音樂人伍樂城下月底在紅館開騷，卻請來杜汶澤做嘉賓，兩男大纜扯唔埋，阿澤解釋他們是中學同學，那些年一起成長，friend過打band。阿澤雖然非唱家班出身，但勝在夠爆笑兼有義氣，他們同台必產生另類化學作用。阿澤日前與伍樂城一起接受訪問，話題本來講演唱會，阿澤卻向對方追討他當年擁有由陳寶蓮做封面的《Penthouse》的下落，令伍樂城尷尬不已。

伍樂城96年出道，入行18年，下月29和30日首次在紅館舉行名為「伍樂城幻想國度作品演唱會56X Live2014」作品展，演出嘉賓包括Twins、陳慧琳和衞蘭等女歌手，男歌手呢？海報中出現的竟然是杜汶澤。阿澤竟然勁過與伍樂城合作過的男歌手謝霆鋒、鄭伊健和陳小春等，難以置信，連阿澤日前也不禁自嘲說：「係呢，我都唔知自己嚟做乜？嚟拎咪囉！請我做嘉賓，真係想賣飛都難。」

■伍樂城（左）和阿澤是中學同學，入行18年的伍樂城開作品展，阿澤義不容辭支持老友。

笑談遺失寫真

二人識於微時，是中學同學，年輕時一起夜蒲過，伍樂城要開演唱會，第一時間想起阿澤，他說：「請佢直接啲講係想拎佢嘅idea，佢係好有創意嘅人，可以畀啲input，我同佢睇嘅事好唔同，希望有一個化學作用，喺紅館呢個舞台上做一啲平時未必大家睇到嘅嘢。」

伍樂城一臉正經解說完，阿澤就嬉皮地說往事：「其實我成日都想問番你，究竟陳寶蓮做封面嘅《Penthouse》係咪你借咗唔還呢？因為我每次見到啲中學同學都會問一次，究竟邊個借咗我嘅呢？喂！大佬搵唔番呀！睇開有感情㗎嘛，晚晚都拎住嚟瞓，借咗唔緊要，趁o依家呼籲吓，如果邊位借咗我本陳寶蓮封面嘅《Penthouse》，可唔可以還番畀我呢！」伍樂城尷尬笑言：「我同你唔同年代㗎。」

伍樂城表示演唱會想加點黑色幽默，很多歌大家可能耳熟能詳，但他想以另一個角度表達出來，讓觀眾有不同感覺，看似簡單的事，原來可以更有驚喜，這是他最想要的效果。沒有一個特定想表達的主題，看騷是一個過程。完騷後大家感覺好看，會記起這個騷，這是最重要的。

唱霆鋒經典作

阿澤必然是其中一個驚喜，他笑言：「紅館我好有經驗㗎！上次黎明演唱會我都做咗七part啦，舞都跳埋，搵得我嚟都係想搞吓娛樂嘢箒。」阿澤還自薦唱謝霆鋒的《非走不可》，他說：「呢首我飲歌嚟㗎，每次唱都好受夜總會小姐歡迎。但我又怕到時我唱，個個以為係霆鋒出嚟，咪會俾人噓爆，做乜咁蝕底，好戇居㗎喎！一係我唱肚腩大過lin（戀愛大過天），喂，呢隻係好嘢嚟㗎，我覺得你作得最好同最鍾意你呢首歌。」

伍樂城對住阿澤全無招架能力，只能陪笑和滴汗，雖然如此，伍樂城毫不尷尬，因為阿澤的義氣大於一切，伍樂城說：「好開心阿澤可以做我演唱會嘉賓，佢真係好爽快，我打畀佢，講咗一半就已經應承咗，唔知係咪我講嘢太慢，唔想我講咁耐。」阿澤解釋：「呢個係習性嚟，中學同學打嚟你會即刻應承，唔知點解喎。雖然大家各行各業都有，唔係話好緊密，但一出聲就一定幫手。」或許人長大了，更加珍惜兒時一起成長的好夥伴，尤其在同一圈子中打拼，互相幫助是常識吧！