《求愛大作戰》話就話係真人騷，但好多橋段都非常刻意經營，「媒」味仲濃過姊妹作《盛女愛作戰》。節目內容看頭一般，但鏡頭外種種是非卻更加搶風頭。被取笑皮膚差嘅參賽者Rocky（黃憲麟）忽然爆出09年曾涉及一宗在夜場發生嘅強姦案，其後Rocky向記者澄清當時只係協助調查，但日前又於個人facebook上、開玩笑咁回應好友:「我係犯姦強lol」

今日早上，Rocky選擇於《求愛》愛情導師、即日前因為教人用「身體接觸」同異性溝通出咗事嘅陳定邦位於尖沙嘴嘅辦公室開記招。一身西裝畢挺、足踏皮鞋嘅Rocky，今日主力負責讀聲明。律師
Antonio Ho陪同在側，但表明Rocky只係讀聲明，不設答問環節。

聲明如下:
「今天我召開這個記者會的原因，是因為近日有關的不實報道，已經嚴重影響我的個人聲譽、我的朋友，及最重要的是我的家人。

「我非常感謝媒體對我的關注。但對於有報道以『強姦犯』這三個字形容我時，我絕對不能接受及容忍。

「本人謹此聲明以下兩點:
第一，我從來沒有犯事案底紀錄。
第二，我十分後悔曾以輕佻的態度，用不當的言詞跟朋友開玩笑，以至被斷章取義，引發與事實不符的報道。我特此跟我的家人道歉。

「我希望這一次事件不會再進一步影響我的家人、朋友、工作及我個人的聲譽。此事本人已經交由律師跟進處理。這次記者會是我就此事唯一及最後一次的公開聲明。本人保留日後所有法律追究權利。謝謝。」

【求愛大非禮？】 愛情導師陳定邦：我唔覺得我俾人鬧

今日《求愛大作戰》參賽者Rocky舉行記招，地點係《求愛》「愛情導師」陳定邦位於尖沙嘴嘅辦公室。陳定邦亦屬「是非人物」，佢日前啱啱喺節目中教男士觸碰女性以破除隔膜，點知播出冇耐就發生現實版求愛場面，35歲男子涉非禮罪被捕。

陳定邦噚日接受本報訪問時已表示，「叫人接觸唔係叫人摸、非禮，基於篇幅冇解釋咁多，重點係接觸男女或異性都要熟識咗先。」又強調唔同情況、唔同動作有唔同動機，同佢教嘅嘢無關。

今日記招上，陳定邦未有發言澄清，但有回應記者問題。問佢可有因為此事俾人鬧？陳定邦謂:「我唔覺得我俾人鬧。」又謂:「報道有少少斷章取義，我冇再去諗。」續問道可覺得報道出街之後對佢構成影響？陳定邦重申:「我覺得冇。」係咪你未感覺到咋？陳定邦話:「可能係啦。有少少分析能力都相信我係唔會教人非禮囉。」

陳定邦又表示，喺該集節目中，冇詳細交代唔熟嘅男女可以喺乜嘢情況下接觸，仲話:「唔同方法同於唔同人身上，好明顯成個節目同個報道冇關，亦冇講過嗰個男子睇完節目去做嗰啲嘢。」

陳定邦又話唔擔心下次再教人時被指教壞人，佢話:「個節目有講明家長指引。成年人要為自己行為負責任，總之我依家冇壓力。」對於有指《求愛》40歲導師Queenie同其中一個參賽者Cyrus拍拖，陳定邦話:「我知佢哋係有少少嘢，不過佢哋唔係一齊。」又指Cyrus係個極度怕醜嘅人，所以集中教佢；反而Rocky係社交能手，唔使點教。