夾Band出身的「豹哥」單立文，以音樂讓觀眾認識，打後卻要靠做奸角及拍三級片維生，厭倦了演繹樣衰衰的人渣敗類，他選擇退居幕後，做演唱會的樂手、監製等，總算餓唔死。由當紅歌手、大銀幕中的變態佬，至現時返TVB捱騾仔，他笑笑口：「最緊要過程開心。」儘管收入一般，太太胡蓓蔚搵錢有時還多過他，但他仍堅持畀家用，做個負責任的男人，「無理由成日食軟飯，雖然我有咁嘅條件。」為了維持兩公婆的優質生活，他拒絕生B，「除非生活條件好好，否則都唔使諗。」講到咁灰，突然想將劉德華的《天生天養》送給他。他何嘗不是天生天養呢！

撰文：李佩儀　攝影：李權威

一個好人

在娛樂圈打滾25年的豹哥，歌影視三瓣通殺。組Band玩了三年便解散，無得唱歌，他走去拍電影，有幸得到第九屆電影金像獎最佳新人提名，角逐的是《潘金蓮之前世今生》「西門慶」一角，從此，單立文跟人渣及猥瑣佬角色結下不解緣。即使94年加入無綫拍劇，變態味仍揮之不去。

「以前啲人幫我定位係為咗慳時間，因為我一行出嚟啲觀眾就知我做咩角色，但o依家唔同，只要有人肯花多啲心思，改一改我，扭一扭我，出嚟嘅效果已經好好。」所講的是早前播出的《熟男有惑》，豹哥飾演的藍爵士是度身訂造，角色有發揮亦非常突出。

多得《衝上雲霄II》的監製歐冠英，因為是她先找豹哥回巢，之後陸續有監製起用他。因為人生經驗豐富，豹哥駕馭任何角色亦遊刃有餘，對於讚賞，他搶住認叻：「使乜講！」所以今次返TVB總算是個好開始，最低限度可以做番個好人。

靚仔無用

豹哥絕對稱得上靚仔，加上有音樂造詣，在娛圈理應大有作為，但因他出道時愛戴黑超收埋自己，Cool Look嚇走不少製作人，原來豹哥玩生人勿近緣於小時候的不快經歷。「中小學時一有女仔走埋嚟，啲人就唔鍾意，話靚仔大晒咩，因為妒忌搞到我成日畀人排斥、整蠱，所以我入行時都幾孤僻，希望低調少少做音樂，以搖滾打出一片天。」可惜結果都是一樣，最後要單飛發展。

平時慣了三人行的他，突然得番自己一個，他的信心也崩潰了。「我覺得自己把聲有啲怪，唱歌都唔好聽，唔能夠令人信服，我當時諗，如果我係聽眾，我都唔會買呢隻碟。原來有隊Band、有兄弟班，個信心真係強啲，要獨力承受晒所有壓力都幾慘，當時成日都問點解身邊無人扶持，唔似得o依家有保母、助手幫你擋駕！」

就是因為無人幫，令豹哥的成長速度快人十倍，很多真相都由自己親身去經歷，姑勿論是好是壞。從那時開始，他學會踏實做人，明白享受過程才會得到真正的快樂。

二人世界

08年，豹哥跟拍拖11年的胡蓓蔚結婚，人生走向另一階段，不過只限於二人世界，生BB就No Way了。他解釋：「兩公婆開開心心幾好，有時睇到身邊朋友生咗BB後，生活方式唔可以話坎坷，係好充實，充實到無晒自己嘅私人時間，所以除非生活條件好好，好似李嘉欣同陳慧琳咁，嗰啲先叫做無憂，否則都唔使諗。」

為了維持優質生活，豹哥努力工作賺錢，雖然有時老婆收入多過他，但豹哥依然畀足家用，「家用一定要畀，即使o依家興公一份婆一份，但都無理由成日食軟飯，雖然我有咁嘅條件啫。」

而且他還會做家務，洗碗、抹地、熨衫一腳踢，點睇都是好男人的典範，但他卻不敢恭維，「我唔夠膽講，每個人對好男人嘅定義唔同，一個好物質嘅港女，好男人係有車，埋單找數，對你就要好，朋友面前唔可以失禮；佢得閒嗰陣就追魂Call電話，唔得閒Yo你嗰陣就話你煩！」其實是豹哥謙虛，有樣有才華的住家男人去邊度搵？

單立文歌影視都接觸過，現時最愛就是拍劇，因為親民又入屋。

他覺得拍劇辛苦，幸好TVB有美味的豬扒包作鼓勵。