李詩韻跟鄧健泓甩拖後,舊愛隨即跟龔嘉欣撻着。不過,李詩韻都唔執輸,上月底被發現跟高大型男夜蒲又攬又錫後,前日她偕另一 ABC高大型男到銅鑼灣買梳化床,二人又坐又瞓,又一起揀布料顏色。雖然昨日李詩韻聲稱當日為胞姊買床,但能跟她試床,二人點止朋友咁簡單!
無綫花旦李詩韻日前被發現跟一高大型男到蘭桂坊夜蒲,二人在街頭又拖又攬又錫,但李詩韻事後聲稱跟男方只是朋友,未有任何進展,又強調跟男方沒有親密關係,當晚男方只是基於風度扶她一把。
儘管李詩韻口口聲聲表示現時沒有拍拖,但前日記者卻發現她偕另一高大型男到銅鑼灣行街街,二人還一起選購傢俬,關係非比尋常。前晚 7時半,記者見穿白短裙襯黑外套、打扮相當斯文的李詩韻,偕高大型男到銅鑼灣的宜家傢俬購物,型男滿口 ABC,跟李詩韻全程英文對答。
李詩韻前日與 ABC型男在銅鑼灣宜家買傢俬,二人齊齊坐在一張梳化床上測試彈力。
型男試瞓梳化床,但李詩韻卻聲稱是代姊買床。
李詩韻前日上載與型男及女友人買孫耀威 CD的照片。 微博圖片
陪坐試瞓有商量
李詩韻攤在梳化上,型男即蹲下侍候。
二人走進宜家後一支箭去睇梳化床,在職員介紹下,李詩韻與 ABC型男先後試坐試瞓了多款梳化床,價錢由數百元至數千元不等,二人不時交流意見,試完幾款後又一起揀布料顏色,其間型男興致勃勃拿着一幅布料問李詩韻意見,猶如拖友為愛巢添置傢俬般。揀了大概 20分鐘後,李詩韻終揀啱心水,然後由她碌卡找數,之後便與型男急急腳離開。
記者昨日致電李詩韻,問及當日型男身份,會否是當晚夜蒲錫錫的男伴時,她笑說:「 100%唔係,兩個人嚟 o架!我嗰日唔係淨係同一個男仔,仲有個女仔喺度 o架,我同一男一女去買孫耀威 CD。」但記者只見李詩韻跟型男二人一起買床。
觀音兵唔止一個
究竟是幫型男買床還是自己買?李詩韻說:「自己買,家姐搬去我度住,咁短時間搬唔到屋,咪搵啲快嘅解決方法囉!」一起揀床的型男是否真命天子?李詩韻叫道:「梗係唔係啦,冇可能,諗都冇諗過。」那麼,當日夜蒲的男伴會否是男友?李詩韻說:「唔係,總之呢一刻我冇男朋友。」