許志安與鄭秀文(Sammi)二人拍拖逾廿二載，經歷風吹雨打離離合合，最終仍是對方最好，早前復合後安仔曾邀請女方同居，又多次主動求婚，可是最終都被女方拒絕，直至今年八月Sammi於渣甸山豪宅面臨被迫遷，才首肯搬入安仔寓所同居。就有報道指二人過了數月同居生活後，安仔終於成功抱得美人歸，並早於上月三十日，在印尼峇里島秘婚，並只邀請雙方親人及經理人郭啟華到場觀禮，圈內外好友亦全不知情，惟Sammi的姊姊喜情難禁，向其公司同事和好友私下透露消息，婚訊才被曝光。

Sammi同安仔的經理人郭啟華今日親述喜訊：「許志安在今年鄭秀文的生日派對上向鄭秀文求婚，終於成功，他們和家人在11月底一起去峇里島旅行慶祝此事，我作為他們的經理人，認識他們已超過四分一個世紀，看他們經歷了這麼多，終於走在一起，我真的沒想過鄭秀文終於都答應了，所以我心情很興奮，但接下來那件事會在何時舉辦，便由他們遲些再公布。」郭啟華補充，許志安只是和鄭秀文求婚成功，在峇里島並沒有註冊結婚。

鄭秀文99年預言：希望大家拎住報紙祝福我幸福快樂！

鄭秀文(Sammi)喺99年演唱會上面，佢曾經大談自己最終會結婚走上婚姻之道，當年仲話如果大家打開報紙講佢結婚，佢好希望大家仲記得佢喺呢個演唱會同大家講嘅說話。

嗰個片段係咁，當時Sammi:「有好多女歌手同我差唔多同期出道，有啲已經結咗婚，今日睇報紙知道Cass(彭羚)已經有咗身孕，真係好恭喜佢。(台下有粉絲問Sammi幾時輪到佢﹖)冇咁快！我咁fit，keep得23吋腰，我唔想破壞呢條腰，咁優美，人家就話得天獨厚啫，生完BB，條腰都可以keep到22吋，但你咪睇我依家好似奀唧唧咁樣，其實我為咗呢次演唱會做好多預備功夫，希望以一個最佳、最好睇嘅狀態同大家見面。」

Sammi繼續有感而發話：「我覺得終歸我係一個女性，無論一個女性喺佢事業上面，或者喺佢工作上面，有幾好成績或者幾有成就都好，我覺得去到最尾，都離不開會踏上一條美滿婚姻之路，咁所以呢，將來如果我真係有幸可以搵到我另外一半，能夠付托終生的話呢，我好希望當大家打開報紙，見到我著住裙褂斟茶畀老爺奶奶飲嗰陣嗰啲相，大家都會記得我今晚喺呢個紅館入面，同大家講嘅呢番說話，希望大家會一邊拎住報紙，一邊默默祝福我永遠幸福同埋快樂，多謝你哋！」講完之後，Sammi唱周華健嘅《明天我要嫁給你》

華仔聞Sammi喜訊: 未由當事人通知我，只能當謠言

Sammi同安仔拉埋天窗，好多佢哋嘅好友都表示恭喜，好似Sammi老闆林建岳話：「恭喜佢哋呀。」

藍奕邦表示：「真的可以說句恭喜！由我中學時代開始看著你們情侶檔到現在，一直都深信你們meant for each other。如今修成正果，我們大家也等到今日了。」

黎燕珊話：「安仔都係教徒真係最好，神一定會安排好。」

杜琪峯對於愛將Sammi結婚，就以詩句回應：「眾裏尋他千百度，驀然回首，那人卻在，燈火闌珊處。」

楊千嬅：「聽到安仔同Sammi嘅喜事嚟到聖誕節喺特別sweet，祝佢哋甜甜蜜蜜，永遠都係咁loving咁開心。」

不過最搞笑都係Sammi拍檔劉德華，佢話：「未由當事人通知我，只能當作謠言。」人哋經理人郭啟華都證實咗啦！唔通華仔冇睇即時新聞？