李詩韻在《情越海岸線》中，飾演為了達到目的而犧牲身邊人的拜金女「Heidi」。聲稱單身的詩韻，坦言本人並不拜金，選擇對象重才華多於財富，看內涵多於背景。但她聲言先後傳過緋聞的「筍盤一號」馬國明和「筍盤二號」陳展鵬並非那杯茶，希望五年內搵到如意郎君。

撰文：杜淑霞　攝影：李權威
化妝：Synni Tam
髮型：Jay @ Hair
場地：Hair（九龍塘又一城）

詩韻談到「Heidi」這角色，坦言也擔心觀眾會憎恨，「呢個角色雖然好寫實，講佢為咗向上爬利用身邊啲人，但係呢類角色始終唔討好，加上展鵬個角色好完美，我仲對佢咁差，自己都覺得過份，我係觀眾都會憎我自己啦！」

詩韻坦言並非「拜金女」，不會選「富二代」做對象。

「筍盤」冇火花

詩韻不諱言本身跟角色的價值觀相反，揣摩時也有難度，「我演繹時都要迫自己接受佢嗰套，因為我本身揀男朋友，絕對唔會向錢看，唔係話富二代一定唔好，但係佢哋大部份嬌生慣養，有咁好條件又會自負啲，自然難相處，最重要一定好多女仔埋身，我最唔鍾意同人爭，況且本身有才華同內涵嘅男仔，我覺得仲吸引，靠自己咪仲叻仔。」

詩韻在劇中跟陳展鵬演一對而傳出緋聞，而早前她跟另一緋聞對象馬國明出席活動，就公開承諾兩人若五年後找不到對象便要結婚。詩韻對於先後跟兩大「筍盤」傳緋聞，竟大表無奈，「佢哋唔係我杯茶，同馬明熟啲，佢真係筍盤嚟，如果係拍拖早就拍咗啦！展鵬就無咁熟，但覺得佢份人好成熟穩重，但係真係冇火花喎！不過我都要加把勁，唔係五年後真係搵唔到對象，就要嫁畀馬明啦！」

詩韻笑言跟兩大「筍盤」傳緋聞，並未有特別興奮。