自言入到廚房就會變問題兒童的鄭秀文（ Sammi），廚藝只屬幼稚園程度。鄭大小姐曾有將鹽當糖用的紀錄，烏龍百出已經屬於指定動作。不過踏入兔年， Sammi決定挑戰自己，學習炮製新年糕點，要成為一名出得廳堂，入得廚房的時代女性，為他日作為人妻鋪路，看來廚房對 Sammi而言的確有着特別的意義。 撰文：李珮洳
從前一直被鄭秀文纖瘦的身形誤導，以為 Sammi都視減肥為終身事業，也誤認為她不好美食的同時，原來她非常享受跟好朋友相聚，共享美食。近日她更愛上下廚，不時鑽研廚藝。自多年前頒獎禮上許志安發表廚房宣言後，原來廚房對 Sammi仍有着特別意義。
今日年初二， Sammi恭祝大家兔年「兔氣揚眉」。
日前 Sammi抽時間學習炮製蘿蔔糕，希望新年能讓家人品嚐一下她的手勢，也趁新正頭祝願本報讀者「兔」氣揚眉，跟讀者拜年。當 Sammi入到餐廳的廚房，表現得十分好奇，見到大廚更化身問題兒童般每事問。例如製作蘿蔔糕需要粘米粉及生粉， Sammi竟然搞不清楚粉類的分別，她說：「粘米粉係咪即係鷹粟粉呀？」之後在混和粉漿時又笑言感覺像敷面膜，令身旁的大廚都忍不住取笑她說：「你一定好少入廚房。」 Sammi其後成功弄出一底蘿蔔糕，更親手煎糕給助手及工作人員吃。
未有撚手菜
外形纖瘦的 Sammi於新年期間最愛品嚐賀年糕點。
Sammi指一直都以為蘿蔔糕的製作過程十分繁複，她說：「我成日都覺得整糕好難，所以從來冇諗過要學，頭先個大廚仲畀咗份食譜我，我有時間都可以跟住整，或者叫朋友整畀我食又得。」原來 Sammi最近愛上烹飪，不過至今仍未成功炮製到一味撚手小菜，她自言沒有下廚的天份，她說：「我阿爸整嘢好叻 o架，未中風前都係佢煮嘢畀我哋食，媽咪就一般啦，我就完全得唔到爸爸嘅真傳，反而家姐就學到，所以家我都係跟家姐學煮嘢食，好遺憾仲未成功。」
問到 Sammi為何突然興起想下廚？她說：「我想學好耐 o架啦，以前好驚見到個廚房，好怕油煙，加上自己冇天份，炒飯又會炒燶、煎隻蛋都煎燶晒。」 Sammi透露以前下廚烏龍百出，例如蒸肉餅完全沒有調味，因為她直覺以為肉餅是不需要加調味料，直至試味時才知道，當然少不了將糖及鹽搞錯。
搵朋友試食
Sammi盛讚父親是一家之「煮」，可惜她未能得其真傳。《 Face》圖片
作為潮汕人， Sammi最想學識炮製潮州的甜芋頭，因為這味甜點十分能夠代表潮州，她亦很愛吃甜品。不過 Sammi笑言至今仍未能成功煮出半個人份量的食品，她解釋：「我整啲嘢真係冇人食得落 o架，我會照住本 cook book去整，但結果都係唔得，我相信唔係本 cook book有問題，係我個人有問題，所以整咗一份出嚟自己食半份囉。」
隨後 Sammi踢爆助手為鼓勵她而讚她的製成品好味道，她說：「我同一樣嘢會整一次畀助手食，另外會整一次畀朋友食，助手次次都話好食，但係朋友就話唔 OK，出嚟評價分別好大，我覺得朋友嘅評價可信好多。」
擇偶揀廚神
問到 Sammi學烹飪是否想成為一位賢妻？她說：「咁睇自己喺一個家庭入邊係乜嘢角色啦，有女人掌管屋企財政係好叻嘅，咁咪唔需要煮飯囉。而且煮飯日日煮就冇樂趣 o架啦。」提議 Sammi將來找一個廚藝了得的老公？她笑說：「都好喎，其實我都係鍾意洗嘢多啲，我次次上朋友屋企食飯，佢哋屋企冇工人，我次次都負責洗碗 o架。」
攝影：陳慧安
場地提供：港島廳
化妝： Ricky Lee（ Zing Makeup School）
髮型： Billy Choi（ Hair Culture）
服裝提供： Escada、 Marc Jacobs、 Just Cavalli
炮製蘿蔔糕大陣仗
1.洗淨材料
2.炒香臘味
3.大廚開粉
4.撞粉變滑
5.落料蒸糕
6.切件煎香
難得有自己的出品， Sammi自然急不及待試食，煎糕手勢看來有板有眼。
材料
蘿蔔絲 4斤
粘米粉 1斤 4両
生粉 4両
乾澄麪 4両
清水 5斤半
鹽 1両 2錢
雞粉 2両
砂糖 3両
古月粉少許
乾葱油 2両
麻油 2両
臘腸 10両
臘肉 2両
蝦米 2両
熟瑤柱 4両
濕冬菇多少隨意
做法
先將蘿蔔絲拖水備用，臘味也要拖水，然後炒香。做蘿蔔糕通常分數個程序做，將 5斤半水分兩份， 3斤水用來開粉，另 2斤半水放落鑊處，滾蘿蔔絲，滾後撞落開粉處，撞至半熟的糕就會更滑，攪勻後放落膠盆，再加瑤柱、臘腸鋪在糕面便可蒸，大約蒸 45分鐘便成，待凍後便在雪櫃放存好，想食取出切件便可煎。
娛樂資料庫
廚房宣言永難忘
許志安及 Sammi於 01年度《勁歌》總選奪得最受歡迎男、女歌手獎。
許志安及鄭秀文（ Sammi）成為 2001年度《勁歌》總選的最受歡迎男、女歌手，安仔當晚得獎時在台上發表「廚房宣言」，他哭着說：「有一個人我一定要多謝，我記得我曾經喺佢廚房度話，如果有一日你拎女歌星獎，我拎男歌星獎就好，多謝你。」此時在台下的 Sammi被安仔一番愛的宣言感動得於台下哭個不停，隨即更衝入後台。
炮製蘿蔔糕大陣仗
Sammi聽到安仔的「廚房宣言」感動得哭起來。電視圖片
安仔當晚的「廚房宣言」成為一時佳話，二人去到慶功宴時即成為全場焦點，當時被問到會否向 Sammi求婚時，安仔卻不欲多說。