郭晉安可算無綫收視福將，今年繼《老表，你好嘢！》收視高企後，連《熟男有惑》收視亦同樣不俗，雖然被指抄襲韓劇及美劇，但安仔一於少理，坦言有人講總比冇話題好。

撰文：王崇穎

近期無綫播出的劇集均收視低迷，幸好正播映的《熟男有惑》總算為劇集收視帶來一點驚喜，平均收視亦有26點（約167萬觀眾）以上，向來是無綫收視福將的郭晉安於劇中飾演律師盧甦，既cool又懶親切，當中的對白更十分抵死，令觀眾對安仔又愛又恨。

■郭晉安是無綫福將，他主演的劇集《熟男有惑》收視不俗，他笑言救一救收視很開心。
攝影：陳順禎

「監製話參考美劇」

雖然《熟》劇收視不俗，但卻被指抄韓劇《紳士的品格》、美劇《錯體大狀》（Drop Dead Diva）及《金牌律師》（Justice），安仔日前說：「有人話好過冇人睇，我覺得今次比較美劇色彩多囉，當日開會去傾時，監製都係話係想參考美劇元素，不過點都好，話抄襲呢樣嘢已經成為咗宣傳之一，咁o依家成套劇畀咗話題人哋去講，都係一件好事。」

■《熟男有惑》被指抄張東健主演的韓劇《紳士的品格》（右圖），安仔稱有人鬧總好過冇人理。

安仔今年已經推出兩劇《老表，你好嘢！》及《熟男有惑》，而兩套劇均獲高收視，他坦言十分開心，貴為福將的他可算於劇集收視低迷的情況下，為無綫爭了一口氣，他說：「都算救一救o架，咁我自己都好開心，因為兩套劇收視同口碑都咁好，o依家嘅觀眾大部份已經進入咗另一個年代，如果劇集有咁嘅質素先會開電視機睇，冇嘅話就寧願打機算數。」

由於今次該劇以四男四女的故事為主題，安仔坦言與其餘三位男士單立文（豹哥）、曹永廉和李思捷一開工便十分開心，大家更無所不談，安仔說：「我哋一開工就乜都講，講吓大家當初點入行，同點去捱番嚟，所以好多時大家埋位都好快進入到狀態，大家拍嗰陣都好開心，而且大家又唔會搶大家戲，加上我哋又好彩有豹哥，等佢令好緊張嘅劇情，都可以拉番鬆啲。」

■安仔在劇中角色「賤賤哋」，連他自己都有點不能接受。

自嘲做扯皮條賤格

劇中安仔飾演的角色帶點賤格，就連他自己亦有點不能接受，但他覺得又可反映到現實中打工仔的心態，他說：「其中有場講我要做扯皮條，幫我老闆做中間人，因為佢想搞陳敏之，叫我送隻手錶畀佢，暗示叫佢去開房，當時心態都係覺得，一個願買一個願賣，但呢個角色真係幾賤都做得出。而且又有場老闆要我飲茄汁加辣椒，心諗飲唔死，但唔飲就會死，充份表現出佢為討好老細，可以幾咁能屈能伸都會做得出。」

安仔表示整套劇集除了自己的角色外，他亦十分看好曹永廉所飾演的盛鳴一角，他說：「佢當中有四五集失蹤咗，但出番嚟之後，專登安排佢有好多騎呢同特別嘅造型，而且佢一想到啲乜都會即刻去做，令到大家對佢會有少少眼前一亮嘅感覺，近幾年觀眾想去睇啲演員可以比較多變化，反而唔想見到啲藝人太正路，最好要有突破。」

寧演賤精棄做靚仔

■當年安仔憑《戇夫成龍》彈出，他坦言希望嘗試不同類型角色。　劇照

郭晉安在《熟男有惑》演賤精律師盧甦，02年在《戇夫成龍》演儍仔阿旺，安仔坦言喜歡嘗試不同的角色，他說：「我絕對冇問題，當年飾演阿旺都好成功，我覺得對演員會係一條好好嘅出路，令人感覺冇咁悶嘛，做小生係靚仔呀，但可以靚得幾多年呀？去到某個位係要喺角色上挑戰吓自己，令到觀眾對你有眼前一亮嘅感覺。」

■安仔與陳敏之合作無間，又稱兩人的合作是天使與魔鬼混合體。

讚敏之演繹創新

已經與陳敏之合作兩套劇集，安仔表示與她十分熟絡，對於無綫近期力捧敏之，安仔亦大讚她外形討好，他說：「佢外形上食到o依家興起嘅韓風，某啲鏡頭可以拍到佢好似韓劇女主角咁，加上佢有長腿夠高，而且佢演繹好創新，絕對有佢自己演繹嘅一套方法，我同佢合作絕對係天使與魔鬼嘅混合體。」