港嘅奧運選手,都係話自己代表中國香港,故諗咗一陣就決定用。」

而《中國好聲音》的導演們於幾年前已睇中兩女,對於Robynn的身世問題,導演組一早就知道她「紅三代」的家庭背景:「雖然她的背景確實很有爆點,但邀請她們來參加,就是看中她們的音樂本身,而不是別的甚麼。」

Robynn & Kendy獲邀參賽被質疑有特權,之前有傳官恩娜和糖妹都有份參加,但兩女已否認,而鄧穎芝就坦言是自薦報名,她接受電話訪問說:「uncle嘅製作公司幫忙寄demo,有去上海試音,但唱得唔好冇入到。」對於Robynn & Kendy獲邀參加,會否感到不公平?鄧穎芝說:「佢哋有實力唱得好好,有冇黑幕唔知,但有關係好緊要,否則自己唔使自薦。」至於巨聲幫鄧小巧則過五關斬六關得到參加資格,她在電話說:「陳奐仁推薦我,算係自薦,唔覺Robynn & Kendy有特權,佢哋台上發揮好好。」

Robynn & Kendy自爆獲邀參加好聲音 葉劍英孫女葉晴晴有特權