黃翠如着泳衣拍《走過浮華大地2》吳卓羲儲三千萬老婆本

遊遍世界各地嘅黃翠如,刚又同緋聞男友洪永城去到到亞洲四個國家拍完旅遊節目《走過浮華大地2》,今日翠如BB同吳卓羲出席大埔一個活動,翠如BB話有出版商邀請佢出旅遊書,可惜趕唔切,加上佢話唔會有人搵佢出寫真:「我應該着衫同唔着衫大家都冇乜興趣,今次拍外景都有着泳衣,不過被洪永城佢哋嫌棄,因為之前瘦咗六磅。」洪永城咁唔識趣呀?

另外,吳卓羲剛剛喺深圳拍完兩個月劇集回港,就要投入《衝上雲霄II》宣傳活動,以及下半年開新劇,佢話仲想多啲機會賺人仔,問佢搵夠3千萬買樓未,佢話首期夠都會諗下筆供款,不過佢話3千萬豪宅係結婚安樂窩目標,到時仲會同媽咪住。至於點處理婆媳紏紛,佢話:「所以咪要買大屋,最好有幾層,佢哋嘈我就匿埋。」至於係咪接陳豪捧做筍盤?吳卓羲話:「若果單身係筍盤,我就係,若果要有3千萬買樓我就唔係。」

吳卓羲 黃翠如出席活動
吳卓羲及黃翠如今日出席活動。

黃翠如拍《走過浮華大地2》外景着泳衣
翠如BB拍外景着泳衣,但畀緋聞男友洪永城嫌棄。

吳卓羲 黃翠如出席活動
吳卓羲話想賺多啲人仔。