入行以來，吳卓羲（Ron）緋聞不絕，近日傳他搭上馬賽及徐子珊，不過Ron強調和子珊是好朋友、好「兄弟」，沒有過電，他揀女友講求第一感覺，「對子珊咁多年都無個種感覺。」擺明對女方無Feel。Ron又說將來假如拍拖，絕不怕大方公開。

一直甚惹緋聞的Ron，早前被指暗地裏與馬賽同居，另一邊廂又跟徐子珊交往，更慘被冠以「姐仔屠夫」之名，被屈的他急發律師信要求有關媒體道歉，「屠夫係形容殺人o架，點會用來形容追女仔？我同子珊屬於好朋友個種，05年合作劇集《突圍行動》時認識，睇住佢成長，知佢性格係點，因為我哋係同一個經理人，加上又傾到偈，喺公司女藝人入面，好似楊怡同子珊都係朋友；至於馬賽就只係合作過一套劇，傳緋聞真係令我覺得好詫異！」

Ron與子珊「稱兄道弟」，雖談得來，卻無意將她「升呢」為女友，「我個人好得意，鍾意一個女仔要有第一個感覺，咁多年對佢都無，只係朋友嗰種，我哋亦都太了解對方。」雖則子珊並非他那杯茶，但Ron對這「兄弟」仍讚不絕口，「子珊幾有型，無論對人處事及工作態度，其實佢好倔強，呢個並唔係壞事，有自己要求係好嘅。」

雖然二人緋聞傳得熱哄哄，但Ron不會為避嫌而疏遠好友，「為一啲不實報道而失去一個朋友，好唔值得，我同子珊仍有電話聯絡，主要係講公事，平時見面都會傾吓衣着打扮，去邊度有好嘢食，又未至於關心佢嘅感情生活；問她鍾意咩類型男仔。」

近日除了林峯被爆跟內地女星潘霜霜的秘戀外，Ron也被指與內地女模張馨予搭上，早前更有指二人穿情侶鞋，Ron對此沒好氣說：「對波鞋係贊助商送，公司好多人都有，男藝人係唔係唔可以有女性朋友呢？做娛樂圈嘅人係咪唔可以有女仔坐喺旁邊呢？永遠一大班人食飯，張相一定會Cut咗其他人，只剩低我和個女仔。」

被指是「姐仔屠夫」，Ron不擔心形象受損，因為清者自清，不過藝人也是正常人，也渴望有感情生活，Ron謂將來拍拖不想偷偷摸摸，反而想大方公開，「同我交往嘅話，女方一定好大壓力，唔可以單獨出街，公開場合更加難。如果真係拍拖，總有一日會被人影到，不如公開更加好啦。我好重視第一個感覺，無限定圈內或圈外，有啲女仔可能唔算好靚，不過會好吸引你望佢，可能將來我拖住一個又肥又唔靚嘅女仔，我鍾意就得啦，吹咩？我好相信自己嘅感覺。」

Ron已年過30，父母卻沒有催婚，「父母好少問又好少理，都成30幾歲人，真係拍拖的話，自自然然會帶返去見佢哋，做舞蹈員個陣都帶過女友返去。父母以前反而會叫我唔好拍拖，因仲未有經濟支柱，做好事業先講啦。現階段又無催我，如果拍拖好穩定的話，都會帶畀媽咪見面溝通吓，唔會玩玩吓。」

Ron澄清自己絕非甚麼屠夫殺手，若果將來拍拖，更想大方公開。