八十年代無綫當家花旦邵美琪當年成功擄獲不少觀眾的心。現已屆50歲的邵美琪，繼鄭伊健劈腿梁詠琪之後，再遇上年輕她10年的施祖男，兩人6年前因為拍電影《機動部隊——同袍》戀上，邵的名氣遠高過施，工作量同收入就更加，但對愛情無悔、愛得投入的邵美琪從未計較理會，甚至有傳她好積極接工作給工作量唔多的施祖男，且亦多次拍得男方出入邵美琪位於北角威景臺香閨，出入以女友坐駕代步，關係似是無分彼此。

不過今日就有報道指，施祖男自去年拍完張艾嘉的《華麗上班族》就一直沒工開。反而邵美琪就劇接劇，經常返內地拍外景。報道指施祖男一趁女友不在港就作犯，回復獵女本色四出覓食。報道指施祖男一向多女親近，多年前同邵美琪拍拖沒多久，已被爆趁女友不在港竟借用女友架車接載女伴，又曾追過衞蘭，但就同邵美琪講當女仔是細妹，叫她不要亂想。不過今次有指施祖男食得太「張揚」，就連身在內地的邵美琪都收到風，兩人吵了場大架，結果施祖男收拾包袱回法國。

邵美琪和施祖曾傳婚訊，更曾高調拍拖現身電影首映禮。

報道引述知情人士話，最初施祖男以為邵美琪一定會找回他，誰知出乎佢意料之外，竟然沒有。邵美琪上個月病了，但她寧願自己一個辛苦，都不想再找施祖男，令施大感錯愕，受訪時亦只是說：「大家做嘢各有各忙。總之佢忙緊佢嘅嘢，我忙緊我嘅嘢！」

男友發難執包袱返法國，記者詢問邵美琪，再受情傷的邵美琪就只是不斷重複一句：「我唔講感情問題的，Sorry！」其經理人Catherine今日接受電話訪問回應此事時亦說：「其實我哋同任何一個媒體講都係話唔會講感情事，我覺得問咩都係唔會講，除咗公事，所以我哋暫時無咩好講，人哋點講，你知Maggie不嬲唔會講嘢，希望大家明白一樣嘢，都係play attention to佢工作OK？」

入行30年5段情 邵美琪戀伊健最傷

今年50歲嘅邵美琪，入行三十年，情路一直崎嶇，就算唔計今次嘅不忠施祖男，佢之前嗰四段情最終都未能開花結果。邵美琪84年入行，同當時擔任編劇嘅戚其義拍拖，兩人相戀六年後分手，但再見亦是朋友。

92年，邵美琪同鄭伊健合作《九反威龍》撻著，伊健曾承諾照顧佢一生一世，可惜之後梁詠琪介入、上演轟動全城嘅「奪麵雙琪」，邵美琪成為輸家敗走，傷得好深！

03年，邵美琪被拍到同身家過億嘅已婚「圍村地王」鄭倫光同遊北京，喺機艙內，邵美琪仲挨住男方膊頭。06年，邵美琪同黃德斌合作《火舞黃沙》而傳出緋聞，兩個經常喺眾目睽睽下打情罵俏咬耳仔，但最終都係冇米粥。

邵美琪：分手不涉第三者

邵美琪今日下午終於在微博正面提及與施祖男分手，她以笑臉符號留言說：「多謝各位關心。娛樂報道不要信。我們相信緣分。不要將事情想得太多。至於分手純屬私人理由，並不涉及任何金錢利益或第三者，及後我們亦不會就事件再作任何回應。在往後的日子希望我們的努力得到大家支持和鼓勵。我們永遠是好朋友，永遠祝福對方。」