吳卓羲(Ron)相隔10年再參演《衝上雲霄II》飾演同樣的角色「Isaac唐亦風」，十年前Ron被力捧上位更涉足歌壇；十年後的今日看似原地踏步。俗語有云：「人生有幾多個十年」，外間可能覺得他Hea沒有野心，Ron坦言自己不是一個踩人膊頭上的進取型份子，但有工作絕對會盡力去做到最好，這些年亦開拓了內地市場。做藝人表面風光但背後壓力何其之大，外人又怎能體會？自己只是學會從工作和私生活之間找個平衡點，讓自己喘息、回氣後再繼續發力。

現年33歲的吳卓羲回想十年前首拍《衝上雲霄》與現在的分別，他不假思索地說︰「梗係老咗、成熟咗、長大咗啦！十年前劇中我係一個小朋友，鬥氣去考飛機師，?家係副機師，行出嚟要演得比較成熟啲。」重提十年前曾被吳鎮宇狠批演技一事，Ron坦言︰「十年前我係最新入行嘅新人，鎮宇當時唔話我都冇可能，佢係對工作好認真，我做得唔好影響到個劇又影響埋佢，佢話我都係想教我做好戲。十年後再合作，我長大咗，?家佢係用朋友心態去對我，會拎住個劇本同我討論點去演。」

私下稱鎮宇大佬

再拍《衝II》後Ron表示和鎮宇關係變得親密儼如親兄弟，他說︰「大家相處耐咗佢真係當正我係細佬，我亦當佢係大佬，拍完劇佢如果仲喺香港，佢都會隔個星期就約我食飯，成日同我傾偈，傾吓演戲講吓笑，你窒吓我、我窒吓你咁，可能佢見我大個咗，傾到偈可以交個朋友。?家傾電話我都叫佢大佬，其實私底下佢係大細路、好幽默。」

提到十年前Ron初出道，即被公司力捧上位，更涉足歌壇，可惜之後放軟腳步，面對突如其來的事業高低潮，要如何面對？Ron不諱言道︰「入行已經好明白呢樣嘢，高潮唔好驕傲，唔開心實有，最重要係點去協調，娛樂圈係偏門，每一日運程係好似坐過山車，低潮嗰陣試過因為負面報道同緋聞唔夠膽出街，會驚人哋點諗我，驚人指指點點，之後諗通我又唔係殺人、又唔係強姦犯，點解要為啲負面新聞抬唔起頭出街呢？又會諗隔一、兩個禮拜後人都唔記得，又輪到第二個，從中我就協調同諗通咗，人就係咁樣慢慢長大。」

工作生活尋平衡

近年開拓了內地市場，多在內地拍劇賺人仔的Ron，看似被同期的林峯、黃宗澤及馬國明爬頭，對此，他坦言不會妒忌︰「每個藝人崗位唔同，咁多個劇咁多廠，唔會全部我拍晒，有新劇時林峯未必輪到我，個崗位係你嘅誰也搶不了誰。我同林峯都講到明，唔會話呢個工作你有我冇唔開心，你好我都開心，我有你都會戥我開心，大家並駕齊驅，咁樣先係朋友。」談到外間感覺上他較Hea，鬥心不大，Ron解釋自己只是學會從工作和私生活之間找個平衡點：「鬥心一定係有，但過份Over會好吃力，日做夜做瞓得兩個鐘已經好辛苦，仲要去諗同人點『鍊過』，真係會好辛苦﹗我以唔踩住人哋膊頭上位為大前提，有上進心但唔會害人，我試過畀圈中人害過，我心諗我唔害你做乜害我呢?我最徬徨嘅時候，係有人搶走我準備好嘅工作，但我宗旨係唔會伸人一腳，有工作就盡力去做好自己本份，要過到自己。」

至於成家立室的問題，Ron表示身邊很多同齡朋友都已結婚生兒育女，但自問心態上未準備好，他說︰「玩人哋小朋友就好玩，但做人爸爸真係要有責任感，去湊住個小朋友等佢有父愛，我未諗得通去組織一個家庭，?家都係努力做嘢先，要畀到屋企溫飽、舒適先去做呢樣嘢，想將來小朋友同老婆，喺快樂環境去生活，唔會因為冇錢而惆悵。」

後記：古仔係伯樂

Ron未入行前是一位舞蹈員，因為幫古天樂(古仔)主唱的《今期流行》伴舞，而被古仔引薦入行。Ron憶述其實當時第一時間婉拒古仔好意，過程其實很搞笑：「佢走埋嚟問有冇興趣做幕前，我話我冇興趣，我又唔識演戲，有興趣就唔係考Dancer去考藝訓班啦，跟住佢就話︰『冇乜興趣？轉啦﹗』之後藝員部高層真係打嚟叫我轉做藝人，當時我Dancer約仲未完就轉咗。」