從電影認識李璨琛（Sam），給人感覺草根、自我，有點壞的形象，直至最近跳入電視圈，首個角色令他吸納很多家庭觀眾，人氣急升。究竟Sam在現實生活中是一個怎樣的人？Sam除了是個專業演員外，更對將來懂得打算，作為一個自家品牌Subcrew的老闆，Sam堅持親力親為，不怕辛苦，將生意打理得井井有條，終於，他現時擁有多間分店，成績有目共睹，亦令曾經一度想過放棄這個兒子的李爸爸，也因為Sam的努力而感到自豪。
<採訪>林爽兒<撰文>黃曉妍<攝影>吳國明<服裝>Subcrew
拍電影無數，入無綫拍劇也是第一次，Sam雖然當時不知道自己的角色會否受觀眾歡迎，但因為朋友的「睇死」，於是Sam就決定演出，回想見監製的一刻，Sam坦言很驚訝，說：「其實事出突然，監製唐基明打畀我，問我有無興趣拍劇，仲叫我去TVB見下面，我聽完成個故事，我飾演社工呢個角色，覺得好surprise，不過我覺得呢個角色好啱我，但我女朋友聽完之後就喪笑『你做社工？』個個朋友又覺得我唔得，所以我更加要拍。」《怒》劇出街，Sam看到自己的演出，認為不太滿意，但尚算合格，他發現自己仍有進步的空間，說：「電視同電影嘅演繹方式係唔同，電視好似舞台劇，靠自己去構思、編排個角色，好多細位都係靠自己消化角色，加上四個導演去拍，四個人嘅諗法又唔同，所以係好個人發揮，希望可以拍續集，憑自己今次嘅經驗，到時可以做得更好。」
在無綫拍劇，藝員要日接夜，夜接日，過着非人生活，Sam表示試過有三至四天，每日朝早六點開到凌晨三、四點，不過他不怕辛苦，說：「點都有時間休息嘅，其實拍劇呢兩個月，大家嘅相處令我好珍惜，拍完都好唔捨得，無辦法啦，見佢哋多過返屋企。之前有人問我，由電影轉去電視，會唔會覺得貶低自己，我就唔覺得，兩者分別只係電影係畀錢睇，電視係打開電視睇，其實拍電視劇好靠自己。」
做生意親力親為
為了將來的打算，Sam除了當演員外，還嘗試創業，現時生意也上了軌道，他堅持一個信念，就是「力不到不為財」，說：「我膽粗粗同幾個朋友開意大利餐廳，我對飲食唔熟，自己咪要投入啲，一有時間就去餐廳同顧客傾偈，同同事溝通下，邊做邊學，當然同幾個拍檔要互相信任。」
擁有潮流觸覺的Sam，亦有自家品牌Subcrew，由於在本港潮界地位舉足輕重，近年分別與不同著名品牌crossover，說：「最初係自己設計，有咗設計先，好嘢自然有人搵。」由演員搖身一變成為創業潮人，全因演員太過被動，手停口停，說：「有人搵就有機會，全不如自己去搵機會畀自己，有時基本嘅生活都維持唔到，我試過一兩日、甚至大半年都無飯開，就算我唔食，其他所有嘢都係錢，雖然我以前係水電技工出身，但我返唔到轉頭，例如我拎住兩個馬桶，人哋以為『你拍戲呀？』老實講，我自己都放唔低演員呢個身份。」
Sam小時候不愛讀書，亦不是出身於富裕家庭，十五歲時就想過不再讀書，早點投身社會，他笑說：「當時我同老竇講，我去學剪髮，我老竇話『唔得，一係跟我去果欄返工！』於是我每晚十二點起身返工，每晚推住好多箱水果。」何解？這應該歸咎於香港的教育制度吧！Sam說：「我小學成績好好，記得小學六年級，我考頭五名，然後仲入到慈幼英文中學，死喇，所有課程都係英文，於是我嘅成績就大起大跌，上補習班又無補於事，後來我咪成日流連太古城嘅冰場囉！有次撞到小學同學，佢又係唔讀書，於是佢學電器，我學水喉，我哋試過喺地盤做非法童工，一日有一百蚊喎，梗係做啦，我老竇唔鬧？無呀，因為佢始終覺得剪頭髮係不務正業。」
回想97年被陳果導演帶入行，很多人都指Sam生不逢時，因為當年正值電影不蓬勃的年代，不過Sam十分幸運，憑住首部電影《香港製造》獲頒金像獎「最佳新演員獎」，之後更接下十多部片約，說：「我當時搵到錢，但又唔識儲錢。」
學會有危機感
生活風光令他忘記危機感，03年香港爆發沙士之疫，令到全港市民人心惶惶，Sam說：「無工開，無嘢做，每日瞓到三四點，然後落樓下食嘢，夜晚約朋友飲酒，當時心諗『得啦，自然有人打嚟！』如是者，坐咗九個月，個人開始慌，戶口又少咗零，於是我開始有個諗法，就係造衫，自己又鍾意設計，又要買衫着，當時我遇到一班滑板朋友，其中有個朋友係開滑板舖，佢有途徑攞貨，又認識呢行嘅人，所以我哋造咗第一批帽，大約三十至五十頂，一個款有兩隻顏色，因為帽容易處理，唔多花巧，開頭係有困難，因為造嘅量少吖嘛，好多廠都唔會做，有啲做咗又唔係自己鍾意。」他指着自己的上衣，「好似呢啲併布，將塊布左疊右疊咁縫，唔係間間廠都肯做，所以我哋不停去問，不停去試，睇吓有無人肯做。」何不自己開廠？Sam坦言很有難度，說：「牽涉太多嘢，我只係希望可以喺內地各地開分店，因為香港租金實在太貴，好彩都行得幾順利，之後我會喺內地開多兩至三間分店，都係瀋陽、成都呢類嘅二線市場；我試過喺一線市場上海開分店，入唔到商場係做唔到，街舖又做唔到，因為有錢嗰班客人寧願選擇有名嘅名牌子，對我嚟講，係一個幾好嘅經驗，唔係下下都成功，要不停宣傳，凡事親力親為，乜衫都着上身，唔好怕辛苦，因為夏天要影秋冬裝，冬天要影春夏裝，所以演員身份對宣傳係有一定嘅幫助，以半個藝人身份去做，叫人接受呢個品牌都會容易啲，一定要識得自我宣傳，當然我仲有一班朋友好幫我。」
真正的長大了
曾經想過學剪髮、曾經跟爸爸每晚到果欄開工、曾經做過地盤非法童工、曾經是一名水電技工，相信李爸爸從來沒有想過，當日不愛讀書的兒子李璨琛，現在已經真的長大，為自己、為家庭作出承擔，有自己的事業理想，在演藝事業上，沒有人不認識李璨琛，在生意上，他能夠將自家品牌Subcrew搞得有聲有色，在市場有一定的地位，Sam微笑道：「我爸爸都好安慰，好開心，畢竟佢曾經一度想放棄我呢個仔。」有了事業，成家立室也是理所當然，去年年底跟女友求婚成功的Sam，他透露明年11月中會跟女友舉行婚禮，組織一個幸福家庭。為何要籌備這麼久？Sam說：「我先定咗日子，然後喺呢段時間努力咁工作，將工作搞掂晒，先至再專心搞婚禮嘅事。」在整個訪問過程中，記者對李璨琛這個人加深了認識，更可以說是另眼相看，原來他不是一個吊兒郎當的人！
