吳卓羲緋聞魔咒

無疑,吳卓羲(Ron)與Issac是密不可分。十年前,他在劇集《衝上雲霄》飾Issac彈起,劇中的他任性反叛、處事莽撞草率,激到Sam哥嘔血,而現實的阿Ron則受緋聞困擾,一度影響事業。十年人事幾番新,《衝上雲霄II》的Issac脫胎換骨,懂人情世故,令Sam哥感安慰。巧合是阿Ron在娛圈經歷十年風雨,悟出了處世之道。也許,他會跟隨Issac的步伐,事業再上雲霄。

撰文:王崇穎

第一輯《衝上雲霄》愛情三角錯,第二輯同樣感情錯亂,雖然上輯由胡杏兒飾演的Zoe與吳鎮宇飾演的唐亦琛修成正果,可惜最終Zoe因先天性心臟病去世,來到《衝上雲霄II》又有胡杏兒,今次化身較硬朗的夏晨,跟吳鎮宇細佬吳卓羲發展感情,難免令人覺得亂。

吳卓羲
■出道至今,吳卓羲一直獲無綫力捧,雖然星途未算一帆風順,但總算站穩一線之列。攝影:黃偉雄

阿Ron對於劇中錯亂感情表示絕非同一女,他日前接受專訪時說:「成套劇只有四個角色同上輯有關,我、胡定欣、馬國明同吳鎮宇四個,其實劇入面胡杏兒喺機場做飛機維修所以會撞到,我第一眼見到佢嘅時候,我都以為自己撞鬼,之後因為想知點解會有個咁似我阿嫂嘅女仔,加上我好怕阿哥見到佢又諗起Zoe,所以劇入面我哋都會盡量唔好俾阿哥撞到佢,但久而久之了解之後對杏兒又有另一種感覺,起初都擔心阿哥會介意,但原來阿哥一向都唔介意,因為佢都覺得杏兒除咗樣似之外,其他完全唔似。」

要數吳卓羲最轟動緋聞,定非跟官恩娜的一段情莫屬,事件更令男方形象大受影響
■要數吳卓羲最轟動緋聞,定非跟官恩娜的一段情莫屬,事件更令男方形象大受影響。
資料圖片

幾乎每次拍劇都惹緋聞,今次的幸運兒是傅嘉莉,不過吳卓羲強調兩人絕冇可能
■幾乎每次拍劇都惹緋聞,今次的幸運兒是傅嘉莉,不過吳卓羲強調兩人絕冇可能。
資料圖片

吳卓羲曾高調地愛內地女星張馨予
■吳卓羲曾高調地愛內地女星張馨予,可惜兩人最終分手收場。
資料圖片

樂意拍咀戲

阿Ron表示今次總算有不同結局,至少他與杏兒有開心結局,問到兩人會否有大膽親熱戲?他坦言幸好親熱戲未有集中於自己身上,他說:「今次我都算好彩,呢方面交晒畀馬國明同張智霖,我同杏兒都只係點到即止,我個人唔會太抗拒親熱戲,但最好要配合劇集同有咁嘅需要,監製要我咀我咪咀囉!」

問到會否介意不及其他男演員有艷福?阿Ron笑言:「唔會喇!我都冇刻意要求,可能張智霖佢自己有親自向公司要求喇,呢樣我就唔知,劇入面張智霖成日換女,我係負責出面幫佢擺平感情糾紛,我同佢亦師亦友,總之佢叫到,我都要幫佢。」當問到現實中是否掉轉,經常找友人幫自己擺平?他即說:「冇人叫過我咁做,我亦都唔會叫人去做呢啲事,我比較親力親為。」

對於今年無綫劇集收視長期仆直,可曾擔心過《衝II》?阿Ron說:「我自己對今次收視好有信心,因為呢十年好多觀眾都問幾時開續集,而且近排又重播過第一輯,依然令觀眾有話題,講咗十年都仲有話題去講,加上吳鎮宇同張智霖又係收視保證,所以收視呢方面我唔擔心,呢啲就交畀佢哋負責。而且成套劇又有靚人靚景,去咗好多個地方拍攝,所以都會有信心,我個人今次嘅功能只係一個演員,我會抱樂觀態度。」

在《衝上雲霄》胡杏兒是吳卓羲大嫂,來到續集(右圖)卻變成女友,難免令人容易產生混淆。
■在《衝上雲霄》胡杏兒是吳卓羲大嫂,來到續集(右圖)卻變成女友,難免令人容易產生混淆。
劇照

在《衝上雲霄》胡杏兒是吳卓羲大嫂,來到續集(右圖)卻變成女友,難免令人容易產生混淆。
劇照

謝絕傅嘉莉

近年甚少留港拍劇的阿Ron,大部份時間於內地拍劇搵真銀,不僅豬籠入水,還助他遠離緋聞,皆因入行以來緋聞多得令他喊驚,可惜今次一回港又出事,跟同劇演員傅嘉莉鬧緋聞,雖然女方大爆兩人發展中,但阿Ron坦言與對方沒可能,他說:「我同佢、杏兒喺劇入面係會有三角關係,戲入面佢係會鍾意我,但現實我就唔知,總之我同佢拍完之後都冇接觸過,只係見過一次,仲係一大班演員同工作人員喺公司食飯。」

對於傅嘉莉自稱發展中,阿Ron說:「我有問過佢呢件事,佢話係當日同佢做訪問嘅記者扭曲事實,佢話根本冇講過呢番說話。」雖然阿Ron入行十多年一直有緋聞,但他堅稱絕不會靠緋聞上位,認為演員靠實力才能令人刮目相看,故他亦一直朝這方向發展,絕不想自己的努力被緋聞毀於一旦。對於兩人的關係,他斬釘截鐵說:「我同佢以前冇拍拖,o依家冇拍拖,將來都唔會有可能拍拖。」

小小收成期

內地拍劇雖然錢途無限,但吳卓羲坦言不是忘本之人,即將會為無綫拍新劇。
■內地拍劇雖然錢途無限,但吳卓羲坦言不是忘本之人,即將會為無綫拍新劇。

近期努力北上搵錢的阿Ron坦言十分享受目前生活,有指他早前豪氣購入千萬豪宅,他坦承是買來自住,並說:「其實都入行十幾年,自己一直都好努力工作,o依家都可以算係小小嘅收成期,都想屋企人住得舒服啲。」阿Ron表示內地有內地拍劇的好,在無綫拍劇亦同樣有得着,故年尾會為無綫開劇,他說:「嚟緊會返TVB拍劇,唔可能一直都喺外面拍劇,雖然出面會比較舒服,休息時間比較夠,但係始終我係TVB出身,先有o依家嘅回報。」

對於有指無綫明年會規定有時間供演員休息及有足夠的劇本才開拍,他說:「係就當然好啦!如果公司有時間畀演員休息,拍出嚟都醒神好多,以前有四個鐘都已經好滿足,總之對大家都會有得着。」

■吳卓羲在內地人氣不俗,拍了多部電視劇,於《生死諜戀》更化身型爆特務,迷倒不少女fans。
■吳卓羲在內地人氣不俗,拍了多部電視劇,於《生死諜戀》更化身型爆特務,迷倒不少女fans。
劇照

近年努力在內地賺人仔的吳卓羲,最近以近900萬購入深井碧堤半島逾千呎單位。
■近年努力在內地賺人仔的吳卓羲,最近以近900萬購入深井碧堤半島逾千呎單位。