模特兒傅嘉莉（Kelly）因拍TVB劇《衝上雲霄II》而跟吳卓羲傳出緋聞，其實大家屬靚仔靚女，男未娶女未嫁，拍拖好正常，最重要是吳卓羲確是Kelly杯茶。對於擇偶條件，28歲中德混血兒Kelly話最愛幽默系人士，那吳生呢？她笑得極甜：「其實卓羲都好幽默，我本身好認真又緊張，如果身邊有個咁嘅人好開心。」她更漏口風話：「我哋啱啱開始，佢好畀心機做嘢，唔想感情事打擾大家嘅事業。」

撰文：李佩儀 攝影：李維隆 髮型：Ray Mork@Chin.G 服裝提供：Pinko

Kelly最近人氣急升，除拍劇和拍電影外，更首度成為Oasis Beauty的代言人。為此她食得健康又不斷做運動，現時的身形玲瓏浮凸Fit到爆。她首部TVB劇集《衝上雲霄II》又即將在下月15日播映，星途相當燦爛。她坦言最初未習慣拍劇，所以好緊張，但拍拍吓就開竅，並很期待自己的演出。問她出席宣傳活動時，與緋聞男友吳卓羲同場會否尷尬，她卻老定說：「唔會，其實佢幾玩得㗎！」答得相當權威。

Rap出愛火花

Kelly直言很喜歡吳卓羲這類型的男仔，問她的擇偶條件時，她表示要孝順、愛自己、體貼細心和凡事有承擔，數到幽默這一項時，她突然笑得好冧咁話：「其實卓羲幾幽默㗎，佢會講好多笑話，印象最深刻係喺三亞拍劇時，大家都熱到爆炸，好辛苦，但佢突然會唱啲低能歌，又不斷喺度Rap，搞到導演叫Action，我仲喺度笑緊。」Kelly本身認真又緊張，如果身邊有個風趣的男朋友，一定會好開心，她更帶着欣賞的眼神說：「佢咁攰咁辛苦，仲要諗點樣令人開心，係唔容易㗎！」

擔心男友辛苦

事實上，Kelly覺得大家都是單身，拍拖都好正常。談到吳卓羲最近忙於在內地拍劇，她更戥他辛苦：「佢真係好忙，唔好再加壓力喺大家身上。」其間她突然漏口風話：「我哋啱啱開始，佢好畀心機拍劇，唔想一啲嘢打擾大家嘅事業，唔值得嘅。」不怪得一路問她兩人有冇發展機會時，她唔敢斬釘截鐵話無：「我真係唔知第時會發生咩事，我今日講無，第日一齊我咪自打嘴巴。」現在兩人關係應該一清二楚吧，認真恭喜晒！

身形Fit爆的傅嘉莉，向大家展示修身成果。

在《衝上雲霄II》裏，傅嘉莉和吳卓羲有不少親密的對手戲。

形象健康

傅嘉莉，03年出道時有「翻版徐子淇」之稱，形象健康，甚少傳出緋聞，只與組合Square成員李柏煥（Brian，見圖）拍過拖。

溝女高手

33歲的吳卓羲被指是「花心男」，溝女招數層出不窮，不少與他合作過的女藝人都中過招。
官恩娜

05年拍《酒店風雲》時撻着，可惜二人拍拖兩年後終告分手。

佘詩曼

被拍得鬼祟匿入吳卓羲座駕，更有指男方獲女方送贈百萬波子。

馬賽

09年拍《女王辦公室》時，有指二人秘密同居馬賽親戚名下的何文田帝庭園。

徐子珊

11年拍《法證先鋒Ⅲ》時二人擦出愛火花，收工後經常食飯撐枱腳。

張馨予

她去年在吳卓羲微博上載牀照，令男方承認戀情，惜最後因吳卓羲偷食而玩完。

梁靖琪

去年9月二人在海南島拍《衝上雲霄Ⅱ》時，被指半夜摸黑潛入泳池肉搏。