香港政府被指黑箱作業，只向有線和nowTV增發免費電視牌照，不死維基想出復生之路搞流動電視市場，令2014年的電視業界將出現新局面！不過，電視霸權仍遺留不少禍根，藝人過去冇選擇，簽約時要面對很多不公平條款。已離開無綫（TVB）、近年在內地發展順意的陳鍵鋒，日前接受訪問大爆當年在困獸鬥環境下簽約，還嘲無綫近年劇集低收視仍搞慶功，似掩眼法，惹人發笑！

電視業一台獨大多年，早前通訊事務管理局斥無綫「以低成本囤積藝人」，並禁止非全職合約藝員和歌手亮相其他電視台，有違《廣播條例》，要重罰90萬元。過去藝人因冇選擇大多不敢發聲，但改變世界總要有勇者站出來，陳鍵鋒可算是先鋒者；前年他與無綫因「傾唔掂數」，由被力捧小生越做越霉，一怒之下爆大鑊斥責無綫連幾十蚊人工都「唔願加」，憤而往內地發展。陳鍵鋒憑內地劇《美人心計》省靚招牌，最近擔正演出的《鋒火佳人》成為近期內地劇全國收視第二位，更創下安徽衛視2013年最高收視紀錄，算為自己爭一口氣。

但每次提起娘家無綫，陳鍵鋒總是氣難平，日前他在尖沙嘴接受蘋果日報專訪，透露當年簽約的不愉快經歷，他說：「啲手法唔鍾意，令人好唔舒服、好有壓迫感。」18歲起，陳鍵鋒便跟經理人Ivy簽下長期合約，故一直拒與無綫簽包薪藝員約，只簽基本藝員合約，故不是「親生仔」，但有一天被要求單獨入房傾約，他說：「今日叫你上office傾，但我有經理人，係咪應該帶埋經理人去呢？但佢哋又唔准，要我一個人嚟。結果好似係兩個大人對一個小朋友，壓迫感好大，輕輕同你講完條件，就喺櫃桶攞份一早預備咗嘅合約出嚟畀你簽，條件喺晒度，冇得郁，困獸鬥咁。一係簽，一係你自己諗嘞……」

■陳鍵鋒憶述當年簽約不准帶經理人一齊傾。
設計圖片及對白

■簽約時陳鍵鋒面對的，是一份預先準備好的合約。
設計圖片及對白

嘲低收視照慶功

結果陳鍵鋒決意離開這間房，問有沒有後悔？他說：「唔好講到咁嚴重，邊有人18歲做一份工做到60歲退休？有人話我唔簽TVB係反骨，但如果當時我簽咗，就係對Ivy反骨，我毀約要賠畀邊個？我都要保障自己。」

眼見無綫近年劇集收視偏低，連「男神」黃子華出馬都難過30點，陳鍵鋒笑笑口說：「呢個收視大家都睇到，點解27、28點都可以慶功，以前《男親女愛》40、50點先大事鋪張，差十幾點喎，又可以大事鋪張唔面紅嘅，你唔好做呢啲掩眼法啦！我真係覺得好搞笑，好彩觀眾好醒目，身邊好多朋友都上網睇電視，我屋企部電視都裝咗Apple TV，可以睇晒全國電視劇集。」陳鍵鋒透露王維基亦有向他招手，他說：「我有教佢屋企人滑水，同王生私下都認識。有次佢嚟台灣搵我拍劇，但啲期太密接唔到。不過早前同過檔王維基嘅港視幕後人員食飯，問我想拍乜嘢題材劇幫我寫，我話唔使咁誇張，叫佢哋寫啲喺舊公司怕打爛飯碗、又驚俾人鬧嘅題材出嚟，我都好耐冇拍廣東話嘅劇集。」

■王喜憶當年簽約要主動出擊，亦沒有時間考慮。

■劉玉翠不滿要還騷，但基於霸權仍要無奈接受。資料圖片

劉玉翠不滿還騷

此外，王喜和劉玉翠當年與無綫傾續約亦面對同樣問題，王喜昨在電話中說：「你可以拎返去睇（合約），帶埋律師帶埋家長上公司睇，但到時你肯簽，公司肯唔肯簽吖？喺我嚟講一係簽一係唔簽，如果公司得一個canteen，而方圓400里係冇其他canteen，咁你食飯去邊度食吖？o依家canteen一個常餐一個快餐賣500蚊人民幣一個，你畀唔畀吖？」

劉玉翠則不滿要還騷債，她說：「譬如你欠20個騷，佢哋（TVB）會叫你請假還番，當冇人工，唔開心係我明明喺度等你開工，你唔搵我之嘛。我試過兩個月冇人工，變咗12個月糧攤開14個月畀你，初時冇明文（規定），後來直頭加埋落合約度，諗到呢啲橋真係好嘢囉！你諗住喺電視台發展，都要無奈咁接受。」

採訪：嵐山、方圓
場地及服裝：Twist

■陳鍵鋒在《美人心計》中飾演劉恆人氣升，與林心如配成一對。劇照

■陳鍵鋒喜歡潛水，不介意為港視拍大膽題材節目。互聯網圖片

律師話：簽約着重溝通

陳鍵鋒指當年無綫不讓他帶同經理人傾約，黃國桐律師昨接受電話查詢時表示，未成年人士必須要有監護人在場，成年者若沒有經理人或可靠專業人士陪同下談合約，可以傾完回去再與經理人商量，雙方溝通好才簽約。

黃國桐又謂：「藝人傾合約必須要注意合約年期、酬勞、工作性質，同埋公司日後會提供乜嘢相應輔助，例如點樣幫藝人做推廣或爭取曝光機會等。」