日前本報獨家踢爆吳卓羲到機場冧接內地女星張馨予，並載女友齊返寓所，事後女方默認戀情。斷正前吳卓羲接受本報專訪還聲稱張只是朋友，又謂拍拖會公開，以免被指鬼祟，現眼報的 K哥，昨坦言見到黃宗澤被偷拍也心驚驚，在家也會拉上拉簾。

吳卓羲（吳唱 K）日前駕駛百萬戰車到赤鱲角機場親接 35F張馨予，兩人齊返男方的何文田寓所，張馨予禁室陪「 K」 44粒鐘後撤退，在北京出席記者會時更默認戀情，不過早於唱 K媾女斷正之前，他曾接受本報記者專訪，當時他被問到先後跟張馨予、徐子珊和馬賽的緋聞時，他說：「同佢哋只係同事、朋友關係。」 K哥唔認張馨予是女友之餘，講大話更唔眨眼。

張馨予坦言自己聽得懂廣東話，可見她對跟吳卓羲的一段情信心十足。資料圖片

日前本報獨家拍到張馨予來港，由吳卓羲親自接回家中相聚。

相信吳卓羲想起張馨予，睡着也會笑。

死撐禮貌接待

吳卓羲昨日現身時被問到張馨予來港幽會三緘其口，但不期然露出笑意。

K哥又說：「如果影到我同女仔拖住手拍拖就承認嘅，次次都得個講字，有少少氣憤，家仲未遇到好有 feel嘅女仔，拍拖我會公開，因為開心事，藝人都要拍拖，公開好過第日俾人影到話鬼祟，壓力仲冇咁大。」可惜他講完即斷正。
昨日 K哥與周家蔚、樂瞳在大埔出席父親節活動，有備而來的他雖多次強調私人事不回應，但嘴角不時流露風騷甜笑，被追問與張馨予是否情侶關係？他死撐說：「私人嘢唔想講太多，影到嘅都係禮貌，佢冇朋友喺香港，所以我接佢。」對於女方已默認戀情，他指對方應該沒有講，並說他不回應是怕越描越黑。
提到張馨予留在 K哥家兩日足不出戶，他即說：「有出嚟，有成班朋友一齊食飯。」是否不敢再接載女方？他說：「唉，好驚 o架，睇到 Bosco（黃宗澤）原來喺屋企都咁危險，要經常拉簾先得。」問他會否擔心像林峯般流出親密照？ K哥指林峯事件已過去。

信女友冇放料

有指 K哥不滿張馨予放料而怒撇她， K哥初時不回應，但當問他對朋友是否信任？他就維護女方說：「每個朋友都信任，未俾人出賣過，我相信自己，相信朋友。」
採訪：卓寶花、溫敏芝
攝影：仇志德
場地：皇家太平洋酒店堤岸酒吧餐廳