《Running Man》襲港 「飲茶」變「淫差」

韓國人氣綜藝節目《Running Man》嘅金鐘國、Gary、池石鎮同啱啱做咗爸爸嘅哈哈,今日下晝再度襲港,令粉絲迫爆機場,佢地都好親民,仲同大家握手。

佢哋之後喺旺角朗豪酒店開記招,繼續表現親民,仲用廣東話同國語同傳媒打招呼。而當大會司儀一提到點心同飲茶,佢地仲失控用廣東話大叫「點心」!「飲茶」!不過…….佢哋將「飲茶」講咗做「淫差」,全場爆笑。

恨夜蒲恨到出晒面嘅Gary話:「好想去夜店,好想知道香港嘅夜店係點。」佢仲大讚現場嘅女記者好靚。其實之前成龍做《R M》嘉賓嗰陣話過,如果佢哋嚟香港會請佢哋食飯,不如索性叫成龍帶佢哋去蒲啦,不過池石鎮話:「成龍話過會開Home Party,不過我哋冇佢電話。」池石鎮仲大呻拍《R M》不知幾辛苦:「自己坐喺室內做MC做咗15年,突然要加入《R M》喪跑,體力比較辛苦,好多時跑唔贏後生仔。」其他成員聽到佢咁講,即刻笑佢老,場面好搞笑。而問到之後嘅粉絲見面會,池石鎮又爆響口話會唱陳奕迅嘅歌。四位有問必答,不過當記者想問無綫節目涉嫌抄《R M》,大會就將問題河蟹咗!而司儀則打圓場說:「總之玩得開得心就得啦。」


《Running Man》四子開記招,笑料百出。


池石鎮


Gary


哈哈


金鐘國


金鐘國同哈哈咬耳仔,傾啲咩呢?


Gary、哈哈同金鐘國笑池石鎮老,全場爆笑。