《衝上雲霄II》吳卓羲寸爆港女:自私妹、膚淺、拜金女

嘩嘩嘩,今次吳卓羲大件事喇,你分分鐘得罪晒全香港女人呀!不過,相信經過今晚之後,亦有無數港男封你做男神偶像呀!因為頭先吳卓羲喺劇中,爆seed講咗句好勁好中、堪稱「神抽」嘅對白——就係寸爆唔肯嫁黃子恆飾演嘅高級副機長鍾世沛,話佢:「自私妹、港女、膚淺、拜金女!」仲唔係金句?今集都未播完已經喺網上瘋傳。

點解吳卓羲會咁講呢?嗰場戲係咁嘅,黃子恆準備咗一隻鑽石戒指、藏入朱古力裡面,準備向胡定欣求婚,不過隻戒指粒石就未免真係細到冇朋友,以一個高級副機長嚟講,冇理由唔買粒大啲嘅。

但慘在黃子恆都未開口,趙希洛同空姐Mary就走埋嚟,同吳卓羲、胡定欣及黃子恆吹水,其中一個——Mary仲乘機大晒老公送畀佢嘅巨型鑽戒,趙希洛仲話:「粒鑽石有幾大粒,就代表你老公有幾錫你!」定欣睇到眼定定,接口話:「咁其實有時,普通一粒鑽石,自己買得起,唔一定要男人送。有時男人送,自己又未必開心。有時自己買仲開心啦。」於是幾個女人就開始講女人自力更生、賺錢買花戴,仲分分鐘叻過啲男人。吳卓羲聽到就話喇:「女人幾叻都好,都總需要落葉歸根嘅。」

咁胡定欣點答呢?佢話喇:「邊個話女仔一定要結婚0架?你哋啲男人需要由,我哋啲女仔都要0架。」黃子恆大驚之下問﹕「你諗住唔結婚?」胡定欣就答:「唔係唔結,唔結住啫。」仲大讚對方鍾意佢咁獨立,擺到明就係想拖字訣釣金龜、或者等佢坐正做機長先講。吳卓羲點會睇唔出,即自言自語道:「自私鬼,拜金妹,膚淺,港女。」胡定欣「兇」佢有本事講多次,吳卓羲話:「自私妹,港女,膚淺,拜金女,我講幾多次都夠膽講﹗」

胡定欣走咗之後,吳卓羲拎住被遺棄咗嘅微型求婚鑽戒話:「咁細粒鑽石,想娶個港女?」

有網民即留言大唱:「別怪他,別怪他…」亦有人留言:「佢講實話姐,擁有呢方面特徵,係港女居多嘅!」、「除咗賭神……都好少見人用髮蠟。」、「又一抽水之作」、「以偏概全」……

唉,別怪他,佢都係跟對白講嘅啫,對住舊愛張馨予或者緋聞女友傳嘉莉,佢唔係咁諗嘅……唔係喎,張馨予唔係港女嚟喎!

最搞笑仲係,呢頭,吳卓羲寸爆港女拜金,嗰頭張智霖就狂讚女人話:「我覺得每個女人都係上帝嘅傑作,世界上冇一樣嘢可以代替佢哋,個個都咁可愛。佢哋一顰一笑,甚至一滴眼淚,我會將女人當係藝術品咁欣賞。」

……請問編審係咪兩個人嚟0架?

《衝上雲霄2》吳卓羲
吳卓羲金句:「自私鬼,拜金妹,膚淺,港女。」


呢隻,係空姐Mary曬命嘅巨鑽。老公送。


左邊就係Mary。


睇到定欣眼凸凸。

呢隻先係胡定欣男友黃子恆
呢隻先係胡定欣男友黃子恆…


睇佢個表情…


快loop兩張相,效果超正。


定欣睇到眼凸凸

黃子恆
黃子恆當然都係…


吳卓羲金句嚟喇!


「你夠膽講多次﹗」


呢句仲正﹗

傅嘉莉同緋聞男友吳卓羲同場交戲
傅嘉莉同緋聞男友吳卓羲同場交戲…

傅嘉莉

《衝上雲霄Ⅱ》咖啡妹傅嘉莉

Chilam啜核金句:我雖然靚仔,但唔係儍0架!

前晚大家都知Captain Cool顧夏陽(張智霖飾)喺《衝上雲霄II》係一個womanizer(玩弄女性),除咗有女人自動攝埋去之外,佢自己都不時要媾吓女,第一集先睇中朱璇飾演嘅模特Kate,之後又相中何年希(陳法拉飾),話要「下次就要你真係攬住我」,到第二集,顧夏陽真係分上下半場,兩個都得米!

第二集劇情講到,何年希想整番好個天文望遠鏡,但所費不非,無辦法之下,惟有變賣死去男友嘅皮褸,臨賣之前再嚟個「最後一聞」,緊緊索一索男男友陣「除」,攞咗錢走人,點知年希又諗番起呢件皮褸嘅回憶,最精警嗰句就係法拉回憶當日自己同男友講嘅:「因為我想件褸有我嘅氣味,咁其他女仔就唔會埋你身啦!」呢招可以趕絕男友桃花,要學喇!

何年希諗到呢度,就後悔了,想返去要番件褸,又點知咁啱,浪子顧夏陽好快手買咗件褸,年希望住佢嘅背影,一時錯覺以為係男友,於是追足幾條街,跟住一下攬落去,仲喊晒咁講「唔好走」,回過神,先知道係個陌生人,就即彈開。

不過無啦啦有「艷遇」嘅顧夏陽點會放過呢個機會呢?馬上發揮媾女本色,話喺倫敦見過何年希,又用金句喇:「唔開心呀?俾你攬多陣喇!」

何年希想買番件褸,顧夏陽就開天殺價、要佢俾原價之外加多500歐羅,何年希叫顧夏陽留低戶口號碼,顧夏陽就話:「我雖然靚仔,但唔係傻0架!」到年希求佢做做好心,顧夏陽竟然話:「我唔做善事,除非俾我錫一啖。」何年希加一句「唔准伸脷」就豁咗出去、伸長條頸等佢咀。不過顧夏陽係風流,但未至於係賤男,最後都冇收一分一毫,還咗件褸俾年希。

不過,就係咁搞到顧夏陽冷親病咗囉。

又不過,又係一個好機會喇,講緊係Kate(即係朱璇),劇情講到佢哋回程返香港,Kate都喺機上,猛話要見Captain Cool(顧夏陽),飛機遇上強氣流都唔肯坐定定,搞到顧夏陽病住都要出面,阿Kate要顧夏陽同自己講清楚兩人嘅關係、要顧夏陽證明係對自己認真,顧夏陽就即刻話:「我哋結婚啦!」加上一個氣流,Kate跌一跌,顧夏陽又成功攬另一女生…仲話一落機就註冊,不過,呢招「以進為退」,係有用0架,Kate都嚇一嚇,最後話要諗諗…

顧夏陽「奸計」又得逞!


要變賣皮褸籌錢。


索一索…成個醒晒!


有錢了。


回憶永遠是美好的。


後悔ing…


又俾佢買到喎…


見到顧夏陽著住男友件褸


何年希狂追顧夏陽,錯以為對方係佢男友;一追到就攬實佢…


噢…原本係第二個人…


想要番?原價加多500歐羅就得。


吓吓…


一係錫我一啖囉~


犧牲吧!


Chilam玩吓咋~


開心番晒!!


仲有朱璇…


到Chilam話要結婚…


朱璇即say no…