杜汶澤昨晚出席伍樂城音樂會時，在台上自爆早兩年曾力邀英皇老闆楊受成出錢拍英皇電影《DIVA 華麗之後》，揚言要捧女主角容祖兒（Joey）奪影后，結果Joey得不到任何獎項，相反阿澤憑此片奪得《第十九屆香港電影評論學會大獎》「最佳男演員」。

一向搞開Gag的他笑言自己搵了Joey笨：「佢啱啱喺後台先發現我搵咗佢笨，所以我送呢首歌畀佢，希望佢永遠都唔會遇到我呢類衰人。」

此言論一出，Joey即在社交網站鬧爆阿澤，指他傷害人為樂，並直言阿澤是她在娛樂圈中唯一一個討厭的人，Joey留言：「民主英雄杜汶澤，本人從來做好本份，人家給我機會我努力把握，拍《Diva》從來不是為攞影后，但你這麼一個成年人，又能什麼時候學識不撩事鬥非，不踩低人去抬高自己；你幫過我，我感謝你，但你自恃口才了得不止一次傷害人為樂，我真的看不過眼，無論你怎樣得包裝你的形象，你就是我在娛樂圈中唯一一個討厭的人，江山易改，本性難移就是如此，佛都有火也是如此。」

杜汶澤向祖兒公開道歉

杜汶澤今午在facebook火速向祖兒致歉：「就於昨夜我在中學同學伍樂城的演唱會上，本人為求增強氣氛，在沒有清楚考慮過的情況下，說了一個不應說的笑話，現在本人以最誠懇的態度，向容祖兒小姐致歉。我生平從來沒有因為自己說過的任何一句話而後悔過，這一次是唯一的例外，因為我很珍惜這段友情。多謝你給我『民主英雄』的稱呼……至於其他無謂的笑話，經過這件事之後，我會少說，不求原諒，只希望你一切安好！對不起！」

今晚近7時，戴住黑超、身穿白衫嘅祖兒，抵達紅館為伍樂城演唱會綵排。祖兒下車時，傳媒請佢傾幾句，但只係回頭揮手示意，表示唔做訪問。

至於杜汶澤夜晚再更新fb就發言致歉：「作為一個喜劇演員，當然最重要係搞笑！但係，有時為求效果，可能會傷害咗人而自己都唔知，其實咁做好唔啱。更何況，如果我真係希望能夠成為一個維護公義、為民請命嘅藝人嘅話，我係好應該更加慎言，以保我個人嘅說服力。今次事件，應該好好檢討自己，咁樣唔單只對唔住朋友，而且對唔住自己嘅崗位。我以後應該小心啲。」

兩人本來有機會在今晚第二場伍樂城紅館演唱會上碰頭，可是杜汶澤在開騷前個多小時、透過經理人公司高層霍汶希轉述：「演出係為撐同學伍樂城，本來答應演出埋兩場，但唔想焦點落喺我同祖兒嘅事上，影響咗台前幕後工作人員嘅心血，所以我取消喺第二場嘅演出，已經同大會講咗我唔出席。」

祖兒講明：唔想再同杜汶澤拍戲

完騷後，祖兒受訪，佢話心情冇乜嘢。提到阿澤兩度公開道歉，那可有致 電給她親自道歉？祖兒話:「冇喎。」係咪驚咗你？佢話:「唔係。」

祖兒話有人俾過佢睇阿澤fb道歉文字，是否原諒？佢話:「睇表現，觀察一陣先，因為唔止我一個受害者。我自問唔係一個衝動嘅人，希望多一個朋友，少一個敵人。」

之後祖兒再謂:「講真，我係唔係衝動，只係希望教訓佢一下，其實真係唔只一次。」問佢阿澤之前仲有講乜？祖兒就表示唔想再多講。

對於黃秋生之前曾指阿澤眾叛親離冇晒朋友，問祖兒是否認同？ 祖兒小心地謂:「秋生我好支持佢，但經過今日，自己唔想再講，唔想變成是非，純粹只係想教訓下佢(阿澤)，其實鬧人同生氣，係好傷身。」

眾所周知，祖兒平時真係絕少咁樣鬧人，仲講到阿澤係佢唯一討厭嘅人，祖兒認真地謂:「咁你都知嚴重性啦。」但兩人共同經理人Mani霍汶希夾在中間好難做，祖兒話:「我自己有唔好意思，但佢嘅崗位，冇法子，佢都慘。」佢話今日有見到Mani。至於之前是否知道阿澤缺席今晚伍樂城演唱會？祖兒謂:「我唔知喎。」唱番阿澤之前唱嘅《逃避你》，亦係rundown一早定咗，唔係臨時改。

講到尾，祖兒會否因此事而避開阿澤？佢話:「工作嘅嘢一路唔會影響，好專業。搞氣氛有好多方法，克勤係一個搞氣氛能手，佢令大家好溫暖、舒服、有愛感覺喺裡面，呢個至係搞笑最高境界。」那會否減少接觸阿澤？祖兒話:「做朋友不應互相傷害。講埋今次唔想再講。」

對於是否原諒阿澤，祖兒再謂:「君子之交淡如水，可以觀察，俾啲時間。」雖然唔會避合作，但講到拍戲，佢就話:「拍戲就唔好喇。」至於件紅衫是否想帶出「佛都有火」？祖兒聞言即笑笑口話:「一早揀咗嘅，可能係天意。」

最後祖兒謂:「總之我真係唔想講太多，我都係容講錯嘢嘅人，表達咗立場已OK。」師兄劉浩龍可有慰問？佢話:「今日好忙，冇乜講電話，亦唔要需大家安慰，唔需要朋友表明立場。總之講埋今日，就唔再講喇。」